Read Poumei Naga LUK 6 Bible Online

LUK 6 - Poumei Naga bible

LUK 6

¹Vuhlihi Jisu nou Soteitheki southou doutao tachopoa buyu hinou puh rozümaitao nou southou rouko taosü hailoua ea puletao bah hinou nüloua toue.

²Ana Phariseemai kamainou paoe, “Neletao dai donou Soteitheki souzü moyu vah soue?”

³Jisu nou puletao hi chila peie, “Neletao nou David nou puh ea puhvei maitao nou houyu phaki dai sousa touyu kosü phoumowu?

⁴Puh nou Ramai kihi talouloua, razhai thaifüa napaomai likhei baideinou maitalinoua tounouyu Ramai hi posheelayu raokhao nasü puhnou poloua toue ea puhye koa bumaitao hi-a peie.”

⁵Alia Jisu nou puletao hi paoe, “Mai Nahpoutu nou Soteithe vei Mapaowo süe.”

⁶Soteithe kukheli kisü Jisu nou rathobuh lihi talouloua doupei-a buyu phakisü sühisü bah zhoulova shoyu mai ali bue.

⁷Alia razhai dou-apeimaitao ea Phariseemai kamaitao nou puh pei hi dukhaire mah phoupa loure donou Soteithe kihinou puhnou sounou maiye souvei peilai mosa tea chohteipoa bue.

⁸Ana puhnou puletao vei tsü-le nasü süloua bah polova shoyu mai sünahi paoe, “Lashuloukhaio ea takou maikhemai nghojü hinou lalouwo.” Alia mai sünanou lashuloua sühinou kou laloure.

⁹Alia Jisu nou puletao hi paoe, “Enou neletao hi nouwe; Soteitheki avei souyu zhaiho, ashi souyu zhaie moa hrirai khailu peilaiho sünasü souhalai?”

¹⁰Alia puhnou puletao hrülaihi zhusühaoloua puh hi paoe, “Nebah topalouwo.” Alia puhnou sübüa soulouyu kisü puh bahsü veida loure.

¹¹Ana puletaosü rarousholoua puletao hrohinou Jisu pei hisü dai soupei laisa touyu sü khailoure.

¹²Teile sütaohi vuhli sü Jisu nou veachi paore donou deichi alihi tapare; alia sühinou kheimathe sü Ramai hi veachi paoa bue.

¹³Alia teitheloukhaie puhnou puh vei rozümaitaoye kuloua puletao hrohinou mai kiahaiye doloure ea puletaoye sü puhnou sei-atamaitao tea zhih sapeiwure:

¹⁴Pitar tea puhnou zhih sapeiyu Simon, alia puh thaihou Andrew, Jems ea Johan, Philip ea Bartholomew,

¹⁵Mathiu ea Thomas, Alphia nahpoutu Jems ea teidei-leshio tea kuyu Simon,

¹⁶Jems nahpoutu Judas ea maiye zhotouna Iskariot Judas.

¹⁷Alia Jisu nou puhvei sei-atamaitaoye koa deichi hinou takouhloua deikhobuh ali hinou kou laloure, alia sühisü puhvei rozümaitao alaosou ea maisou alaosou Judea teidei veishi hinou, Jerusalem hinou, alia Tair ea Sidon vei zaidu ngheiki hinou maisou alaosou puh hinou puhvei chipao keiloure ea puletao vei sounou sü souvei loure donou tave loure;

¹⁸alia rashinou souveayu maitaolia taveloua veikhai loure.

¹⁹Sükisü maisou hrülainou puhye sü deiloure donou phoue, daiolouzü puhva hinou khouko sü paloua puletao hrülaiye sü souveipeie.

²⁰Alia Jisu nou puh rozümai taohi pheloua haibüa paotare: “Neletao toure hamaitao rakoveie, daiolouzü Raki vedeisü neletao veie!

²¹Chu houa laimai neletao rakoveie, daiolouzü neletaoye pouphou soupeilai. Chu kra-a bumai neletao rakoveie, daiolouzü neletao nülai!

²²“Mai Nahpoutu vanou neletaoye maikhemai nou ngaorayu, souku payu, sou ahrao peiyu ea maishie tea neletaoye zhih phawuyu kisü rakoveie!

²³Süteithe kisü asalo ea lesaloua do soulouwo, daiolouzü zhukhaio, neletao vei buusü raki hinou dushoa bue. Daiolouzü sübüa puletao vei pai-paomai taonoua rachi paola maitao hi soupeie.

²⁴“Ana chu kini bumai neletao donou daizhozhou ngaopisa; daiolouzü neletao-wo neletao vei sa-vayu sü ngaoche loue!

²⁵“Chu pouphou-a bumai neletao donou daizhozhou ngaopisa; daiolouzü neletaosü hou khailai! Chu nü-a bumai neletao donou daizhozhou ngaopisa; daiolouzü neletaosü dopfüa kralai!

²⁶“Mai hrülainou neletaoye paoshoyu kisü neletaoye donou daizhozhou ngaopisa, daiolouzü puletao vei pai-paomaitao nou-a madayu rachi paolamaitao hisü sübüa paoshopeie.

²⁷“Ana kei-a buyu neletao hi Enou paowe: Neletao vei ngaobamaiye leshilo, neletaoye ngaorayu maitaohi avei soupeikhaio,

²⁸neletaoye chayu maitaoye hapeikhaio, alia neletaoye nghi-a bumaiye donou veachi paopeio.

²⁹Maitalinou nebai polovahi phapei louzü kukhe alina-a pfüdo peikhaio, alia maita linou ne sahba saolouzü puh hisü nevei zao-a peibaso.

³⁰Nehinou hatali khoyu puh hisü peikhaio; alia maita linou nevei hatali poloua talouzü sünasü puh hinou khodawuso.

³¹Alia neletao nou maiye panou neletao hi soupei nüyu büa neletao-a puletao hi soupeiwo.

³²“Neletao nou neletaoye leshiyu maitaoye likhei leshi bailouzü, neletaoye paoshore dai bue? Daiolouzü mahmaitao koutea puletaoye leshimaiye leshiwe!

³³Alia neletao nou neletao hi avei soupeiyu maitaohi likhei avei soupei bailouzü, neletaoye paoshore dai bue? Daiolouzü mahmaitao koutea sübüa souwe!

³⁴Alia neletao nou ngaodakhai lousüe tea choyu maitaohi likhei neletao nou ha poupei bailouzü neletaoye paoshore dai bue? Mahmaitao koute-a alaosou ngaopure donou mahmai taohi poupeiwe.

³⁵Ana neletaoye ngaoba maitaoye leshilo ea puletao hi avei soupeikhaio; ngaoda khaire chokhaimoa poupeikhaio, sübülouzü neletao vei buusü dusholai ea neletao sü Aku Kulai Ramai vei nahmaitao soulai; daiolouzü puhwo mai veamuh sümoyu ea dutou nüyu maitaoye-a zhuvea peiwe.

³⁶Neletao Puonou zhuvea peilou süyu büa neletao-a zhuvea peio.

³⁷“Mai kukheye chi kuso, alia neletaoye chi kulaimoe; maiye mah dukhaiso, alia neletaoye mah dukhai laimoe; maiye khaipeikhaio, alia neletaoye khaipeilai.

³⁸Maiye peiwo, alia sünasü neletao hi peikhailai; alia doutouloua, nouthouloua, ngukouloua ea phouli-a neletao vei khao-lekhahi thoupeilai.”

³⁹Süthaisü Jisu nou puletao hi nada ali paopu peie: “Nghichamai alinou nghichamai aliye süthai talou süwu? Sübüa soulouzü puhai maihainou raobvühi duloulai mowu?

⁴⁰Rozümai alinou puhvei dou-apeio jünou dumoe, ana rozümai hrülainou puhnou doure doucheyu thainou puhvei dou-apeio bübailai.

⁴¹“Alia nelah ne nghithouhi houngh louyu sü popare romoa daidonou nevei thaihou jürai nghithouhi louyu houngh nanou zhuwe?

⁴²Moa nelah ne nghithouhi houngh louyu nasü ngaomoa kabüa nenou ne thaihou jüraihi, ‘Achina, ne nghithouhi louyu houngh nasü panou Eye popalouwo,’ tea paoloulai? Aveikho souyu taore, raia nelah ne nghithouhi louyu houngh nasü popalouwo, alia süshonou nenou ne thaihou jürai nghithouhi louyu houngh nasü popa loure donou sheesha-a ngaolou süe.

⁴³“Daiolouzü avei süübe hinou ashi rashi shimoe, moa ashi süübe hinou avei rashi shimoe;

⁴⁴daiolouzü süübe taliye lah sünavei rashi vanou sülou baiwe. Daiolouzü doushi hai rakhoudube hinou hailaimoe, moa darkha rashi hai ngushishi be hinou hailoumoe.

⁴⁵Mai avei mainou puhvei lekhehi avei podzükhai touyu hinou avei popawe, alia maishi mainou lekhehi ashi podzükhai touyu hinou ashi popawe; daiolouzü lekhehi phoua buyu hinou münou paopawe.

⁴⁶“Neletao daidonou Enou neletao hi paopeiyu nasü soumoabu lukhu Eye nou ‘Mapao, Mapao’ tea kuwe?

⁴⁷Maita linou Ahi taveloua ea Avei chipaotao keiloua souyu puhsü daiye raisa touyusü Enou neletao hi paongaolai:

⁴⁸Puhsü deibvü thoushoa raothouloua chuhrao peinou kifü soulouyu ki souyumai süna büe; alia dzüdu veyu kisü ki sünaye sü vephya loure, ana sünaye sü soulülou moe, daiolouzü sünasü soutaosoua soushupa khaitoue.

⁴⁹Ana Achipaotao chouloua sütaosü soulou moyu puhsü kifü khopaloumoa nai peivanou ki soushupa khaitouyu mai süna büe; alia dzüdunou veloua ki sünaye vephyayu kisü sünasü thala-a kaotare ea ki sünasü kaothou deisasare.”