Read Poumei Naga LUK 20 Bible Online

LUK 20 - Poumei Naga bible

LUK 20

¹Naiteithe kisü puhnou Rathoki hinou maikhe maiye doupeia ea ko avei paodou-a buyu hinou, napao adumaitao ea razhai dou-apeimai taonou tsüme taoye koa taveloua,

²puh hi paoe, “Dai zü bua nenou vah haitaosü souwe Eletao hi paongao peio, moa thaohnou nehi soure zü hainasü peie?”

³Puhnou puletao hi chila pei, “E-a neletao hi chili noulai, alia Ahi chila peikhaio,

⁴Johan vei dzükhao dayuhai Rakinou veho, mai hinou ve?”

⁵Alia lah puletao hrohinou veiva-a paoe, “Eletao nou ‘Rakinou ve’ tea paolouzü, puhnou ‘Sükulouzü neletao daidonou puhye louche moe?’ tea paokhailai.

⁶Ana Eletao nou ‘Mai hinou ve’ tea paokhai louzü, maikhemai hrülainou Eletaoye chuhnou deishulai; daiolouzü puletao nou Johanye nou rachi paolamai ali-e tea powe.”

⁷Südonou puletao nou chila peie, “Süsü dai kinou vesa touyu Ehnou sümoe.”

⁸Alia Jisu nou puletao hi paoe, “Sükulouzü E-a neletao hi dai zünou Enou vah haitaosü sousa touyusü paongao laimoe.”

⁹Süthaisü Jisu nou maikhemai hi nada hainasü paongao peie: “Teile alihi darkha kipei ali khoyu mai ali bue, alia puhnou sünasü panou kipei khomaitaoye souloua phasho donou teidei aku alihi veitare.

¹⁰Darkha rashi haire teile veyu kisü, puhnou kilai aliye kipei khomai taohi puletaoye panou puh hi darkha rashi haiyu hinou puhvei zha sü poloure donou seive; ana kipei khomai taonou puhye sü dapeiwu-a panou puh bahsü sakhai-a seikhai tare.

¹¹Alia puhnou kukhe kilai aliye seive; ana puletao nou puhye-a dapeire ea sou ahraosho peiwu-a panou puh bahsü sakhai-a seikhai tare.

¹²Süthai-a puhnou kilai asü chenaye seive; kipei khomai taonou puhye-a daposhu zhupeiwu-a vakouhi khilai pare.

¹³Süthaisü kipei paopu sünanou paoe, ‘E dai soulai? Chuo Enou lah Enou leshiyu Anahpoutuye seivelai; veimosoua puletao nou puhye tsükhoupei shulai.’

¹⁴Ana kipei khomai taonou puhye ngaolouyu kisü, lah puletao alinou lihi haibüa paoe, ‘Hainawo kipei paopuwo nahpoutu nasüe; Eletao nou puhye southeawu laikhe, sübülouzü puhvei kaalo taosü Eletao vei khaibailai.’

¹⁵Südonou puletao nou puhye sü kipei vakouhi khilaipawu-a southeare. “Sübüyu thaisü, darkha kipei paopu nanou kipei khomai taohi dai soulai?

¹⁶Puhnou taveloua kipei khomaitaoye sü southeawulai, alia darkha kipei nasü kukhe kipei khomai taohi peiwulai.” Maikhemai taonou süsü choulouyu kisü paoe, “Sübükhai laimoe!”

¹⁷Ana Jisu nou puletao hi zhuloua paoe, “Sübüyu thaisü rüthouyu sü daie? ‘Ki souyu mainou lulaiyu chuh nasü kukhe veishi jünou matsüyu ki kainghou vei chuhna souloure.’

¹⁸Chuh süna phaonou kaoduyu mai talisü zhusasawulai; ana chuh sünanou mai tali vahi dukou deiwulouzü sünanou puhye sü reisasawulai.”

¹⁹Alia razhai dou-apeimaitao ea napao adumai taonou sübü hinou Jisu ye niloure donou te-e, daiolouzü puhnou nada sünasü puletao pei hi paokhai baie touyu sü puletao nou süe; ana puletao nou maikhe maiye piloure.

²⁰Südonou puletao nou puhye dahpo-a ea puhvei chipao hinou puhye niloua soulousü zü ea khouko buyu teideikhowo bah hi thoupeire donou chechekho soua laiyu maikhao-zhai zhuyu maitaoye seive.

²¹Südonou mai sütaonou Jisu hi noue, “Dou-apeio, nenou cheche sü paowe ea doupeiwe, alia maitalihia zhai soukumoe, ana Ramai vei ludu nasü chekhaoa doupeie touyu sü Ehnou süe.

²²Eletaoye donou Kaisar hi kikha peiyuhai razhai thaifüa ae touho mo touwe?”

²³Ana puhnou puletao vei do ashi nasü süloua puletao hi paoe,

²⁴“Ahi hushanou ali pongaokhaio. Haihi thaohzhu ea thaohzhih bue?” Puletao nou chila peie, “Kaisar veie.”

²⁵Südonou Jisu nou puletao hi paoe, “Sübülouzü Kaisar vei taosü Kaisar hi, alia Ramai vei taosü Ramai hi peikhaio.”

²⁶Alia puletao nou maikhemai nghojünou puhye sü puhvei chipao hinou nilou hore; ana puhvei chila hinou khupaloua puletaosü paikhaimo zheire.

²⁷Süthaisü hrishuyu hae tea paoyu Sadukimai kamainou Jisu hi taveloua,

²⁸puh hinou chili noue, “Dou-apeio, Moses nou Eletao donou haibüa rüthou khaitoue; ‘Maita mailinou tou-dzü alia ha-a puh chapfüye thaowu-a thaita louzü, mai sünavei thaihou nanou puh chapfüye nalai ea sübüa nahmai panou hrüloua sütaoye sü thaitayu mai sünavei tou-dzü tea kulai.’

²⁹Sübülouzü zhukhaio, teile lihi chinamai anai bue, tsükhana sü nashuloua nahmai alia hrümoa thaire;

³⁰alia thaihou ahai chena

³¹ea asü chena noua naotupai sünaye nae, alia sükheihao-a chinamai anai taosü nahmailia ha-a thaikhaire.

³²Akhai hisü naotupai süna-a thaire.

³³Südonou chuo, hrishuyu teithe kisü, naotupai sünasü thaoh chapfü soulai? Daiolouzü puletao anainou puhye hai nakhaire.”

³⁴Alia Jisu nou puletao hi paoe, “Chu deiphao hainahi maitao nou shee-nghiwe;

³⁵ana athai hinou hrishu züe ea vere teilehi ve hrüzüe tea polouyu mai sütao donou louzü sükisü shee-nghi laimoe.

³⁶Alia puletaosü thaipu khailai moe, daiolouzü puletaosü rakivamai kure. Alia hrishu louyu nahmaitao soulouyu donou puletaosü Ramai nahtao souloure.

³⁷Alia Moses koute nou-a rekou ngheipei meitaoyu hinou Mapaoye nou ‘Abraham vei, Isak vei ea Jakob vei Ramai’ tea kuyu hinou thaimai-a hrishuloue touyu zhopaoh peiwe.

³⁸Puh hai thaimai Ramai moe, ana ahrimai veie; daiolouzü puh hisü mai hrülainou hriwe.”

³⁹Süthaisü razhai dou-apeimai kamainou paoe, “Dou-apeio, nenou soutaosoua paopeire!”

⁴⁰Daiolouzü puletao nou khuvei-a chilia puh hi noupukhai more.

⁴¹Süthaisü Jisu nou puletao hi noue, “Kabüa puletao nou Khrista hai David nahpoutue tea paowe?

⁴²Daiolouzü David lahnou Lou Larübvü hinou paoe, ‘Mapao nou A Mapao hi paoe, Enou nevei ngaobamai taoye sü pove nevei phihea soupeimo sasü,

⁴³Avei bahkha zhoulo hinou bulo.’

⁴⁴Sükua David nou puhye sü ‘Mapao’ tea kuwe; südonou kabüa puhsü David nahpoutu khailai?”

⁴⁵Alia maikhemai hrülainou kei-a buyu hinou, Jisu nou puh rozümai taohi paoe,

⁴⁶“Zaocha noua tasühao-a laiyu, alia hupobuh kijü khonou maiye panou khurü nüyu, rathobuhtao hinou avei veilai buh khayu ea nühbuh khonou mainou tsükhouyu buh hinou bunüyu;

⁴⁷naotu meamaipfütao vei ki-lu saotouyu, alia süthai-a chechekho soua phasho veachi pao-a laiyu razhai dou-apeimaitaoye neletao leikei-a zhutoulo. Puletao nou akou koulai dukayu tudee nasü ngaolai!”