Read Poumei Naga LUK 8 Bible Online

LUK 8 - Poumei Naga bible

LUK 8

¹Süthaisü thashoa Jisu nou Ramai vedeivei ko avei nasü paodoupoa nuhdutao hi ea kukhe nuhtao hi tare. Alia rozümai kiahaitao-a puhye koa tae,

²alia sübüa kukhe naotumai kamaitao süolouzü raiki rashinou louyu hinou ea sounoutao hinou veilouyu: rashi anai louyu hinou hupa peiwuyu Magdalini tea kuyu Meri,

³Herod chikuki hinou vahlaimai soua buyu Chuza chapfü Joanna, Susanna, alia kukhe naotumaitao taoli koa laiwe. Puletao nou Jisu ea puhvei rozümaitaoye puletao vei kininou popaloua soukha peiwe.

⁴Alia nuhdu liki hinou maikhe mainou tokhaimoa Jisu hi taveloua maisou alaosou ve dzülouyu kisü, puhnou nada hinou chi paotare:

⁵“Teile lihi thoutai vuyumai alinou puhvei thoutaisü vure donou tapae; alia puhnou vuthouyu kisü, kamaisü luduhi deloure, alia maikhemai phinou taina-a teihi raohou taonou kotou loure.

⁶Alia kamaisü deivei moyu chuvea sayu buh hi dekou loure; alia sünanou paopayu kisü sühisü deinü moyu donou vütare.

⁷Alia kamaisü rai-shu hrohi deloure; alia rai-shutaonou sütaoye koa paopaloua sütaoye boutheare.

⁸Alia kamainou dei avei buhi deloure, ea dupaloua thou kaih-kaih shiloure.” Alia Jisu nou sübüa paocheyu kisü, puhnou paikuloua shapae, “Keiloure nou pfüyu puh nou keiloukhaio!”

⁹Alia Jisu rozümai taonou puh hinou nada sünavei kosü daitoue tea nouyu kisü,

¹⁰puhnou chila peie, “Neletao hiwo louzü Ramai Vedei vei kheitsü hai süloure donou peire; ana kukhe maitao hiwo louzü, puletao nou ngao-a ngaolou more donou, alia puletao nou kei-a sülou more donou nada hinou peikhaitoue.

¹¹“Chuo nada sünavei ko louzü haikue: Thoutai sünasü Ramai vei chipaoe.

¹²Ludu hi dekouyu thoutai taosü choulouyu maitaoe; ana puletaoye panou louchelou more ea khailulou more donou rashi nanou taveloua puletao vei le hinou chipao nasü potalou baiwe.

¹³Alia chuhrao pei hi dekou louyu taonou, chipao süna chouloua sasa-a polouyu maitaoe, ana maa chülou moyu donou phajütou loucheloua athao veyu kisü kaotayu puletaoe.

¹⁴Alia raishu hrohi dekou louyu taosü chipao süna choulouyu puletaoe; ana puletao nou sübüa phajü hrükouyu thaisü leki-ledayu, kini ea hrühi vashoyu ralea taonou puletaoye sü boutheare, alia puletao vei rashitao sü liche-a meilou more.

¹⁵Alia deivei buh hi dekou louyu taonou, chipao süna chouloua sünasü sheeyu ea paoyu züyu lekhe hinou poteiloua shameayu vanou rashi shilouyu puletaoe.

¹⁶“Maitalia meibvü hai taowu-a sünasü sülai khehi hongikhaiwu tamoe, moa sünasü züh phihi pokhaiwu tamoe, ana tave louyu maitaoye panou ava nasü ngaoloure donou sünasü meibvü dzükhaiyu buh hi khaibaiwe.

¹⁷“Daiolouzü paopa ngaolai moyu kukhaiyu hatalia hae, moa sükhailai moyu ea teivahi popa ngaolai moyu kheina talia hae.

¹⁸“Südonou neletao nou kabüa keilousa, leikeilo; daiolouzü buyu puh hisü peipu khailai, ana hazhia buyu puh hiwo lah puhnou daotu buhie tea choyu süna koutea potawu bailai.”

¹⁹Süthaisü Jisupfü ea puh thaihoumai taosü puh hi tave, ana maikhe mainou pouleyu vanou puletao nou puhye kou daolou hore.

²⁰Alia mai kamainou Jisu hi paoe, “Nepfü ea ne thaihoumai taonou neye daonüa vakounou lacha-a bue.”

²¹Ana Jisu nou puletao hrülai hi paoe, “Apfü ea Athaihou jürai maitao louzü Ramai chipao chouloua süna züa buyu maitaoe.”

²²Vuhlihi sü Jisu nou puhvei rozümaitaoye koa sakhao alihi talouloua puletao hi paoe, “Eletao zaipe polo dovahi talaikhe.” Südonou puletaosü tare.

²³Alia puletao nou sübüa sakhao saopoa tayu hinou puhsü zhitare. Alia zai hisü teikhaishi veloure, alia sakhao hisü dzünoulou phoupayu donou puletao sü ha-kare kaozhoushihi bubaire.

²⁴Alia rozümai taonou puh hi takouloua ea puhye soukailoua paoe, “Dou-apeio, Dou-apeio, Eletaowo ha-kayu laire!” Alia Jisu nou shuloua tashu teikhai ea dzü-akhüh hi soloure donou kharochi peie, alia sühinou pai-rao taosü khaizheih taloua kaona loure.

²⁵Süthaisü puhnou puletao hi paoe, “Neletao vei lü daiki bue?” Ana puletao sü piloua ea khupaloua linou lihi paoe, “Mai hainasü thaoh-e, daiolouzü puhnou teikhai ea dzü-akhüh hi tukhapeikhaie sütao-a puhchi zübaiwe!”

²⁶Süthaisü Jisu ea puh rozümaitao sü Galilee nghojülohi buyu Gerasa teidei hi veloure.

²⁷Alia puhnou zaipehi tapayu kisü, sühinou rashitao nou louyu mai alisü sühi buyu nuhduna hinou taveloua puhye ve daoe. Mai hainasü teile phaso sabanüh bahnou khaimoe, alia puhsü kihi-a ve bumoe anou khühbuh hrohinou hrüa bubaie.

²⁸Puhnou Jisu ye ngaolouyu kisü, shusoua raoloure ea puh nghojü hinou kou duloua haibüa paikushoa paoe, “Aku kulai Ramai Nahpoutu Jisu, nenou Eye koa daivah soure bue? Enou nehinou khowe, Eye souvea peiso.”

²⁹Puhnou sübüa paoyu hai Jisu nou puhye nou mai süna hinou tapalouwo tea paoyu donoue. Daiolouzü rashi sünanou mai sünaye raiki lüh taoli hi tave nie; alia puhye sü hukhaki hinou bekhaiwu-a phi-baosü hurainou phukhaikhai-a puhnou tashu paide-pailaiwu baiwe ea rashi sünanou puhye sü rekouhi satalou baiwe.

³⁰Alia Jisu nou puh hi noue, “Nezhih thaohtoue?” Puhnou chila peie, “Azhihwo ‘Maisou’” toue; daiolouzü rashitao alaosou puh hi loure.

³¹Alia rashitao nou puletaoye panou akhai hayu raobvü hi tare donou kharochi peiso tea Jisu hinou khoe.

³²Alia chuo sühisü vokho aduli deichilova hinou pou phoutoua bue. Südonou rashitao nou puletaoye panou sütaohi louwo tea Jisu hinou khoe ea puhnou puletao hi aetou peire.

³³Süpha hinou rashi taosü mai süna hinou tapaloua vo sütaohi kou loure, alia vokho teitei sü lea shishoyu phihi polouloua zai hinou lou maothea khaire.

³⁴Vo khoyu maitao nou sübüa payusü ngaoloua tutare, alia ko sünasü sühi nuhdu ea ngheikihi buyu nuhbuh taohi taho paongao peire.

³⁵Südonou maikhe mainou dai paresa touyu sü zhure donou tapare, alia puletao nou Jisu hi taveyu kisü, rashinou thaowu-a tayu mai sünasü sahnü bahnoua ea tsü lei-a Jisu phi hinou chobua buyu sü puletao nou tave ngaoloue; alia puletao veishi sü pisho loure.

³⁶Alia sübüa payu ngaolouyu taonou rashinou louyu mai sünasü kabüa veiloure touyu sü maikhemai taohi paongao peire.

³⁷Süthaisü Gerasa ngheikihi buyu teidei maitao hrülainou Jisu ye nou puletaoye thaowu-a tapeio tea puh hinou ve khoe; daiolouzü puletao sü pisho loure. Südonou Jisu sü sakhaohi talouloua khaitare.

³⁸Rashi taonou thaowu-a tayu mai sünanou Jisu hinou khoe, “Eye panou neye koa takhe.” Ana Jisu nou puhye seitawu-a haibüa paoe,

³⁹“Nekihi khaitawo ea Ramai nou neye donou daizhozhou soupeiresa taho paongaokhaio.” Alia mai sünanou taloua Jisu nou puhye donou daizhozhou koute soupeiresa touyu sü nuhdu süna teiteihi tasühaoloua paongao peire.

⁴⁰Chuo Jisu nou zaipe polo dovahi khaiveyu kisü, maisounou puhye sü sasa-a sheloure, daiolouzü puletao hrülaisü puhye donou khoa bue.

⁴¹Alia sühisü rathobuh hi peichana Jairas tea kuyu maili tave; alia puhnou kou Jisu phi hinou duloua puhye nou puh kihi tave peire donou khoe,

⁴²daiolouzü puhvei po kiahai payu likhuyu nah naotupai sü thailaire. Jisu nou sübüa ta-a buyu hinou maikhe mainou puhye sü holo hailonou khaotsütsü loure.

⁴³Alia puletao hrohisü po kiahai zhe küa souyu ea puhvei buyu kini teitei pou-apeimai hinou souhazheikhai-a mailinoua souvei peilou hoyu naotupai ali bue.

⁴⁴Puhnou maisou hrohinou Jisu thailohi takouloua puhvei sahkainghou kou deiloure; alia sübü hinou puhvei zhe küyu sü khaizheih tare.

⁴⁵Alia Jisu nou noue, “Thaohnou Eye deiwe?” Maikhemai hrülainou deimoe tea paowuyu thaisü Pitar nou paoe, “Dou-apeio, maikhemai hrülainou neye sühaopoa khaotsütsüwe!”

⁴⁶Ana Jisu nou paoe, “Mai kamainou Eye deiwe; daiolouzü Ahinou khouko tayu sü Enou süwe.”

⁴⁷Alia naotupai sünanou puhvei sou veilouyu sü pokulou shire touyu sülouyu kisü nguhrührüloua kou Jisu phihinou duloure ea maikhemai hrülai nghojünou puhnou puh hi daidonou deisa ea kabüa puhvei sounasü thala-a veilouresa touyu sü paongao peire.

⁴⁸Alia Jisu nou puh hi paoe, “Anahpai, nevei lünou neye souvei peire; kaona-a talowo.”

⁴⁹Puhnou sübüa chipaobu kinou rathobuh peichana ki hinou kopaolamai ali taveloua Jairas hi paoe, “Ne nahpaisü thaire; Dou-apeioye souveapu khaiso.”

⁵⁰Ana Jisu nou süsü chouloua Jairas hi paoe, “Pikhaiso; louche toulo; alia puh sü veiloulai.”

⁵¹Alia puhnou ki sühi velouyu kisü, Pitar, Johan, Jems ea nah sünapai pfüpuo likheithe baideinou puhnou kukheye panou puhye koa loure sü baloure.

⁵²Alia sühi buyu mai hrülaisü nahpai süna vanou kra-a ea kouli li-a bue. Ana Jisu nou paoe, “Kraso; daiolouzü puhsü thaimoe anou zhiwe!”

⁵³Alia puletao hrülainou puhye sü konüwe, daiolouzü nah sünapai sü thaire touyu sü puletao nou süwe.

⁵⁴Ana puh bahsü kou pailoua paikua paoe, “Nahpai, kushulouwo!”

⁵⁵Alia puhvei rako sü khaivere ea puhsü thala-a kushu loure; alia Jisu nou puletao hi puhye panou toure donou hatali peikhaio tea kharochi peie.

⁵⁶Alia puhvei pfüpuo sü khupare; ana Jisu nou puletao hi dai paresa touyu vanou maitalihi-a paongao khaiso tea kharochi peie.