Read Poumei Naga LUK 22 Bible Online

LUK 22 - Poumei Naga bible

LUK 22

¹Chuo Tachonüh tea kuyu raokonüh nasü ngheikoure.

²Alia napao adumaitao ea razhai dou-apei maitao nou maisouye piyu donou kheikheisoua Jisu ye southea loure bosü puletao nou phouwe.

³Süthaisü rozümai kiahaitao hrohinou ali soua buyu Iskariot tea kuyu Judas hisü Saitan nou louloure.

⁴Südonou Judasnou vakouhi süolouzü napao adumaitao ea rathoki khoyu adumaitao hi taloua kabüa puhnou Jisu ye sü puletao bah hi thoupei laisa touyu vanou kuloure.

⁵Alia puletao nou sasholoua puh hisü pousha peire donou paokoure.

⁶Südonou Judas-a aetoure ea süsü panou maisouye sükhaimoa puhye sü puletao bah hi thoupeire donou teile zhou aveisü phoushu tare.

⁷Sükisü Tachonüh vei zhaotouye posheela laiyu raokonüh teithesü veloure.

⁸Südonou Jisu nou Pitar ea Johan hi, “Eletao-a Tachonüh vaisü toure donou taho Eletaoye donou souda khaio,” tea paopeiwu-a seitare.

⁹Puhainou puh hi noue, “Nenou Ehye panou süsü dai kinou soudayu züpawe?”

¹⁰Puhnou puhaihi chila peie, “Zhukhaio, nehainou nuhdu nahi talouyu kisü mai alinou dzükhou ali poa nehaiye daolai; puhnou talouyu ki süna hisü nehai-a puh thaifüa taloukhaio,

¹¹alia ki süna paopu nahi, ‘Dou-apeionou nehi paowe, Enou Arozümai taoye koa Tachonüh vai toure kide nasü kahi bue?’ tea paokhaio.

¹²Alia puhnou nehai hi buh-züh bucheyu kipei kide alisü ngaopeilai; sühinou ha teitei sü soudalou khaio.”

¹³Alia puhai nou tave ha teiteisü Jisu nou puhaihi paopeiyu büa ngaoloure; alia sühinou puhai nou Tachonüh vaisü souda loure.

¹⁴Alia pha teile süsü velouyu kisü, Jisu nou sei-atamai taoye koa kou arübuh hinou buloure.

¹⁵Alia puhnou puletao hi paoe, “Enou veamo nghojü hinou neletaoye koa Tachonüh vai haina hai tounü shoa bure.

¹⁶Daiolouzü Enou neletao hi paowe, Ramai Vedei hinou süsü veteloumo koutesü Enou haisü toupu khailaimoe.”

¹⁷Süthaisü Jisu nou pai ali poloua ea Ramai hi kalo paowu-a paoe, “Haihai polouwo, alia haisü neletao hrohinou zhisho khaio.

¹⁸Daiolouzü Enou neletao hi paowe süolouzü chu shonou Ramai Vedei vemo koutesü Enou darkha rashi dzü sü shokhai laimoe.”

¹⁹Süthaisü puhnou rao nasü poloua Ramai hi kalo paoyu thaisü puhnou süsü soukhore ea süsü puletao hi pola pei-a paoe, “Haisü neletaoye donou peiyu Apfüphaoe. Eye li-choloure donou haisü soukhaio.”

²⁰Alia sübütoua vai süna toucheyu thaisü puhnou puletao hi pai nasü polapei-a paoe, “Neletaoye donou lapayu pai hainasü Azhe hinou paoshee souyu Ramai vei ashu vo nasüe.

²¹“Ana zhukhaio! Eye thoupeiyu puhsü haihinou Eye koa arübuh hinou bue!

²²Daiolouzü Mai Nahpoutu sü Ramai nou chodayu thaifüa tabailai, ana puhye thoupeiyu mai süna donou daizhozhou zhuvea leshisa!”

²³Alia sükisü puletao hrohinou thaohnou süsü soulaisa touyusü alinou lihi noushu loure.

²⁴Alia puletao hrohisü thaohye nou adukhana tea polaisa touyu vanou saovapa loure.

²⁵Alia puhnou puletao hi paoe, “Tahrüh kukhevei vemaitao louzü lah puletao vei maikhe maitao pei hi paopu souwe; alia puletao pei hi khoyu maitaoye nou zhuvea peilou sümai tea kuwe.

²⁶Ana neletaoye donou louzü sübü laimoe; süjüwo neletao hrohinou adukha nanou nakhana bülo, alia süthai peiyu puhnou kuvah soupeina bülo.

²⁷Daiolouzü arübuh hinou toure donou buyu nanou duhi ho kuvah soua buyu nanou duhie? Arübuh hinou buyu nanou mowu? Ana Ewo neletao hrohinou kuvah souyumai ali büa bue.

²⁸“Neletaowo louzü Avei vea-hoyu teiteihi Eye koa bukou tekhouyu taoe;

²⁹alia Apuonou Ahi vedei ali peikhai touyu büa,

³⁰neletaoye panou Avei Vedeihi Avei arübuh hinou tou-sho loure donou ea vebuhtao hinou bua Israelmai khü kiahaiye chi kuloure donou Enou neletao hi vedei ali peikhaitoue.

³¹“Simon, Simon! Zhukhaio, Saitan nou neletaoye southou büa chedoure donou kholoure,

³²ana nevei lüsü panou hata more donou Enou neye donou veachi paopeire. Alia nenou Ahi khaive puyu kisü, ne thaihou-jürai taoye soutsü peikhaio.”

³³Ana Pitar nou puh hi chila peie, “Mapao, Enou neye koa hukhahi ea athaihi tare donou souda-a bue!”

³⁴Jisu nou paoe, “Pitar, Enou nehi paowe, nenou Eye sümoe tea lüh asü paomo koutesü zhou houjünou khaolai moe.”

³⁵Alia sükisü Jisu nou puh rozümai taohi noue, “Enou neletaoye raichoki shavü, lekhabvü moa phikha panou pfümoa seitayu kisü neletao hi chemoyu hatalia buwu?” Puletao nou chila peie, “Hatalia chemoyu soumoe.”

³⁶Puhnou puletao hi paoe, “Ana chuo shavü buyu puhnou sünasü pfülo, alia lekhabvü bumai-a sübüa pfülo. Alia khoche hayu puhnou puh sahsü zholoua ali hülo.

³⁷Daiolouzü Enou neletao hi paowe, süolouzü sheeyu larübvü hinou, ‘Alia puhye sü mahsoumai taoye koa chothoure’ tea paoyu sü Ahinou vete vuzülai; daiolouzü Avanou rüthoukhai touyu sünasü chechenou veloure.”

³⁸Alia puletao nou paoe, “Mapao, zhukhaio! Haihi khoche ahai bue.” Alia puhnou puletao hi paoe, “Tai süre!”

³⁹Alia Jisu nou vakouhi tapaloua raichoki büa Oliv deichi hi tare; alia rozümai tao-a puhthaifü-a tare.

⁴⁰Alia puhnou buh sühi velouyu kisü puletao hi paoe, “Neletao athaohi loulou more donou veachi pao-a bulo.”

⁴¹Alia puhnou puletao hinou chuh laikoulou süpha tadou kouloua sühinou kou khou khüloua veachi paotare,

⁴²“Apuo, nenou züpae toulouzü, pai hainasü Ahinou potapeio; ana Enou li-choyu moa nenou li-choyu sü souloukhaio.”

⁴³Alia sühisü raki vanou rakivamai ali puh hi kouloua puhye sü kou soutsü peie.

⁴⁴Alia puhsü veayule-a lejünou khoupu-a veachi paoputa khaire; alia puh hudzü sü zhepo büa deiphihi kükou loure.

⁴⁵Alia puhnou veachi paoyu hinou shuloua rozümai taohi khaikoue ea puletao nou le vealeyu vanou zhia buyu sü ngaoloua,

⁴⁶puletao hi paoe, “Neletao daidonou zhia bue? Athaohi loulou more donou shuloua veachi paokhaio.”

⁴⁷Jisu nou sübüa chi paobu kinou, sühisü rozümai kiahai hrohinou ali soua buyu Judas tea kuyu mai sünanou maisouye sapoa tave loure. Puhnou Jisu ye kou münou mulai tea puh ngheikihi takoue.

⁴⁸Ana Jisu nou puh hi paoe, “Judas, nenou Mai Nahpoutuye münou muloua ngaobamai bah hi thoupei bailaiwu?”

⁴⁹Alia Jisu ye sühao-a buyu rozümai taonou paresü zhingaoloua puh hi noue, “Mapao, Ehnou khochenou poa daolaiwu?”

⁵⁰Alia puletao hrohinou mai alinou napao peichana kilaiye sü daopeia puh nou zhoulosü jadere.

⁵¹Ana Jisu nou paoe, “Haibüyu hai soupu khaiso!” Alia puhnou mai süna nousü deipei-a puhye sü souvei peire.

⁵²Süthaisü Jisu nou puhye süthai loulai tea taveyu napao adu maitao, rathoki khoyuhi peicha maitao, ea tsümai taohi paoe, “Maivei saotoumai aliye nilaiyu büa khoche ea süda poa neletao tavewu?

⁵³Teithe tsünou Enou neletaoye koa rathoki hinou buyu kisü, neletao nou Eye niloure halia soumoe. Ana chu haisü neletao vei pha nasüe, alia teizhivei khoukonou tukha-salaiyu teile süe.”

⁵⁴Süthaisü puletao nou Jisu ye niloure ea puhye sü süthaipoa napao peichana kihi save; alia Pitar nou adou konou thaifüa laiwe;

⁵⁵alia puletao nou kijü toutsü hinou mei souloua kou koa buyu hisü Pitar-a puletao hrohinou kou buloure.

⁵⁶Alia kilai loumaina alinou Pitar nou mei voua buyu sü ngaoloua puhye sü pheteiloua paoe, “Mai haina-a Jisu ye koa laiwe!”

⁵⁷Ana Pitar nou süsü baloua paoe, “Naotupai, Ewo puhye-a sümoe.”

⁵⁸Phajü thaisü kukhemai alinou puhye ngaoloukhaia paoe, “Ne-a puletao hrohinou alie!” Ana Pitar nou chila peie, “Mainare, E moe!”

⁵⁹Alia teilecho alipha thaisü kukhemai alinou bakhao-a paoe, “Veimosoua mai haina-a puhye koa laiwe; daiolouzü puhsü Galilee himai alie.”

⁶⁰Ana Pitar nou chila peie, “Mainare nenou daiye paosa touyu sü Enou sümoe!” Alia sübü hinou puhnou chi paobebu kinou houjünou khaoloure.

⁶¹Sühinou Mapao nou reiveloua Pitarye zhutei loure. Sükisü Pitar nou Mapao nou puh hi paopeikhai touyu, “Zhou houjünou khaomo jühinou nenou Eye lüh asü koute balai,” touyu chipao nasü liloure.

⁶²Sühinou puhsü vakouhi tapaloua shochesoua kraloure.

⁶³Chuo Jisu ye khoa buyu maitao nou puhye sü konü peiwu-a dapeire.

⁶⁴Alia puletao nou puh nghisü sahnou zhüloua puh hi noue, “Neye dayu nahai thaoh-e? Paosükhaio!”

⁶⁵Alia puletao nou kukhe chi alaosou puh pei hi paokhai peiwu-a puhye sü sou-ahrao peie.

⁶⁶Teinou thelouyu kisü maisouvei tsümai me süolouzü napao adu maitao ea razhai dou-apeimai taosü vedzü loure; alia puletao nou puhye sü puletao vei tsümehi saveloua paoe,

⁶⁷“Ne Khristae toulouzü, Eletao hi paongaokhaio.” Ana puhnou puletao hi paoe, “Enou neletao hi paolouzü, neletao nou Eye louchepei laimoe;

⁶⁸alia Enou neletao hi chi noulouzü neletao nou chila peilaimoe.

⁶⁹Ana chu shonou Mai Nahpoutu sü Ramai khoukovei bah zhoulova hinou butalai.”

⁷⁰Alia puletao hrülainou paoe, “Sütoulouzü, ne sü Ramai Nahpoutuwu?” Puhnou puletao hi chila peie, “E-e tea neletao nou paowe.”

⁷¹Alia puletao nou paoe, “Eletao nou kukhe zhopaoh phoupure dai bue? Eletao nou süsü Eletao lah puh mü vuzü hinou chouloure!”