Read Poumei Naga LUK 23 Bible Online

LUK 23 - Poumei Naga bible

LUK 23

¹Süthaisü puletao vei me teiteinou shuloua Jisu ye sü Pilat nghojühi save loure.

²Alia puletao nou puhpei hisü mah paodukhaia paoe, “Mai hainanou Eh tahrüye sümah tayu, Ehye Kaisar hi kikha peire hinou nuyu alia puhlah nou Khrista Veo nasüe tea paoyu sü Ehnou ngaoloure.”

³Sükisü Pilatnou puh hi noue, “Ne Jihudimai veowu?” Jisu nou puh hi chila peie, “Süsü nenou paowure.”

⁴Süthaisü Pilatnou napao adu maitao ea maisouhi paoe, “Enou mai haina hinou ha mahlia ngaolou moe.”

⁵Ana puletao nou khoupua paoe, “Puhnou Judea teidei teitei hinou doupeia maikhe maiye soubvü peiwe. Puhnou Galilee hinou shupoa chuo buh haihi koute koure.”

⁶Pilat nou süsü choulouyu kisü, “Mai haina hai Galilee hi maiwu?” tea noue.

⁷Alia puhnou Jisu hai Herod vei khakhe hinou hrüyu mailie touyu sülouyu kisü, puhnou puhye sü Herod hi seive, daiolouzü Herod-a süpha kisü Jerusalem hi bue.

⁸Herod nou Jisu ye ngaolouyu kisü puh lesü sasho loure daiolouzü puhnou puh kosü raichoki nou choulouyu donou teile phasho puhye sü ngaonüshoa bure, alia puhnou khupa vahtao soua panou puhye ngaolai mosa tea tsü choda-a bue.

⁹Südonou puhnou Jisu hi chi alaosou noue; ana puhnou chila lia peimoe.

¹⁰Alia napao adu maitao ea razhai dou-apei maitao nou tashu laloua Jisu pei hi sü soutaosoua mah dukhai loure.

¹¹Alia Herod nou puhvei reihmai taoye koa Jisu ye sü ngaophou khaimoa konü peire; süthaisü puletaoye panou puh hisü veishoyu zaoduna ali noupeiwu-a puhye sü Pilat hi seikhai vere.

¹²Alia teithe süzhounou Herod ea Pilat sü samai souloure, daiolouzü süjühi louzü puhaisü alinou liye ngaoba-a bue.

¹³Süthaisü Pilatnou napao adumaitao, teidei khomaitao ea maisouye kuve dzüloua,

¹⁴puletao hi paoe, “Maikhe maiye sümah peiwe tea neletao nou mai hainaye Ahi savewe; alia zhukhaio, Enou neletao nghojünou puhye zhai zhuyu kisü, Enou mai haina hinou neletao nou puh pei hi dukhaiyu mah lia ngaolou moe;

¹⁵alia Herod koutenou-a ngaolou moe, daiolouzü puhnou puhye sü Eletao hi seikhaive peire. Zhukhaio, thai züdouyu mah lia puhnou soumoe.

¹⁶Südonou Enou puhye souveasho peiwu-a phapeilai.”

¹⁷(Chuo Tachonüh sasü Pilatnou puletaoye donou hukhahi buyu mai aliye phapei vuzüyu zhai bue.)

¹⁸Ana maisou teiteinou shusouloua “Mai hainaye southeawo! Eletaoye donou Barabbas ye phapeio!” tea shaloure.

¹⁹Barabbasye nuhdu hi chi bvüpayu ea maiye southeawuyu sünavei vanou hukhahi thoukhai toue.

²⁰Pilatnou Jisu ye phapeinüa maisouhi shusoua paopue.

²¹Ana puletao nou shusoua shada khaire, “Puhye veatheawo! Puhye veatheawo!”

²²Pilat nou puletao hi lüh asü chena koute paoe, “Daidonoue, puhnou dai ashi soure? Enou puh hinou thai züdouyu mahlia ngaomoe; südonou Enou puhye souveasho peiwu-a pha peilai.”

²³Ana puletao nou pai-rao kusholoua puhye sü veatheawo tea khokhai khaire. Alia puletao vei pai-rao sünanou akhai hisü koloure.

²⁴Südonou puletao kho thaifüa soupeire donou Pilatnou chi lükou peire.

²⁵Alia puhnou chi soubvü peiyu ea maiye southeawuyu vanou hukhahi thoukhai touyu, puletao nou züpayu mai sünaye sü puhnou phapeire; ana puhnou Jisu ye puletao vei züpa panou souloure donou thoupeire.

²⁶Alia puletao nou puhye süthaipoa tapayu kisü, nuhfü hilonou taveyu Kurini himai Simonye puletao nou daoloua niloure, alia Jisu thailonou kros nasü panou pfütare donou puh vahi süsü pokhai peire.

²⁷Alia sühisü maisou alaosou ea Jisu ye donou do-a khao khoua kra-a laiyu naotumai taoli puhthai füa tawe.

²⁸Ana Jisu nou puletao hi reiveloua paoe, “Jerusalem hi naotumaitao, Eye donou krawuso, ana neletao lah donou ea neletao vei nahmaitao donou kraloubaio.

²⁹Daiolouzü zhukhaio, maikhe mainou ‘Nah hayu, nah hrükhai moyu, alia nahmaiye panou naokhai moyu naotumai taosü daizhozhou rako veisa!’ tea paolaiyu teithe taosü velai.

³⁰Sükisü puletao nou deichidu taohi, ‘Eh pei hi dukou loupeio!’ alia deichitai taohi, ‘Eh ye mikou paopeio!’ tea paoshu talai.

³¹Daiolouzü puletao nou hri-a buyu süübehi sübüyu vah taosü soupei louzü, süübe athaina hiwo dai palaisa?”

³²Alia ashi vah souyu kukhe mai ahaiye-a Jisu ye koa southeare donou süthai satare.

³³Alia puletao nou “Kalvari” tea kuyu buh hi tave louyu kisü, sühinou puletao nou puhye sü kros vanou veatheare ea ashi vah souyu sühaiye sü aliye puh bahkha zhoulohi ea kukhe sünaye puh bahkha nalohi nou veatheare.

³⁴Alia Jisu nou paoe, “Apuo, puletaoye khaipeio! Daiolouzü puletao nou dai sousa touyusü puletao nou sümoe.” Alia puletao hrohinou rakovei zhua puhvei sahnü taosü zhiloure.

³⁵Alia maikhemai taonou la-a zhua bue; ana Jihudimai peichamai taonou puh hisü konüa paoe, “Puhnou kukhe maiye khailu peiwe; puh hai Ramai nou dopawuyuna Khristae toulouzü puhlah puhye panou khailulouwo!”

³⁶Alia reihmai taonou-a puh ngheikihi takouloua puh hi khairouyu darkha zhaohnou popeia puhye konüa paoe,

³⁷“Ne sü Jihudimai veo-e toulouzü nelah khailulouwo!”

³⁸Alia puh peikou hisü, “Haisü Jihudimai Veo nasüe,” tea rüthoukhai touyu chahkhao nasü-a bue.

³⁹Alia kros vahinou khiyu khaitoua buyu ashi souyu maisühai hinou ali nanou Jisu ye ngaophou khaimoa paoe, “Newo Khrista süna mowu? Nelah neye-a Ehye-a khailu peilo!”

⁴⁰Ana kukhe alinanou puh hi tukhayu noupu züpeia paoe, “Newo Ramaiye pimowu? Daiolouzü ne-a mah-e tea chi lükou peiyu hisü kheihao-a zha ngaozhobaie.

⁴¹Alia Ahaiwo louzü chechenou ngaozüe; daiolouzü Ahaiwo Ahainou sou-pfüyu vah sütaovei ngaozüyu buusü ngaobaie; ana mai hainawo ha mahlia soumoe.”

⁴²Alia puhnou Jisu hi paoe, “He Mapao, nenou nevei vedeihi veyu kisü Eye li-chopeio!”

⁴³Jisu nou puh hi paoe, “Chekhaoa, Enou nehi paowe, zhouh teithe hinou nenou Eye koa Paradise hinou ve bulai.”

⁴⁴Alia sükisü heako teilecho kiahaipha tare, alia teidei teitei hisü koukhe teilecho asü koutesü maitei loure,

⁴⁵daiolouzü teinghisü vakhai more, alia Rathokihi sah hakhai touyu nasü tsühle hinou pavai tare.

⁴⁶Sükisü Jisu nou pai kusholoua, “Apuo, nebah hi Arakosü thoupeire!” tea paoe. Alia sübüa paowu-a puhsü thaire.

⁴⁷Chuo sübüa payusü reihmai kaihpei chananou ngaolouyu kisü, puhnou Ramaiye sholoua paoe, “Veimosoua mai haina hai mahlia hae!”

⁴⁸Alia süsü zhure donou sühinou vedzüa buyu maikhemai hrülainou sübüa payusü ngaolouyu kisü, le veasholoua puletao sü khao khoua ki hilo khaitare.

⁴⁹Alia puhye sükhoyu maitao hrülai ea Galilee hinou puhthai füa taveyu naotumaitao nou sütao teiteisü adoukounou la-a zhua bue.

⁵⁰Chuo sühisü tsümehi louyu Josef tea kuyu veishoyu ea checheyu mai ali bue.

⁵¹Puhwo tsümehi loukhai-a puletao nou li-choyu ea puletao vei vah hisü aetou moe. Puhsü Jihudimai vei nuhdu Arimathea hinou veyu ea Ramai Vedei vere zhia buyu mai alie.

⁵²Mai hainanou Pilat hi taveloua Jisu pfüphao sü kholoure.

⁵³Süthaisü puhnou pfüphao nasü pokouloua jüyusah alinou süsü pozüre, alia raichoki maitaliye povukhai moyu chuhrao hinou raothouloua soukhai touyu khüh hinou puhye sü pothou khaire.

⁵⁴Teithe süsü soudayu teithe-e, alia Soteithesü ngheitei koure.

⁵⁵Alia Jisu ye koa Galilee hinou taveyu naotumai taonou Josefye koa taveloua khüh alia puhvei pfüphaosü kabüa pokhairesa touyusü ngaoe.

⁵⁶Süthaisü puletao nou khaiveloua kainü veiyu na ea vasouhi noure kaivei theadzü sü souda loure. Alia Soteithe kisü puletao nou chikha thaifüa souloure.