Read Poumei Naga LUK 18 Bible Online

LUK 18 - Poumei Naga bible

LUK 18

¹Süthaisü puh rozümaitao nou le khaitamoa teisanou veachi pao-a buzüe touyu doupeire donou Jisu nou puletao hi nada ali paopeie.

²“Nuhdu alihi Ramaiye pimoyu ea maiye tsükhou moyu chiku-apeimai ali bue.

³Alia nuhdu sühisü meamaipfü ali-a bue; alia puhnou puh hi tobai soumoa taveloua, ‘Avei ngaobamai pei hi khüh phoupeio’ tea paoe.

⁴Teile phajü koutesü puhnou bae; ana thaikhai hinou puh lahnou puh hi paoe, ‘Enou Ramaiye-a pimo moa maiye-a tsükhou mokhaia,

⁵meamaipfü haipainou Eye souchoro peiyu donou Enou puhkhüh phoupeilai, molouzü puhnou tobai soumoa tave zhazhayu nou Eye souveawuyu shulai!’”

⁶Alia Mapao nou paoe, “Cheche moyu chiku-apeio nanou paoyusü keikhaio.

⁷Alia Ramai-a puh hinou kheihea khoa buyu puhvei dopalouyu maitaoye donou khüh phoupeilai mowu? Puhnou puletaoye soukhare hisü shoshosoua bailaiwu?

⁸Enou neletao hi paowe, puhnou puletaoye donou thala-a khüh phoupeilai. Sütoukhaia Mai Nahpoutu veyu kisü puhnou deiphao hisü lü louche-a buyu maiye ngaolaihi mosa?”

⁹Alia puletaowo acheche hinou tawe tea lah puletaoye likhei loucheloua kukhe maiye ngaora-a laiyu maikhemai taohi Jisu nou nada haina-a paopeie.

¹⁰“Teile alihi mai ahai veachi paore donou rathoki hi takhe: ali louzü Pharisee maie ea kukhena louzü kikha khamaie.

¹¹“Pharisee maipou sünanou lashuloua puh lahnou haibüa veachi paoe, ‘Oh Ramai, Enou neye showe, daiolouzü Ewo kukhe maitao—maivei pitoumai, chechemomai, naotumaiye soumahyu mai moa kikha khamai haina kumoe.

¹²Ewo teithecho lihi lüh ahai lühwe, alia Enou ngaolouyu zha kirou hinou ali nehi peiwe.’

¹³“Ana kikha khamai sünanou puh pahsü rakilo pfülanümoa adou kounou, la-a bue, ana puhnou puh khaosü khouloua paoe, ‘O Ramai, mahmai Eye zhuvea leshipeio!’

¹⁴Enou neletao hi paowe, kukhe maisüna moanou, mai hainawo louzü Ramai nghojünou chi kusheewu-a puh kihi takoure; daiolouzü lah puhye soukuyu mai taye sü sounawulai, alia lahnou natai-a buyu puhye sü souku peilai.”

¹⁵Chuo mai kamainou Jisu ye panou puh bahnou nahtumaitao pei hi deipeire donou puletaoye puh hi save; alia rozümaitao nou süsü ngaolouyu kisü puletaoye züpeie.

¹⁶Ana Jisu nou nahtumai taoye puh hi kukouloua paoe, “Nahtumai taoye panou Ahi koukhaio, alia puletaoye nuso; daiolouzü Ramai Vedeihai haibüyu mai veie.

¹⁷Enou neletao hi chekhaoa paoe, maita linou nahtumai ali büa Ramai Vedei nasü polou molouzü puhnou sühisü hatakia loulou hoe.”

¹⁸Alia Jihudimai peichamai alinou Jisu hi noue, “Dou-apei Aveio, Enou teisa ahri ngaoloure donou dai soulai?”

¹⁹Alia Jisu nou puh hi paoe, “Daidonou nenou Eye nou Aveio tea kuwe? Ramai likhei baimoa kukhe veiyu mailia hae.

²⁰Nenou, ‘Mai chapfüye sapaso, maiye southeaso, vaoso, madayu zhopaoh peiso, ne pfüpuoye tsükhoulo,’ touyu chikhataosü süwe.”

²¹Mai sünanou chila peie, “Haitao teiteisü Enou taibu kinou reiloure.”

²²Alia Jisu nou süsü choulouyu kisü puh hi paoe, “Chukoute nehi chemoyu hali bue. Nevei buyu teitei zholaiwu-a pousha nasü toure hamai hi zhihpeio, alia raki hinou nevei kini bulai; süthaisü taveloua Athai fülo.”

²³Ana puhnou sünasü choulouyu kisü leveasho loure, daiolouzü puhsü hani showe.

²⁴Mai sünanou leveasholoua buyu sü Jisu nou ngaoloua paoe, “Hanimaitao donou Ramai Vedeihi veloure sü daizhozhou tateishosa!

²⁵Daiolouzü hanimai alinou Ramai Vedeihi velouyu jüwo racho alinou peimihi tailouyu sünanou talahie.”

²⁶Puhnou paoyu süna choulouyu maikhemai taonou noue, “Sübüyu thaisü thaohmainou khailulou sülai?”

²⁷Ana Jisu nou chila peie, “Maiye donou soulou hoyu nataosü Ramaiye donou louzü soulou sübaie.”

²⁸Alia Pitar nou paoe, “Zhukhaio Eh nou Eh kisü thaowu-a nethai füloure.”

²⁹Jisu nou puletao hi paoe, “Chekhaoa Enou neletao hi paoe, Ramai Vedei donou maitalinou puhki moa puh chapfü moa thaihou-jürai moa pfüpuo moa nahmaitaoye thaowu louzü,

³⁰puhnou chu hria buyu teile hi-a zha alaosou koua ea vere teile hi-a teisa ahrisü ngaolai.”

³¹Alia Jisu nou rozümai kiahai taoye sakupaloua puletao hi paoe, “Zhukhaio, Eletao Jerusalem hi tapa-a bue, alia rachi paolamai taonou Mai Nahpoutu vanou rüthoukhai touyu teiteisü vete khoulai.

³²Daiolouzü puhye sü tahrüh kukhe maitao bah hi thoupeilai, alia puhye sü konüa ea sou ahrao peiwu-a puhvahi taidzü süsholai.

³³Puletao nou puhye sü südanou dapeiwu-a southealai, alia teithe asü kisü puhsü hrishulai.”

³⁴Ana puletao nou chipao sütaosü halia sülou moe; paopeiyu sünavei kosü puletao hinou pokure, alia puletao nou paopeiyu sünasü halia polou moe.

³⁵Alia Jisu nou Jeriko hi takou ngheiyu kisü, sühisü nghichamai ali dupe hinou tosü-a bue.

³⁶Alia maisounou ta-a buyu sü chouloua süsü dai souwe tea puhnou noue.

³⁷Puletao nou puh hi “Nazareth hi Jisu ta-a bue,” tea paopeie.

³⁸Alia puhnou paikua shapae, “David Nahpoutu Jisu, Eye zhuvea peio!”

³⁹Alia nghojülonou tayu maikhemai taonou puhye sü nasha-a bukhaio tea züpeie; ana puhnou lejünou pai kupuloua paoe, “David Nahpoutu, Eye zhuvea peio!”

⁴⁰Südonou Jisu nou chouloua puhye puh hi sakoure donou kharochi peire; alia puhnou ngheikihi takouyu kisü puhnou puh hi noue,

⁴¹“Eye panou neye donou dai soupei nüwe?” Puhnou chila peie, “Mapao Eye panou Anghithou sü ngaoloukhaio.”

⁴²Jisu nou puh hi paoe, “Ne nghithou sü ngaolouwo; nevei lünou neye souvei peire.”

⁴³Alia sübü hinou puh nghithou sü ngaoloure ea Ramaiye shopoa Jisu thai füloure; alia maikhemai hrülainou süsü ngaoloua Ramaiye sholoure.