Read Poumei Naga LUK 2 Bible Online

LUK 2 - Poumei Naga bible

LUK 2

¹Teile sükisü Kaisar Agasta hinou deiphao teiteisü maipei rüre donou kharochi vere.

²Quirinia nou Suria hinou teidei khowona soubu kisü maipei rüyu sünanou raikaiyu nasüe.

³Südonou mai hrülainou lahla vei nuhbuh hinou zhih rüthoure donou takhaire.

⁴Südonou Josef-a Galilee hi Nazareth nuhduna hinou tapoa Judea hi Bethlehem tea kuyu David vei nuhduna hi tare, daiolouzü puhsü David vei khü ea kikha hinou ve.

⁵Puhnou puh ki tokhai touyu, poupfüa buyu Meri ye koa zhih rüthoure donou tare.

⁶Alia puhai nou sühi bubukinou puhye donou nah nare phasü veloure.

⁷Alia puhnou puhvei raikaiyu nahpoutuna sü naloure ea puhye sü sahzünou pozütouloua rheikhaohi pozüre, daiolouzü shevai chaoyuki sühisü puletaoye donou chaorebuh hare.

⁸Alia teidei sühisü zhaokhomai kamainou rekounou nai-a khei hinou puletao vei zhaokhosü khoa bue.

⁹Alia Mapao vei rakivamai alinou kou puletao nghojünou laloure, alia Mapao vei khouko-avanou puletao hisü varu peire. Südonou puletaosü ngaopisho loure.

¹⁰Ana rakivamai sünanou puletao hi paoe, “Pikhaiso! Daiolouzü zhukhaio, mai hrülai donou sasho laiyu ko avei nasü Enou neletao hi povewe;

¹¹daiolouzü zhou teithehi David vei nuhdu hinou neletaoye donou Khailu-apeio ye sü naloure, puhsü Khrista, Mapaowo süe!

¹²Alia neletaoye donou süloure shee nasü haire: neletao nou sahzünou pozütou khaitouyu nahtou ali rheikhao hinou züa buyu sü ngaoloulai.”

¹³Alia pha sübü hinou rakivahi reihmaime adu linou rakivamai sünaye koa sühinou Ramaiye shoyu lou soua haibüa shaloure:

¹⁴“Aku kulai raki hinou Ramaiye sholo, alia deiphao hinou puh züpa soua buyu maitao hrohisü kaonayu buloutheo!”

¹⁵Rakivamai taonou puletao hinou rakihi khaidatayu thaisü, zhao khomaitao nou alinou lihi haibüa paoe, “Eletao Bethlehem, hi taho Mapao nou Eletao hi paosü peiyu pawuyu chi sünasü zhulaikhe.”

¹⁶Südonou puletao nou thala taloua Meri ea Josef ye alia rheikhao hinou züa buyu nah sünaye tave ngaoloure.

¹⁷Puletao nou puhye ngaolouyu kisü, nah süna vanou puletao hi paosü peikhai touyu chi nasü puletao nou paosü peire;

¹⁸alia zhao khoyumai taonou puletao hi paongao peiyu süna vanou ko süna choulouyu mai hrülai sü khupa loure.

¹⁹Ana Meri nou chi sütaosü puh le hinou cho-a paopeiyu sütao teiteisü puh lekhehi poku khaire.

²⁰Alia rakivamai sünanou puletao hi paopeiyu sübütoua puletao nou tave sütao teiteisü choulou ea ngaolouyu vanou, zhao khomaitao sü shoyu lounou soua ea Ramaiye paoshoa khaitare.

²¹Alia nah sünaye hee vadere donou teithe achazhou akhai kisü, puhye pou pfüshumo jühinou raia rakivamai sünanou puhzhih peiyu sübüa puhye sü Jisu tea sawure.

²²Alia Moses vei razhai thaifüa puletaoye donou sousheere naa souyu teile veyu kisü, Josef alia Meri nou nah sünaye Mapaowo hi peire donou puhye sü Jerusalem hi save,

²³daiolouzü haibüa Mapao vei razhai hinou rüthou khaitoue, “Poutu narai hrülaisü Mapaowo hinou sheeyuna tea kulai.”

²⁴Alia puhai nou Mapao vei razhai hinou paokhai touyu thaifüa, rapüpüyu rahou ahai moa rahou toutu ahai posheelare donou tare.

²⁵Alia sükisü sühisü Simeon tea kuyu mai ali Jerusalem hi bue. Mai hainasü checheyu ea Ramai hinou leishoa Israelmai taoye sousa peilaiyu teile nasü zhia buyu mai alie, alia Rako Mashinou puhye koa bue.

²⁶Alia puhsü Mapao vei Razhepuye ngaomo koutesü thai khailaimoe touyu sü Rako Mashinou puh hi pongao peire.

²⁷Südonou Simeonye Rakonou süpei-a Rathokihi tave. Alia razhai thaifüa pfüpuo nou nahtou Jisu ye naa soure donou Rathokihi saveyu kisü,

²⁸Simeon nou nahtou Jisu ye sü daopoloua Ramaiye shoa paoe:

²⁹“Mapao, chuo nevei chipao thaifüa, nenou nevei kilaiye panou kaona-a taloubaiwo;

³⁰daiolouzü nenou maikhemai hrülai nghojü hinou soudapei khaitouyu,

³¹nevei khailu peiyu nasü Anghithou vuzünou ngaoloure,

³²puhsü tahrüh kukhemai taohi nevei tsüdo pongao peire donou ava, alia nemai Israel maitao hi khouko-ava pove peiloure nasüe.”

³³Alia puh pfüpuosü puh vanou sübüa paoyu donou khupa loure.

³⁴Süthaisü Simeon nou puletao hi hapei-a puh pfü Meri hi paoe, “Zhukhaio, nahtou hainasü Israel maitao alao donou kaotare ea maitaoli donou lashu loure, alia maikhe mainou paoshisho peilaiyu shee süna donou dopapei khaitoue,

³⁵alia südonou maitaolivei kheitsü nasü popangao peiwulai. Alia lah nevei lethou hisü khoche alinou khüthoulai.”

³⁶Alia sühisü Asher khü hinou veyu Phanuel nah naotupai Anna tea kuyu rachi paolapai ali bue. Puhsü tsüshore; puhsü nghiyuthai puh chaaye koa po anai hrüe,

³⁷alia süthaisü puhnou po raichadai meamaipfü ali soua hrükoure. Puhnou khei-heanou lüh-a ea veachi paonou ko-a Ramaiye thoa Rathoki hinou thaokhaimoa bue.

³⁸Alia puhnou teilecho sübü hinou tapaloua Ramai hi kalo paoloure, alia puhnou Jerusalem ye khailupa peire donou zhia buyu maitao hrülaihi nahtou süna vanou paongao peire.

³⁹Alia Josef ea Meri nou Mapao vei razhai thaifüa naa soure souchewuyu thaisü, puletaosü lah puletao vei nuhbuh Galilee hi buyu Nazareth hi khaitare.

⁴⁰Alia nahtou sünasü dushuloua khou-chihloure ea puh hisü ratsünou phouloure, alia Ramai vei zhuveasü puh pei hi buloure.

⁴¹Alia puh pfüpuosü po pasah sü Tachonüh kisü Jerusalem hi tawe.

⁴²Alia puhnou po kiahai tsüpayu kisü, puletaosü zhai thaifüa nühbuh hi tave.

⁴³Alia nüh süna cheyu thaisü, puletao sü kilo khaitayu hinou, nahtou Jisuwo louzü puhai thainou Jerusalem hi naitare, sütoukhaia sübüyu sü puh pfüpuo nou süloumoe;

⁴⁴ana puhai nou puhsü puletao vei me hinou koa laiwe tea chodaloua puhaisü nai zhoa tayu veihdu nasü tachere. Alia süthainou puhai nou puh ye sü puhaivei tarai ea samaitao hrohinou phoushu tare;

⁴⁵alia puhai nou puhye phouhayu thaisü, puhaisü puhye phoupoa Jerusalem hi dakhai tare.

⁴⁶Teithe asü thaisü puhai nou puhye Rathoki levai hinou dou-apeimaitao hrohinou chobua puletao nou paoyu kei-a ea puletao hi chi noua buyu sü ngaoloure;

⁴⁷alia puhvei chipao choulouyu mai hrülai sü puhvei tsü veishoyu ea kaishoyu chilatao sü chouloua khupare.

⁴⁸Puh pfüpuo nou puhye ngaolouyu kisü puhaisü khupa loure; alia puh pfünou puh hi paoe, “Anahna, daidonou nenou Eh hi haibüa souwe? Zhukhaio, nepuo Ahainou neye donou le kishoa phouta-a bue.”

⁴⁹Puh nou puhaihi paoe, “Nehainou Eye phou-a buyu sü daidonoue? Esü Apuo ki hinou buvuzülai touyu sü nelenou sümowu?”

⁵⁰Ana puh nou puhaihi paoyu chi sünasü puhai nou süloumoe.

⁵¹Südonou Jisu nou puhaiye koa takouhloua Nazareth hi khaivere, alia sühinou puhnou puhai chi züa bue. Ana puh pfünou sütao teitei sü puhvei lekhehi pokukhaire.

⁵²Sübüa Jisusü ratsü hilo-a ea pfüphao hilo-a dushu loure, alia Ramai nou ea emainou khu-leshi peiyu hinou dushu loure.