Read Poumei Naga LUK 5 Bible Online

LUK 5 - Poumei Naga bible

LUK 5

¹Naiteithe lisü maikhe mainou Jisu hinou Ramai chipao keire donou nghojülo khaokoua buyu kisü, Jisusü Shunesaret zaipe hinou la-a bue.

²Alia puhnou sakhao ahai zaipehi pokhaikhaitouyu ngaoe; ana khahphoumai taosü sakhao sühai hinou tapaloua puletaosü khahbe taosü dzüthea-a bue.

³Jisu nou sakhao alihi süolouzü Simon vei nahi louloua zaipe hinou saoposhu kaphoua khaipeiwo tea Simon hi paoe. Alia puhnou lou buloua sakhao levai hinou maisouye doupeie.

⁴Alia puhnou chi paocheyu thaisü, Simon hi paoe, “Thoushoyu buh hilo saokouloua neletao vei khahbe taosü khah süloure donou laithoukhaio.”

⁵Simon nou chila peie, “Dou-apeio, Ehnou kheimathe phoukhaia halia phouloumoe! Ana nevei chipao thaifüa Enou khahbe taosü polai thoulai.”

⁶Alia puletao nou sübüa polai thouyu kisü, khah alaosou lou süloure ea puletao vei khahbe taosü süphawuyu laire.

⁷Südonou puletao nou sakhao kukhena hi louyu puletaoye koa khah phoumaitao hisü tave puletaoye sükha peire donou bahnou zha-a laloure. Alia puletao nou taveloua sakhao ahai hisü khah pothou phoulouyu vanou sakhao sühaisü leilouyu laire.

⁸Ana Simon Pitar nou süsü ngaolouyu kisü, kou Jisu phi hinou duloua puh hi paoe, “Mapao, Ahinou tala peikhaio, daiolouzü Esü mahmai alie!”

⁹Daiolouzü puh-a ea puhye koa buyu mai hrülai-a puletao nou alaosou nilouyu khah sütao vanou khupasho loure;

¹⁰alia süzhaibüa Simonye koa laiyu Zebedee nahpoutuhai Jems ea Johan-a khupasho loure. Alia Jisu nou Simon hi paoe, “Pikhaiso; zhou thainou ne sü maiye phoutalai.”

¹¹Alia puletao nou puletao vei sakhao taosü zaipehi süpa khaiwuyu thaisü, puletao nou puletao vei na veishisü thaowu-a puhthai fütare.

¹²Jisu nou vuhlihi nuhdu ali hinou bubuki, sühisü loukhaora nou souyu mai ali tave; alia puh nou Jisu ye ngaolouyu kisü kou khoukhüloua puh hinou khoe, “Dou-apeio, nenou aetou peilouzü, Eye nenou soushee peilou süe.”

¹³Alia Jisu nou puh bah sü topaloua ea puhye kou deiloua paoe, “E aetouwe, sheelouwo!” Alia sübü hinou loukhaora nasü mai süna hinou tare.

¹⁴Süthaisü Jisu nou puh hi kharochi pei-a paoe, “Maita lihi-a paokhaiso, ana napao nahi taveloua puhye panou neye zhukhaio; süthaisü mai hrülaihi ne veiloure touyu zhopaoh souloure donou Moses nou chikha peiyu thaifüa posheelare na nasü sheelakhaio.”

¹⁵Ana Jisu kosü holo hailo kubou loure; alia maisou alaosou puh hinou ko keire ea puletao vei sounou souvei loure donou tave dzüloure.

¹⁶Ana puhsü rekouhi taloua veachi paoloure.

¹⁷Naiteitheli Jisu nou doupei-a buyu kisü, sühisü Galilee, Judea, alia Jerusalem hi nuhdu teitei hinou tavelouyu Phariseemaitao ea razhai dou-apeimaitao sü bue; alia sounou souvei peiloure Mapao vei khoukosü Jisu ye koa bue.

¹⁸Alia zhukhaio, maikhemai kamainou pothaiyu mai aliye züh vanou kaopo veloua puletao nou puhye sü kikhahi polouloua Jisu nghojühi pokhai loure donou teloure.

¹⁹Ana maisou vanou puhye polouloure du phouhare. Südonou puletao nou puhye sü kiphaohi popaloua kitsü hinou hashaloua puhye sü puhzühnou pu maisou hrohi süolouzü Jisu nghojühi kezhukou khaire.

²⁰Alia Jisu nou puletao vei lü nasü ngaolouyu kisü puhnou mai sünahi paoe, “Asana, ne mah taosü khaipeire.”

²¹Alia razhai dou-apeimai ea Phariseemai taonou puletao hrohinou haibüa paoe, “Ramaiye paoshiyu mai hainasü thaoh-e? Ramai likhei baimoa thaohnou mah khaipei lousüe!”

²²Jisu nou puletao vei tsüsü süloua puletao hi paoe, “Neletao daidonou sübüyu tsü chowe?

²³Daiolouzü, ‘Nemahtao khaipeire,’ tea paoyu talahiho, ‘Lashuloua takhaio’ tea paoyu nou lahie?

²⁴Sükulouzü Enou neletao hi Mai Nahpoutu hai deiphao hi mah khaipeilou süyu khouko bue touyu zhopaoh peilai.” Südonou puhnou pothaiyu mai sünahi paoe, “Enou nehi paowe, lashulo ea nezüh poloua kihi taveo!”

²⁵Alia sübü hinou mai sünasü puletao veishi nghojü hinou lashu loure, alia puhnou züa buyu züh sünasü poloua ea Ramaiye shopoa puh kihi tare.

²⁶Alia puletao hrülaisü khupasho loure ea ngaopinou phoupoa ea Ramaiye shoyu noupu puletao nou haibüa paoe, “Eletao zhou khupa vahli ngaoloure.”

²⁷Süthaisü Jisu sü vakouhi tare, alia kikha khayu vahki hinou chobua buyu Levi tea kuyu kikha khamai sünaye ngaoloua puh hi paoe, “Athai fülo.”

²⁸Sühinou puhnou lashuloua ea ha teitei thaowu-a puhthai fütare.

²⁹Alia Levinou Jisu ye donou puhki hinou tovai aduli soudare; alia sühisü kikha khamai ea kukhe maitao-a alaosou puletaoye koa arübuh hinou toua bue.

³⁰Alia Phariseemai kamainou ea puletao vei razhai dou-apei kamaitao nou Jisu rozümai taohi sü mülealea-a paoe, “Neletao daidonou kikha khamaitao ea mahmaitaoye koa tou-showe?”

³¹Jisu nou puletao hi chila peie, “Pfüphao veiyu maitao donou pou-apeimai sü koyu hae ana lishimaitao donou likhei kobaie.

³²Esü cheche maiye kure donou vemoe, ana mahmaitaoye panou le daloure donou baie.”

³³Alia puletao kamai nou Jisu hi noue, “Johan vei rozümaitaowo lüh zhazha-a veachi paobaiwe, alia sübüa Phariseemai vei rozümaitao-a soubaiwe, ana nevei rozümaitaowo tou-sho baiwe.”

³⁴Jisu nou puletao hi chila peie, “Neletao nou sheenghiyu buh hi shemaitaoye sheeyupunou puletaoye koa bubusasü panou lüh-a bulou süwu? Sükulou hoe!

³⁵Ana sheerepu sünaye puletao hinou potawuyu teithesü velai, alia süshonou puletaosü sükinou lüh talai.”

³⁶Puhnou puletao hi nada kukhe hainasü paopupeie: “Maitalinoua sheetouyu sah hinou sah peli raphapaloua sünanou poshu sahku lihi khotamoe; sübüa soure toulouzü, puhnou sahshu nasü-a paiphalai, alia sahshu navei sahpe nasünou sahku nahisü zülai moe.

³⁷Moa maitalinoua darkha zhaoh ashuhai souheebvü kutaohi thoukhai moe; hakinou thoulouzü, darkha zhaoh ashu nasünou souheebvü taoye sü soukhowulai ea sünasü vakouhi küpa bailai, alia souheebvü taosü soushiwu bailai.

³⁸Süjüwo darkha zhaoh ashu hai sheetouyu souheebvü taohi lathou vuzülai.

³⁹Alia maitalia darkha zhaoku sholouyu thaisü ashu nasü züpa tamoe; daiolouzü puhnou, ‘Akuna veikouhie’ tea paowe.”