Read Poumei Naga LUK 7 Bible Online

LUK 7 - Poumei Naga bible

LUK 7

¹Jisu nou maikhe mai hi chipao haitao teitei paochewuyu thaisü puhsü Kapernahum hi tare.

²Alia sühisü reihmai kaihpei chayumai alivei leshishoyu kilai ali bue, mai sünasü soushisholoua thainonoa bure.

³Alia puhnou Jisu ko choulouyu kisü, puhnou Jihudimai tsümai kamaiye Jisu hi seiveloua puhye nou tave puhvei kilai naye souvei peire donou pa khoe.

⁴Alia puletao nou Jisu hi tavelouyu kisü, puletao nou leloushoa puh hinou haibüa khoa paoe, “Mai haina hai nevei soukha ngaozüe,

⁵daiolouzü puh hai Eletao teideihi maikhe maiye leshie ea puhnou Eletaoye donou Eletao vei rathobuh nasü soupeie.”

⁶Südonou Jisu nou puletaoye koa tare. Ana puhnou ki süna ngheikihi taveyu kisü, kaihpei hi chayu aduwo sünanou puhvei samaitaoye seive-a panou puh hi paoe, “Mapao, nelah neye souvea khaiso, daiolouzü neyenou Akihi panou taveyu sü Eye donou zümoe;

⁷süvanou E-a Apfüzhonou tave neye daore koute-a zümoe tea chowe. Ana nevei kharochi sü peikhaio, alia Avei kilaisü veiloulai.

⁸Daiolouzü, E koute-a peichamai khehinou buyu mai alibaie, alia Akhehi-a reihmai bue; alia Enou puletao talihi haibüa kharochi peiwe, ‘Takhaio!’ alia puhnou tawe; alia kukhe alihi, ‘Taveo’ toulouzü puhnou tave baiwe; alia Akilaihi, ‘Haina souwo’ toulouzü puhnou sünasü souwe.”

⁹Jisu nou süsü choulouyu kisü puh vanou khupaloua puh thaifüa tayu maisouhi reiveloua paoe, “Enou neletao hi paowe, haibüyu lühai Israel maitao hrohi koute-a E ngaokhai mohie!”

¹⁰Alia seitayu mai sütaonou khaiveyu kisü kilai sünasü vei-a buyu sü ve ngaoloure.

¹¹Süthaisü thashoa Jisu sü Nain tea kuyu nuhdu hi tare, alia puh rozümaitao ea maisou alaosou puhye koa tare.

¹²Alia puhnou nuhdu sünavei romühi takou ngheiyu kisü, zhukhaio, maikhemai nou thaiphao ali popa daoloure. Thaimai sünasü puhpfüvei likhuyu nah poutu süe, alia naotupai sünasü meamaipfüe; alia nuhdu sühinou maisou alaosou puhye koa laie.

¹³Alia Mapao nou puhye ngaolouyu kisü, puhnou puhye leshisho loua puh hi paoe, “Kraso.”

¹⁴Sühinou puhnou takouloua thaiphao sübvü nasü kou deie, alia süna kaopoa tayu maitao sü sore. Alia puhnou paoe, “Nahle pouna! Enou nehi paowe, lashulouwo!”

¹⁵Alia thaimai sünanou lashu buloure, alia chi paopare. Alia Jisu nou puhye sü puhpfü hi peire.

¹⁶Alia puletao hrülaisü piyu nou phouloure ea Ramaiye shoyu noupu haibüa paoe, “Eletao hrohi dushoyu rachi paolamai ali veloure!” alia “Ramai nou puhvei maitaoye khaipeire donou tave zhupeire!”

¹⁷Alia puh vanou ko süsü Judea teidei teiteihi ea sünavei ngheikihi buyu teidei hi kubou loure.

¹⁸Alia Johan vei rozümaitao nou chi sütao teitei sü puh hi paongao peiwure.

¹⁹Sühinou Johan nou puh rozümai ahaiye puh hi kuveloua puhaiye nou panou Mapao hi haibüa paore donou seitae, “Ne hai Johan nou maili velai tea paoyu sünawu, molouzü Eletao nou mai kukhe aliye zhipu laiwu?”

²⁰Alia puhai nou Jisu hi velouyu kisü, haibüa puhai nou paoe, “Johan Baptist nou Ehye nehinou haibüa nouloure donou seivewe, Ne hai maili velai touyu sünawu, molouzü Ehnou kukhe aliye zhipulai?”

²¹Süphabü hinou Jisu nou maitaoliye puletao vei sounou ea sou-ashitao alia rashitao hinou souvei peire, alia nghichamai taoliye panou ngaoloure.

²²Alia puhnou puhaihi chila peie, “Khaitawo, alia nehainou ngaolouyu ea choulouyu taosü Johan hi paongaokhaio: nghichamai taonou ngaoloure; phishomainou taloure, loukhaora soumaiye sü soushee peire, noupe mainou chouloure, thaimaiye sü souhri peire, alia toure hamaitao hisü ko avei paodou peire.

²³Alia Eye letsü moyu puhsü rakoveie.”

²⁴Alia Johan nou seiveyu maitao nou tayu thaisü, puhnou Johan vanou maisou taohi paoshu tare: “Neletao nou daiye zhure donou rekouhi tahoe? Teikhainou hükaoyu poube sünawu?

²⁵Molouzü neletao daiye zhure donou tahoe? Zhaivei sahnü tupfüa laiyu mai sünaye zhure donouwu? Zhukhaio, sübüyu sahnü nouyumai taosü ea vashoa hrüyumai sü veofühao hinou bue.

²⁶Molouzü neletao daiye zhure donou tahowe? Rachi paolamai aliye donouwu? Ovai chekhaoe, ana neletao nou rachi paolamai ali jünou koushoa ngaoloure.

²⁷Daiolouzü Johan hai sheeyu larübvü hinou: ‘Zhukhaio, Enou Avei koseitanaye nedu houpeire donou ne jünou raia seipeilai,’ tea paoyu mai nasüe.

²⁸Enou neletao hi paowe, ‘Naotumainou hrükoukhai touyu maikhe maitao hrohinou maitalia Johan jünou dumoe; ana Ramai Vedei hinou tai-nou kayu puhnou Johan jünou duhie.’ ”

²⁹Alia maikhemai hrülai ea kikha khamaitao nou Jisu vei chipaotao choulouyu kisü Johan hinou dzükhao daloua Ramaiye nou chekhaoe tea poloure.

³⁰Ana Pharisee maitao ea razhai dou-apeimaitao louzü Johanye panou dzükhao dapeiloumoa lah puletaoye donou Ramai vei aroh nasü nuwure.

³¹Jisu nou paopukhaie, “Südonou Enou maikha hainavei maikhemai taoye sü daiye nou pao nadalai, alia puletao sü daiye raiwe?

³²Puletao hai hupobuh hinou chobua buyu nahmaitao büe ea puletao nou alinou liye la-a haibüa paoe, ‘Eletao nou neletaoye donou shaa houa lousoue, alia neletao nou do soubae! Eletao nou kouli lipeie, ana neletao nou krabae!’

³³Daiolouzü Johan Baptist nou raokhao li-a toumoa ea darkha zhaoh li-a shomoa ve; alia neletao nou paoe, ‘Puh hi rashi ali bue!’

³⁴Mai Nahpoutu nou toua, shoa ve; alia neletao nou paoe, ‘Mai hainaye zhukhaio! Puhwo touzhi-shozhiyu mailie, alia puhwo kikha khamaitao ea mahmai kukhetao vei samaibaie!’

³⁵Ana ratsünaye louzü puhvei nahmaitao nou puh hai chekhaoe touyu sü pongaopei baiwe.”

³⁶Alia Phariseemai alinou Jisu ye nou puhye koa tovai touzhore donou kuloure, alia Jisu nou Pharisee süna kihi taloua toure donou kou buloure.

³⁷Alia zhukhaio, nuhdu sühisü naotu mahmaipfüli bue. Puhnou Jisu hai Pharisee pouna kihinou toua bue touyu sü chouloua chuh kaa khouh alihi kaivei theadzü nou thouphouloua sühi pove,

³⁸alia Jisu phi thailova hinou laloua ea kra-a puh nghidzünou kou Jisu phi hisü jaokhai loure, alia puh phisü puh peishunou posoupeia ea puh münou kou muloua kainüvei theadzü sünanou puh phihisü lakhailoua napeiwure.

³⁹Chuo puhye kuveyu Phariseemai pouna nou süsü ngaoloukhaie puh lahnou haibüa paoe, “Mai haina hai rachi paolamai alie toulouzü puhye deiyu naotupai haina hai thaohsa moa dai souyu maisa touyu sü puhnou süyu phae, daiolouzü puh hai mahmaipfü alie.”

⁴⁰Alia Jisu nou puh hi chala-a haibüa paoe, “Simon, Enou nehi chili paolai.” Puhnou paoe, “Dou-apeio, süsü daie? Ahi paongaokhaio.”

⁴¹“Vuhli sha poupeimai alivei paopfümai ahai bue; mailinou denarü kaihngou, alia kukhe nanou denarü raingou pfüe.

⁴²Puhai maihainou pao khapeilou hoyu donou puhnou puhai maihaiye pao khaipei kheire. Sübülouzü chuo puhai hronou thaohnou puhye leshi koulai?”

⁴³Simon nou chila peie, “Khaipei kouyu puhnoulai tea Enou chowe.” Alia Jisu nou puh hi paoe, “Nenou zütoua paowure.”

⁴⁴Sühinou puhnou naotupai hi reiveloua Simon hi paoe, “Naotupai hainaye ne ngaowu moe? Enou nekihi tave, alia nenou Aphi donou dzü peimoe, ana puhnou puhvei nghidzünou Aphisü souchaloua puhvei peishunou southe peire.

⁴⁵Nenou Eye münou mua shepeimoe, ana Enou velouyu hinou shua puhnou Aphi münou muyu sü thaokhai mohie.

⁴⁶Nenou Apei hisü theadzü napei moe, ana puhnou Aphiva hisü theadzü kainü veinou napeire.

⁴⁷Südonou Enou nehi paowe, naotu haipainou leshiyu dushoa pongaoyu sünanou puhvei mah hai alaosou khaipeiwure touyu vei zhopaoh souwe. Ana daotu khaipei baiyu puhnou, daotu leshi baiwe.”

⁴⁸Alia Jisu nou naotupai hi paoe, “Ne mah taosü khaipeire.”

⁴⁹Sühinou puhye koa arübuh hinou buyu kukhemai taonou puletao hrohinou alinou lihi haibüa paoshure, “Mah koute khaipeiyu mai hainasü thaoh-e?”

⁵⁰Ana Jisu nou naotu süpaihi paoe, “Nevei lü nanou neye khailu peire; kaona-a talouwo.”