Read Poumei Naga LUK 3 Bible Online

LUK 3 - Poumei Naga bible

LUK 3

¹Tiberia nou Veduwo soua hrüyu po kiangou chenahi, Pontia Pilat nou Judea vei Teideikhowona soua bubuki, Herod nou Galilee hi veo soubuki, alia puh thaihou Philip nou Iturea ea Trakhonitis teideihi veo soubuki, Lusania nou Abilene hi Veo soua bubuki,

²alia Annas ea Kaipha nou napao peichamai soua buyu teile kisü, rekounou Zekharia nahpoutu Johan hi Ramai vei chipao sü veloure.

³Südonou puhnou Jordan reipehi buyu teidei teitei hi taloua mah khailu peire donou le dalouyu vei dzükhao daloure vanou ko paodou tare.

⁴Haisü Isaiah rachi paolawo nou paoyu puhvei larübvühi rüthouyu büe: “Rekounou kamainou shawe, ‘Mapao vei ludu nasü soudalo; Puhvei ludu taosü souzülo!

⁵Deithou teitei sü pothou phoulai, alia deichi ea deichidu teiteisü ponawulai; khiyu ludu taosü pozülai, alia chimoyu thou-tao teitei sü maichiwulai;

⁶alia maitya hrülainou Ramai vei khailu peiyu sü ngaolai!’”

⁷Südonou puhnou puh hinou dzükhao dalaitea taveyu maisoutao hi paoe, “Oh nghou tao-nah khemai! Neletaoye thaohnou vere Ramai vei achana hinou tutalouwo tea tukha peiwe?

⁸Neletao hai neletao vei mah hinou le daloure touyu pongaore vah taonou soukhaio. Alia neletao lah neletao hrohinou, ‘Abraham hai Eletao vei puo-paoe’ tea paoshuwuso; daiolouzü Enou neletao hi paowe, süolouzü Ramai nou chuh toutu haitao vanou Abraham hi puhvei tyaonah maitao panou palou süe!

⁹Chukoutea süübetao mahi marei sü daothou khaitoua bue; südonou avei rashi shimoyu süübe tayesü vikaowu-a meihi khilaithouwu baiwe.”

¹⁰Alia maikhemai taonou puh hi noue, “Sübülouzü Ehnou dai soulai?”

¹¹Puhnou puletao hi chila peie, “Zao ahai buyu puhnou halia hayu puh hisü zhikhaio; alia touso buyu puh-a sübü-a soukhaio.”

¹²Kikha khayumai kamai-a dzükhao daloure donou tave, alia puletao nou puh hi noue, “Dou-apeio, Ehnou dai soulai?”

¹³Alia puhnou puletao hi paoe, “Khada peikhai touyu jünou kou-a khapuso.”

¹⁴Süthai-a reihmai kamaitao nou puh hi noue, “Sübülouzü Ehwo dai soulai?” Puh nou puletao hi paoe, “Maitali hinou-a soupi-a thou-sha saowuso, moa mada-a maitaliye mah dukhaiso, alia lah neletao vei zho sünanou khaloubaio.”

¹⁵Ana maikhe mainou zhishoa khoa buyu hinou ea maikhemai hrülainou puletao lehinou Johanye nou Khrista moma tea cho-a buyu hinou,

¹⁶Johan nou puletao hrülaihi chila peie, “Enou neletaoye dzünou dzükhao dapeie; ana Ajünou khouchih shoyu puhsü laire. Esü puhvei phikha rai pheipayu koutea züdou moe. Puhnou neletaoye Rako Mashinou ea meinou dzükhao dapeilai.

¹⁷Thaihi thoutaosü sousheeloua southou taosü puhvei thoupao hi pove dzüloure donou puhbah hi thouhü bue; ana puhnou thouba taosü ngheikhailai moyu meihi pothou deilai.”

¹⁸Sübüa, kukhe süpeiyu chipao taolinoupu puhnou maikhemai hisü ko avei nasü paodou peie.

¹⁹Ana Herod Veoye puhvei thaihou chapfü Herodiaye nalouyu vanou ea puhnou souyu kukhe vah ashitao vanou Johan nou tukha-a züpeiyu donou,

²⁰Herod nou ashi sütao veishi pei hisü haina-a thoupure, süolouzü puhnou Johanye hukhahi panou pothou bere.

²¹Maikhe maiye dzükhao dapeiyu thaisü, alia Jisu-a dzükhao daloua veachi pao-a buyu hinou, rakisü houpare,

²²alia Rako Mashisü pfüzhonou khao büa kou puh pei hi taoloure. Alia raki hinou pai alisü haibüa shakoue, “Ne sü Enou leshi shoyu Anah Poutue. Enou nehisü rukha shore.”

²³Jisu nou puhvei vah soushu tayu kisü, puhsü po shirou pha pare. Puhsü (maikhe mainou choyu thaifüa) Josef nahpoutue, puh puosü Heli toue,

²⁴puh puosü Mathat toue, puh puosü Levi toue, puh puosü Melkhi toue, puh puosü Jannai toue, puh puosü Josef toue,

²⁵puh puosü Matathia toue, puh puosü Amos toue, puh puosü Nahum toue, puh puosü Esli toue, puh puosü Nagai toue,

²⁶puh puosü Maath toue, puh puosü Matathia toue, puh puosü Semein toue, puh puosü Josekh toue, puh puosü Joda toue,

²⁷puh puosü Joanan toue, puh puosü Rhese toue, puh puosü Zerubabel toue, puh puosü Salathiel toue, puh puosü Neri toue,

²⁸puh puosü Melkhi toue, puh puosü Addi toue, puh puosü Kosam toue, puh puosü Elmadam toue, puh puosü Er toue,

²⁹puh puosü Joshua toue, puh puosü Eliezar toue, puh puosü Jorim toue, puh puosü Mathat toue, puh puosü Levi toue,

³⁰puh puosü Simeon toue, puh puosü Judah toue, puh puosü Josef toue, puh puosü Jonam toue, puh puosü Eliakim toue,

³¹puh puosü Melea toue, puh puosü Menna toue, puh puosü Matatha toue, puh puosü Nathan toue, puh puosü David toue,

³²puh puosü Jesse toue, puh pousü Obed toue, puh puosü Boaz toue, puh puosü Salmon toue, puh puosü Nahshon toue,

³³puh puosü Amminadab toue, puh puosü Admin toue, puh puosü Arni toue, puh puosü Hezron toue, puh puosü Perez toue, puh puosü Judah toue,

³⁴puh puosü Jakob toue, puh puosü Isak toue, puh puosü Abraham toue, puh puosü Terah toue, puh puosü Nahor toue,

³⁵puh puosü Serug toue, puh puosü Reu toue, puh puosü Peleg toue, puh puosü Eber toue, puh puosü Shelah toue,

³⁶puh puosü Kainan toue, puh puosü Arphasad toue, puh puosü Shem toue, puh puosü Noha toue, puh puosü Lamekh toue,

³⁷puh puosü Methuselah toue, puh puosü Enok toue, puh puosü Jared toue, puh puosü Mahalaleel toue, puh puosü Kainan toue,

³⁸puh puosü Enosh toue, puh puosü Seth toue, puh puosü Adam toue, puh sü Ramai nahpoutue.