Read Poumei Naga LUK 21 Bible Online

LUK 21 - Poumei Naga bible

LUK 21

¹Jisu nou sübüa zhusühaoyu hinou hanimai taonou Rathoki hi sha podzübuh hisü puletao nou popeire na taosü polai thouyu sü ngaoloure;

²alia toure hayu meamaipfü alinou hubashano ahai pove thouyu-a puhnou ngaoe.

³Alia puhnou paoe, “Enou neletao hi chekhao-a paoe, toure hayu meamaipfü haipainou kukhe maitao hrülai jünou pove thoukou hie;

⁴daiolouzü kukhe maitao hrülainou puletao vei alao buyu hinou kou-lih payu taonou popeiwe, ana puhwo toure hayu hinou puh hi buyu hriloure na teiteinou pothou peire.”

⁵Alia rozümaitao kamainou Rathoki vanou süolouzü veishoyu chuh taonou ea posheela khaitouyu na taonou süsü daizhozhou southou ngah veisho khaitousa tea paoyu kisü, puhnou paoe,

⁶“Neletao nou ngao-a buyu haitao donou louzü, haihisü khaopho koulai moyu alinou kukhe li pei hi shoa chuh li-a khailai moyu teilesü velai.”

⁷Alia puletao nou puh hi noue, “Dou-apeio, sütaosü duki palai? Alia süna palaire touyu kisü dai shee soungaolai?”

⁸Jisu nou paoe, “Maitaliye panou neletaoye sümahta more donou leikeilo; daiolouzü mai alaosou Azhih hinou taveloua, ‘Esü puh-e!’ alia ‘Teilesü veloure!’ tea paolai. Ana puletao thaifüso.

⁹Alia neletao nou reih ea reihvei bvüroyu kho chouyu kisü, ngaopiwuso; daiolouzü sütaosü rai-a pavu zülai, ana akhai nasü sübü hinou mohie.”

¹⁰Süthai-a puhnou puletao hi paoe, “Teidei alinou kukhe teidei ali pei hi, alia vedei alinou kukhe vedei ali pei hi reih soulai.

¹¹Sükisü ngaopi shoyu nü sülai, alia buh takinou tokaayu ea sounou tyali palai; alia sükisü ratei vanou ngaopi-ngaohiyu ea shee adudu tyali ngaolai;

¹²Ana sütao teitei pamojü hinou puletao nou neletaoye niloua souvea-souholai. Puletao nou neletaoye rathobuh taohi ea hukhahi thoupeilai, alia Azhih donou neletaoye vemaitao ea teidei khomaitao nghojühi savelai.

¹³Sükua payusü neletaoye donou zhopaoh soure teile zhou aveili soulai.

¹⁴Südonou neletao nou mai hi dai chila peilaisa touyusü raia chodawu laimoe tea neletao le hinou la-a bulo;

¹⁵daiolouzü neletao vei ngaobamai taonou motoulou hoyu moa veivalou hoyu chipaotao ea ratsü sü Enou neletao hi peilai.

¹⁶Alia neletao pfüpuo, thaihou-jürai, tarai ea samai-khamai tao koute nou-a neletaoye sü maibah hi thoupeiwulai, alia neletao hronou kamaitaoye puletao nou southealai.

¹⁷Mai hrülainou neletaoye Azhih donou ngaoralai.

¹⁸Ana neletao pei hinou peishupo ali koutea halaimoe.

¹⁹Neletao vei shameayu sünanou neletao lah neletaoye khailu loulai.

²⁰“Ana Jerusalem ye reihmainou sühao louyu sü neletao nou ngaolouzü, sükisü puhye sü souhazhei laiyu teilesü ngheisho vere touyusü sülo.

²¹Sükisü Judea hi buyu puletaosü deichi taohi tutalou khaio, alia nuhdu hinou buyu puletaosü tavuzülou khaio, alia vakou nuhfü taohinou buyu puletao-a nuhdu nahi talou khaiso.

²²Daiolouzü rüthoukhai touyu teiteisü vete loure donou sütaosü khüh phouyu teithetaoe.

²³Teithe sütao kisü pou-pfüa buyu naotumaitao ea panou nahmaiye nao-a buyu pfümaitao donou daizhozhou ngaopisa! Daiolouzü deiphao hisü ngaopi pilai veashoyu ea maikhemai haitao pei hisü Ramai vei lekha-rarou nasü velai.

²⁴Puletao kamaitaoye sü khochenou daotheawulai, alia kukhemai taoye sü niloua tahrüh teitei hrohi süthai-savelai; alia tahrüh kukhe maitao teilesü chekhou mosa koutesü, tahrüh kukhemai taonou Jerusalem ye sü taisasawulai.

²⁵“Alia sükisü teinghi, khou, alia teivutao hinou shee tyali ngaolai, alia deiphao hisü zaidu vei pai-rao ea zaidzü houngkheyu kho hinou ngaopi souloua teidei teitei hisü vea-holai.

²⁶Deiphaohi pare sütao vanou choloua maikhe maisü ngaopinoupu veayule-a kaotalai; daiolouzü rateihi buyu khouko teiteiye sü puletao vei ludu hinou hulai bailai.

²⁷Alia sükisü Mai Nahpoutu nou khouko ea dushoyu khouko avanoupu teihao peinou taveyu sü puletao nou ngaolai.

²⁸Chuo sübüyu sheetao sü pare touyu kisü, zhushukhaio ea neletao pei pfüla khaio, daiolouzü neletaoye khailu peire sü ngheire.”

²⁹Süthaisü Jisu nou nada ali puletao hi paopeie: “Doushibehi ea kukhe süübe veishi hi zhukhaio;

³⁰neletao nou puletao vei sünghou lapayu ngaolouyu kisü, hou teile sü ngheire touyu sü neletao nou süwe.

³¹Sübütoua, shee haitao pa-a buyu neletao nou ngaolouyu kisü, Ramai Vedeisü ngheivere touyusü neletao nou sülo.

³²“Chekhao-a Enou neletao hi paowe, shee haitao teitei pamosasü maikha hainasü hata laimoe.

³³Raki alia deiphao hatalai, ana Achipaotao louzü hatakhai laimoe.

³⁴“Ana neletao lesü touzhi, shozhiyu hi ea deiphao hrü hainavei le choroyu hi thoupei khaiwu more donou moa teithe sünasü sho-rüh kua neletao pei hi sükhai moa velou more donou, neletao lah leikei-a bulo;

³⁵daiolouzü teithe sünasü deiphao buh teitei hinou hrüa buyu maikhemai hrülai pei hi velai.

³⁶Ana pare sütao teitei hinou tupa loure ea Mai Nahpoutu nghojühi lalou süre khouko buloure donou teile veishi hinou veachi paoyu noupu zhaihe-a bulo.”

³⁷Alia teithe tsüsü puhnou Rathoki hinou doupei-a bue, ana kheipha hisü puhnou vakouhi taloua Oliv tea kuyu deichi hinou ve chao-a bue.

³⁸Alia maikhemai hrülainou puh hinou puhvei chipao keiloure donou shohna tsüsü Rathoki hi tave-e.