Read Poumei Naga LUK 4 Bible Online

LUK 4 - Poumei Naga bible

LUK 4

¹Alia Jisusü Rako Mashinou phoupfüa Jordan hinou khaitare, alia Rakonou süthaipoa rekouhi tare,

²sühinou puhye sü teithe raidaisü rashi nanou thaoe. Alia teithe sütao hisü puhsü halia toumoe, südonou teithe sütao cheyu kisü puhsü houre.

³Rashi nanou puh hi paoe, “Nehai Ramai Nahpoutue toulouzü chuh haina hisü raokhao daloukhaio tea kharochi peikhaio.”

⁴Ana Jisu nou puh hi chila peie, “Haibüa rüthoure, ‘Emai nou raokhao likheinou hrilouhoe.’”

⁵Süthaisü rashi nanou puhye sü kuyu buhhi sapaloua nghiphei ali hinou deiphao vebuh teiteisü puh hi pongaoe,

⁶alia haibüa puh hi paoe, “Haitao teiteivei ea kini veishisü Enou nehi peilai, daiolouzü haitao teiteisü Ahi thoupeiwure, alia sünasü Enou peinüyu mai talihi peilou süe.

⁷Südonou nenou Eye khurü louzü, sütaosü nevei soukhailai.”

⁸Alia Jisu nou puh hi chila peie, “Haibüa rüthoure, ‘Nenou ne Ramai Mapaoye khurülai ea nenou puhye likheithe kuvah soubailai.’”

⁹Süthaisü rashi nanou puhye Jerusalem hi saveloua puhye sü Rathoki kipei dukhahi sapa khaire, alia puh hi paoe, “Nehai Ramai Nahpoutue toulouzü, nelah buh haihinou chokoukhaio.

¹⁰Daiolouzü haibüa rüthoure, ‘Ramai nou puhvei rakivamai taohi neye soutaosoua khotou loure donou kharochi peilai,’

¹¹alia ‘puletao nou puletao bah nou neye polah peilai, sübüa nephi koutea panou chuh hinou zhulaimoe.’”

¹²Ana Jisu nou puh hi chila peie, “Sheeyu larübvü hinou haibüa paore, ‘Nenou ne Ramai Mapaoye zhai zhuwulaimoe.’”

¹³Alia rashi nanou Jisu ye thaolou veisa thaowuyu thaisü, kukhe zhou avei ngaomosa koutesü puhnou puhye sü thaowu-a tare.

¹⁴Süthaisü Jisu sü Rako Mashi vei khouko nou phoupoa Galilee hi dakhai vere, alia teidei sühi buyu buh teitei hisü puh vanou kubou loure.

¹⁵Alia puhnou puletao vei rathobuhtao hinou doupeia maikhemai hrülainou puhye sü paosho loure.

¹⁶Süthaisü Jisusü puhnou hrüpayu nuh Nazareth hi tavere; alia Soteithe kisü puhsü puhzhai thaifüa rathobuh hi tare. Alia puhnou sheeyu larübvü nasü phoure donou lashu loure;

¹⁷alia sühinou Isaiah rachi paolana vei larübvü sü puh hi popeire. Puhnou larübvü sünasü houpaloua haibüa rüthoukhai touyu buh hisü phouve ngaoloure,

¹⁸“Mapao vei Rakosü Apei hi bue, daiolouzü puhnou Eye sü toure hamai hi ko avei paodou peire donou dopa peire. Puh nou Eye sü hukhakihi bumai taohi mado souyu ea nghichamai hisü nghi ngaolouyu sü shangao peire, sovea-souhowuyu maiye phapeiyu,

¹⁹alia Mapao vei aetou peiyu po nasü shangao peire Eye seipeire.”

²⁰Alia puhnou larübvü nasü shikhaiwu-a sünasü sühi vahlaimai hi peida khaire, alia kou buloure; alia rathobuh hi buyu mai hrülai nou puh hisü phetei loure.

²¹Alia puhnou puletao hi paoe, “Neletao nou choua buyu hinou zhouh sheeyu larübvü vei chipao hainasü veteloure.”

²²Alia puletao hrülainou puh vanou paoveisho loure ea puh mü hinou paopayu zhuvea vei chipaotao vanou khupaloua haibüa puletao nou paoe, “Puh sü Josef nahpoutu mowu?”

²³Puhnou puletao hi paoe, “Veikhaimoa neletao nou Ahisü haibüa paopawuyu tsüchi nasü paolai. ‘Pou-apeio, nelah souveilouwo! Alia paokhailai, Nenou Kapernahum hinou souloue tea Eletao nou choulouyu vah taosü lah nevei nuhbuh hia soungaokhaio.’”

²⁴Puhnou paopukhaie, “Chekhaoa Enou neletao hi paoe, rachi paolamai taliye lah puh vei nuhbuh hisü sasa-a shepei tamoe.

²⁵“Ana cheche nasü Enou neletao hi paowe, süolouzü Elijah phaova hisü po asü-a khou arou raki hinou tei rükoumoa teidei teitei hisü tokaa-a buyu kisü Israel maitao hrohisü meamaipfü alaosoua bue.

²⁶Sütoukhaia Elijahye sü puletao maitalihi-a seimoe anou Sidon teideihi buyu Zarephath hi meamaipfü sünahi likhei seivebaie.

²⁷Alia Elisha rachi paolawona teile hisü Israel maitao hrohisü loukhaora soumai alaosou bue; sütoukhaia Suria himai Naaman likhei baimoa kukhemai taliye sü souvei peimoe.”

²⁸Rathobuh hi buyu mai hrülainou chi sünasü chouloua rarousho loure.

²⁹Alia puletao nou tashuloua Jisu ye sü nuhdubuh hinou hutawu-a puhye sü peishoua puletao vei nuhfü deichipei dukhana hinou polaithouwure donou sapare.

³⁰Ana puletao hrohinou tachotaloua puhsü tare.

³¹Süthaisü Jisu nou Galilee hi buyu Kapernahum nuhdu hi takouloua sühinou Soteithe kisü maikhe maiye doupei tare;

³²alia puletao veishisü puhnou doupeiyu hinou khupasho loure, daiolouzü puhnou khoukonou pu doupeiwe.

³³Alia rathobuh sühisü sheemoyu rashi rakonou louyu mai ali bue; alia puhnou shusoua raopaloure.

³⁴“Oh! Nazareth hi Jisu, nenou Ehye koa dai soure bue? Newo Eletaoye souhare donou vewu? Nehai thaohsa touyu sü Enou süwe, ne sü Ramai vei Mashio nasüe!”

³⁵Ana Jisu nou puh hisü tukha-a paoe, “Nashakhaio, ea puh hinou tapalouwo!” Alia rashi sünanou mai sünaye puletao hrohi soukhao thouwuyu thaisü puh hisü hashilia soukhaimoa puh hinou tapare.

³⁶Alia maikhemai hrülaisü khupa sholoua linou lihi haibüa paoe, “Chipao haisü dai tyae? Daiolouzü puhnou sheemoyu rako sütao hisü khouko ea soulousü zü nanou kharochi peiwe, alia puletao sü tapare.”

³⁷Alia Jisu vanou teidei sühi buyu buh teitei hisü kubou loure.

³⁸Alia puhnou tashuloua rathobuh sünasü thaowu-a tare ea Simon kihi loure. Sükisü Simon nai sü rakee shishoa bue, alia puletao nou Jisu hisü puhye soukha peire donou paopeie.

³⁹Alia puh nou puh ngheiki hi takou laloua rakee nahisü puhye thao-a taloure kharochi peie, alia rakee nasü puh hinou tare; alia sühinou puhnou thala-a lashuloua puletaoye sü kuvah soupeie.

⁴⁰Chuo teinghinou kou loutayu thaisü maikhemai taonou sounou tyalinou soua buyu lishimai taoye Jisu hi save, alia puh nou puh bahnou puletao aliliye kou deipeia puletao hrülaiye souvei peiwure.

⁴¹Alia rashitao-a, “Newo Ramai Nahpoutue!” tea shusou shaloua maitali hinou tapare. Ana Jisu nou rashitaoye sü kharochi pei-a puletaoye panou chi paomoe, daiolouzü puhsü Khristae touyu sü puletao nou süe.

⁴²Alia tei thelouyu kisü Jisu nou buh sünasü thaowu-a zheihzheihyu buh hi tare. Alia maikhemai nou puhye phoupoa puh hi tave. Puletao nou puhye tave ngaolouyu kisü puletaoye thaowu-a tamore donou puhye nuloure.

⁴³Ana puhnou puletao hi paoe, “Ramai vedeivei ko avei nasü kukhe nuhdu taohi-a Enou taho paodou vuzülai, daiolouzü süna vanou Eye seivepei khaitoue.”

⁴⁴Südonou puhnou Judeahi rathobuhtao hinou ko paodou tare.