Read Poumei Naga LUK 24 Bible Online

LUK 24 - Poumei Naga bible

LUK 24

¹Ana Rathozhou shohna hisü naotumai taonou puletao nou soudakhai touyu kainüvei na taosü poloua khüh hi tave.

²Alia chuh nasü khüh hinou phaolai tawuyu sü puletao nou ngaoloure,

³ana puletao nou talouyu kisü Mapao Jisu vei pfüphaosü ngaolou moe.

⁴Alia puletao nou süvanou tsü-bo phouha-a la-a buyu hinou, zhukhaio, peivavayu sahnü nou bah-nouyu mai ahaisü sükhaimoa puletao ngheiki hinou la-a buloure;

⁵alia puletao nou piyule-a puletao pahsü deiphihi pfüshoua buyu hinou mai sühainou puletao hi paoe, “Neletao nou daidonou thaimai hrohinou ahrimai naye phouwe?

⁶Puhwo haihi hare, ana puhwo hrishu loure! puhnou Galilee hi bubuki neletao hi kabüa paopeikhai tousa touyusü likhaio,

⁷süolouzü, ‘Mainahpoutuye sü mahmai bah thoupeiwu vuzülai ea kros vanou veathealai, alia teithe asü kisü hrishulai’ tea paokhaitoue.”

⁸Sühinou puletao nou puhvei chipaosü liloure,

⁹alia khüh hinou khaiveloua sütao teiteisü puletao nou rozümai kiahai taohi ea kukhe hrülaihi paongao peire.

¹⁰Puletao sü Magdalini Meri, Joanna ea Jems pfü Meri-e; puletao nou kukhe naotumai taoye koa tave chi sütaosü sei-atamai taohi paopeie.

¹¹Ana naotumai taonou paoyu chi sütaosü puletaoye donou chaochao soua müroyu büloua puletao nou puletaoye sü louche peimoe.

¹²Ana Pitar nou shuloua khüh hi tuvere; alia puhnou pei pfüna kouloua zhulouyu kisü jüyu sahtao likheithe bubaiyu sü ngaoloue. Sükisü puhnou dai paresa tea khupaloua kihi khaivere.

¹³Alia zhukhaio, teithe süzhou hinou puletao hrohinou mai ahaisü Jerusalem hinou kaacho anaipha doua buyu Emus tea kuyu nuh buh hilo tave-a bue,

¹⁴alia puhai nou pawuyu sütao teitei vanou alinou lihi pha-kua laiwe.

¹⁵Puhainou sübüa chipha-a ea noukou-noukhe-a ta-a buyu hinou Jisu puh lahnou ngheikihi takouloua puhaiye koa tazho loure.

¹⁶Ana puhye panou sülou more donou puhai ngheithousü soukure.

¹⁷Alia Jisu nou puhaihi paoe, “Nehainou talukhu alinou lihi pha-kuyu sü dai chi-e?” Sühinou puhaisü levea shoyu zhu pfüa laha loure.

¹⁸Alia puhai hronou Kleopas touyu nanou puh hi nou-a paoe, “Jerusalem hi veive-a buyu veihmaitao hronou sühi zhovunou pa-a buyu chitao sümoyu sü ne likhei baiwu?”

¹⁹Puhnou puhaihi noue, “Daidai pare?” Puhai nou puh hi chilapeie, “Nazareth hi Jisu vanoue, puh hai Ramai ea maikhemai hrülai nghojünou khupa vah souyu ea chipao hinou khouko bushoyu rachi paolamai alie,

²⁰alia Eletao vei napao adumaitao ea teidei khomai taonou puhyesü thaire vei chi lükou peire donou thoupeiwu-a puhyesü kros vanou veatheare.

²¹Ana Ehnou puhyenou Israel maitaoye khaipa peiloure nasüe tea zhia bubaie! Sütao veishi peinou sübüa payusü chuo teithe asüna hi koure.

²²Süthe baimoa, Eh mehi naotumai kamai taonou Ehye tsü-bo souha peie. Puletao nou shohna hinou khüh hi tahoe,

²³ana puhvei pfüphao sü ngaolou moe; alia puhwo hria bue tea puletao hi paoyu rakivamai taoye puletao nou zhokou nou ngaoe tea puletao nou khaiveloua paoe.

²⁴Alia Ehye koa laiyu kamai taonou khüh hi tahoe, alia naotumai taonou paoyu bütoua süsü tave ngaoloure; ana puhye louzü puletao nou ngaolou moe.”

²⁵Sühinou puhnou puhaihi paoe, “O voyu ea rachi paolamai taonou paopawuyu tao teitei louche nashoyu maitao!

²⁶Khristaye donou haitao teitei veayu daoloua puhvei khouko ava buh hi louyu phamowu?”

²⁷Alia Moses vei larübvütao ea rachi paolamaitao hrülainou rükhai touyu taohinou shupoa, puhnou puhai hisü lah puh vanou sheeyu larübvü teitei hinou paokhai touyu taosü paodapa sheetoua doupeie.

²⁸Alia puhai nou tavere nuh hisü puletao nou takou ngheiyu kisü Jisu sü adoukou tare büa souloure;

²⁹ana puhai nou puhye nuteiloua, “Ne Ahaiye koa bubaio, daiolouzü chuo koukhe loure ea teia mailoure,” tea paoe. Südonou puhnou puhaiye koa chaoloure donou sühi taloure.

³⁰Alia puhnou puhaiye koa toure donou kou bulouyu kisü, puhnou raokhao nasü poloua hapeire ea süsü soukholoua puhai hi peire.

³¹Sühinou puhai nghisü houpaloua puhai nou puh zhusü shiloure; ana puhsü puhai nghojünou hazhei tare.

³²Südonou puhai alinou lihi paoe, “Puhnou ludu hinou Ahaihi larübvütao hinou paodapa-a doupei buki Ahai lekhe hisü mei keihre soumowu?”

³³Alia puhai nou pha sübü hinou shuloua Jerusalem hi khaivere; alia rozümai kialitao ea puletaoye koa buyu taonou vedzüloua,

³⁴“Mapao hai chechenou hrishu loure, alia Simon hi-a ngaopeire!” tea paoyusü puhai nou tave ngaoloure.

³⁵Süthaisü ludu hinou dai pasa ea puhai nou Mapaoye sü puhnou raokhao soukhoyu hinou kabüa sülousa touyusü puhai nou puletao hi paosü peire.

³⁶Alia puhai nou sübüa pao-a buyu hinou Jisu puh lahnou puletao hrohi tave lahaloua puletao hi paoe, “Neletao hi kaonayu sü bulou theo!”

³⁷Ana puletao nou rako aliye ngaore tea choloua pithou khupa souloure.

³⁸Sühinou puletao hi paoe, “Neletao daidonou ngaopiwe, alia daidonou neletao le kiwe?

³⁹Abah ea Aphisü zhukhaio. Haisü E vuzübaie. Eye kou deiloua zhukhaio; daiolouzü Avei vasou ea rao buyu sü neletao nou ngaoyu büa rako veiwo hae.”

⁴⁰Alia puhnou sübüa paoyu thaisü puh bah ea puh phisü puletao hi pongaoe.

⁴¹Alia puletao nou le saleyu vanou louche louhoa ea khupa-a buyu hinou puhnou puletao hi noue, “Haihi neletao vei hatalia toure donou bubumoe?”

⁴²Sühinou puletao nou puh hi roukhai touyu khahkih vali popeie,

⁴³alia puhnou süsü poloua puletao nghojünou touloure.

⁴⁴Süthaisü puhnou puletao hi paoe, “Enou neletaoye koa bubu kinou neletao hi Enou paopeikhai touyu chipao sü haitaoe, süolouzü Avanou Moses vei razhai hinou, rachi paolamai taovei larübvü ea lou larübvü hinou rüthou khai touyu teiteisü vete vuzülai.”

⁴⁵Sükisü puletaoye panou sheeyu larübvü taosü süloure donou puhnou puletao vei tsü kikhusü houpeire,

⁴⁶alia puhnou puletao hi paoe, “Khrista hai vea vuzülai ea teithe asü kisü athai hinou hrishulai,

⁴⁷alia Jerusalem hinou shupoa tahrüh hrülai hisü puhzhih hinou le daloure ea mah khaipeire vei kosü paodouta vuzülai tea rüthou khaitoue.

⁴⁸Neletaowo louzü haitao teiteivei zhopaoh soure maitaoe.

⁴⁹Alia zhukhaio, Apuonou peilai tea paopeikhai touyu nasü Enou neletao hi seive peilai; ana reikonou kou neletaoye khoukonou züpeimo koutesü nuhduna hinou chao-a buwo.”

⁵⁰Süthaisü puhnou puletaoye nuhduna hinou sataloua Bethani ngheikihi savere, alia sühinou puh bahsü laloua puletaoye hapeie.

⁵¹Alia puhnou puletaoye hapeia buyu hinou, puhsü puletao hinou rataloua, rakihi sakhere.

⁵²Alia puletao nou puhye sü tholoua, sashoa Jerusalem hi khaivere,

⁵³alia puletao nou Rathoki hinou tobai soumoa Ramaiye soushoa bue.