Read Poumei Naga LUK 9 Bible Online

LUK 9 - Poumei Naga bible

LUK 9

¹Alia Jisu nou rozümai kiahaitaoye kuve dzüloua puletao hi rashitaoye hupalou süyu ea sounou souvei peilou süyu khouko ea soulousü zü peire;

²alia puhnou puletaoye Ramai vedeivei ko paodoure ea sounou maiye souvei peire donou seitare.

³Alia puhnou puletao hi paoe, “Neletao vei veihdu donou süpo-a, lekha-a, raokhao-a, pousha-a moa zao-pa koute hatalia pfütaso.

⁴Alia neletao nou ki talihi lou houlouzü, sühinou neletao tamosasü bukhaio.

⁵Alia buhtaki nou neletaoye maikhe mainou shepei balouzü, neletao nou nuhdu süna thaowu-a tayu kisü puletao pei hi motouyu zhopaoh soure donou neletao phihi naisü buh sühi sükou khaiwu-o.”

⁶Alia rozümaitao nou taloua buhliki hinou ko avei nasü paodoupoa ea sounou maiye souveipeia nuh likihi tasühao tare.

⁷Chuo Herod Veo nou pa-a buyu sütao teitei vanou choulouyu kisü puhsü tsübo phouhare, daiolouzü Johan Baptist hai thaiyu hinou hridashu loure tea kamainou paoe,

⁸kamainou Elijah khaive khaire tea paoe, alia kamainou dao raichoki rachi paolamaitao hrohinou ali hrishure tea paoe.

⁹Herod nou paoe, “Enou Johan peisü dere, ana Enou sübüyu ko chouyu mai hainasü thaohsa?” Alia puhnou Jisu ye daoloure donou phouloure.

¹⁰Sei-atamai taonou khaiveyu kisü puletao nou souyu teitei sü Jisu hi paongaoe. Puhnou puletaoye saloua Bethsaida touyu nuhdu nahi puletao lah khaitare.

¹¹Maisoutao nou sübüyu kosü choulouyu kisü, puletao nou puhthai füpoa tare; alia puhnou puletaoye sasa-a shepeiwu-a puletao hi Ramai vedei vanou paodou peie, alia sou souveilou nüyu maitaoye souvei peie.

¹²Teinghinou kou loutare kisü rozümai kiahai taonou taveloua puh hi paoe, “Maisoutaoye nuhtao hi ea nuhfühao taohi chaoloure donou ea touso ngaotou loure donou seitawo; daiolouzü Eletao nou buyu buh haisü zheih zheihyu buh-e.”

¹³Ana puh nou puletao hi paoe, “Neletao nou puletao hi toure donou hatali peikhaio.” Puletao nou chila peie, “Eletao hi raokhao phou angou ea khah ahai jünou bupu moe. Nenou Eletaoye panou taloua maisou hrülai haitao donou touso hrüyu züpawu?”

¹⁴Daiolouzü sühisü mai thengou pha bue. Alia puh nou rozümai taohi paoe, “Maikhemai taoye panou mai raingou-ngou phanou meme souloua kou buloukhaio.”

¹⁵Alia puletao nou sübüa souloure ea puletao hrülaiye panou kou buloure.

¹⁶Alia raokhaopho angouna ea khah ahai nasü poloua puhnou rakihi pheloure, alia hapeiwu-a sütaosü soukhore, alia sütaosü maikhemai taohi pozhihpei loure donou rozümai taohi peire.

¹⁷Alia maikhemai hrülainou touloua pou phoukhai loure. Alia rozümaitao nou tashu toushoyu koulih taohai sülai kiahai kodzüloue.

¹⁸Vuhliki sü Jisu nou khei-a veachi pao-a buyu hinou ea puh vei rozümai taonou puhye koa buyu hinou puhnou puletao hi noue, “Maikhe mainou Eye nou thaohtou-a paowe?”

¹⁹Alia puletao nou chila peie, “Kamainou Johan Baptist touwe; ana kukhenou Elijah tea paowe ea kukhe mainou dao raichoki rachi paola maili hridashu loure tea paowe.”

²⁰Alia puhnou puletao hi noue, “Ana neletaowo Eye nou thaohtoue?” Pitar nou chila peie, “Newo Ramai vei Razhepu nasüe.”

²¹Süthaisü puhnou puletao hi sünahai maitalihi-a paokhaiso tea soutaosou kharochi peiwuyu thaisü

²²haibüa paoe, “Mai Nahpoutu sü alaosou veavu zülai, alia tsümai taonou, napao adumai taonou ea razhai dou-apeimai taonou motou vuzülai, alia puhye southealai, ana puhsü teithe asü kisü hrida shuloulai.”

²³Alia puhnou puletao hrülaihi paoe, “Maita linou Athai fünü louzü, puh lahnou puhye motulo, alia teisanou puhvei kros pfüloua Athai fülo.

²⁴Daiolouzü maitalia lah puhvei hrirai khailulounü louzü süsü halai; ana maita linou Eye donou puhvei hrirai halouzü, süsü puhnou khailuloulai.

²⁵Daiolouzü mailinou deiphao teitei koloukhaia lah puh ha-kalouzü puhye donou dai zhiyu bue?

²⁶Daiolouzü maitamai linou Avanou ea Avei chipaotao vanou ahrao louzü, puhye donou-a Mai Nahpoutu nou puhvei, Puovei ea sheeyu rakivamaitao vei khouko ava hinou veyu kisü ahraolai.

²⁷Ana chekhaoa Enou neletao hi paowe, Ramai vedei ngaomosa koute thailai moyu mai kamaisü haihi la-a bue.”

²⁸Chuo sübüa chi sütao paowuyu teithe acha thaisü Jisu nou puhye koa Pitar, Johan ea Jems ye saloua veachi paore donou deichi hi tapare.

²⁹Alia puhnou veachi pao-a buyu hinou puh zhu sü datare, alia puhvei sahnüsü kaathou peivava loure.

³⁰Alia zhukhaio, sühisü sükhaimoa mai ahai nou puhye koa chipha-a bue. Puhaisü Moses ea Elijah süe.

³¹Puhainou khouko ava hinou taveloua Jisu ye koa puhnou Jerusalem hinou tave thailoua Ramai vei li-choyu sü souvete laiyu vanou chipha-a bue.

³²Chuo Pitar ea puhye koa buyu mai taosü zhitei tare, alia puletao nou kaishuyu kisü, puletao nou Jisu vei khouko ava ea puhye koa la-a buyu mai ahaiye ngaoloure.

³³Alia mai sühainou Jisu hinou tarata-a buyu pha hinou Pitar nou puh hi paoe, “Dou-apeio, Eletao nou haihi buyuhai daizhozhou veisa; Eletaoye panou repao asü, neye donou ali, Moses donou ali ea Elijah donou ali soukhaio.” (Puhnou paoyu sü daiye paosa touyu hai puhnou sümoe.)

³⁴Puhnou sübüa paobu kinou, teihao alinou kou puletaoye zhüloure; alia puletao nou teihao lekhehi loulouyu kisü puletaosü pisho loure.

³⁵Alia teihao süna hinou pailinou haibüa shala vewe, “Haisü Enou dolouyu Anah Poutue, puhnou paoyu keilo!”

³⁶Alia pai sünanou soyu thaisü Jisu likheithe buyu ngaolou baire. Alia rozümaitao nou sütao vanou hachilia paokhai moe ea teithe sütao hisü puletao nou ngaolouyu vanou hatalia maitalihi-a paongao khaimoe.

³⁷Thainaisho sü puletao nou deichi hinou takouyu kisü maikhemai alaosou Jisu ye tave daoe.

³⁸Alia zhukhaio, maisou hrohinou alinou shusoua raopae, “Dou-apeio! Enou nehinou Anahpoutuye zhupeire donou khowe, daiolouzü puh hai Avei likhuyu nahpoutue!

³⁹Alia zhukhaio, rashi alinou puhye nilouloua puhsü sübü hinou shusoua raopapawe ea puhnou tudzü lapamo koutesü sünanou puhye sü nitsütsüpei baiwe, alia puhye sü zhupeiwu-a puh hinou thaotanü khaimoa tabaiwe.

⁴⁰Enou ne rozümaitao hinou sünaye sü hulaipa peire donou khoe, ana puletao nou hupalou hore.”

⁴¹Jisu nou chila peie, “Oh lü hayu ea mah souyu maikha, teilepha kasho doua Enou neletaoye koa ea shamea zhoa bulai?” Süthaisü puhnou mai sünahi paoe, “Ne nahpoutuye haihi sakoukhaio.”

⁴²Alia nahpoutu sünanou sübüa takouyu hinou, rashi sünanou puhye soukhaoloua nitsütsü peire. Ana Jisu nou rashi sünaye tukha peiwu-a nahpoutu sünaye souvei peire.

⁴³Alia maikhemai hrülai sü Ramai vei dushoyu khoukona vanou khupasho loure. Ana puletao hrülainou Jisu nou souyu teitei vanou khupa-a buyu hinou, puhnou puhvei rozümai taohi paoe,

⁴⁴“Enou paopare chipao haitaosü neletao vei lekhehi soutaosoua khailoukhaiwo! Mainah Poutuye sü maikhemai bah hi thoupeiwulai.”

⁴⁵Ana paopeiyu ko süsü rozümaitao nou süloumoe, alia sünasü puletaoye panou sülou more donou puletao hinou kukhaire; alia puletao sü paopeiyu süna vanou puh hinou noure sü piloure.

⁴⁶Alia rozümaitao hrohinou thaohnou dukae touyu vanou veiva loure.

⁴⁷Ana Jisu nou puletao nou choyu sü sülouyu kisü, puhnou nahmai aliye saloua puh ngheikihi panou laloure,

⁴⁸alia puletao hi paoe, “Maitalinou nahmai hainaye Azhih hinou popei louzü, Eye popeiwe, alia Eye popeiyu maitalinou Eye seive peiyu puhye popeiwe; daiolouzü neletao hrülai hrohinou tai-noukayu puhnou dukayu nasüe.”

⁴⁹Johan nou chila peie, “Dou-apeio, mailinou nezhih hinou rashi hulai payu Eletao nou ngaoe, alia Eletao nou puhye nue, daiolouzü puhsü Eletao thaifüa tamoe.”

⁵⁰Ana Jisu nou puh hi paoe, “Puhye nuso; daiolouzü Eletaoye motou moyu puhsü Eletao donou baie.”

⁵¹Alia Jisu ye rakihi pokhewu laiyu teithe ngheikouyu kisü, puhnou Jerusalem hi tare donou le latouloua sühilo pah pfürei loure.

⁵²Alia puhnou puh jünou raia ko paolamaiye seitawure, alia puletao nou taloua puhye donou ha teitei souda loure Samaria nuh alihi taloure.

⁵³Ana puhnou Jerusalem hi taresü ngaoloua sühi buyu maikhemai taonou puhye shepeibae.

⁵⁴Alia puhvei rozümai Jems ea Johan nou sübüyu sü ngaoloua paoe, “Mapao, nenou Eletaoye panou raki hinou mei seikouloua puletaoye souhare khoyu züpawu?”

⁵⁵Ana Jisu nou reiveloua puletaoye züpeie. (Alia puhnou paoe, “Neletao hai kabüyu rako maisa touyu lah neletao nou sümoe; daiolouzü Mai Nahpoutu hai maikhemai vei ahri souhare donou vemoe, ana puletaoye khaipeire donou vebaie.”)

⁵⁶Süthaisü puletao sü kukhe nuh alihi tare.

⁵⁷Puletao nou sübüa ludu hinou tabukinou mai alinou tave Jisu hi paoe, “Nenou tayu buh takisü E-a nethai fülai.”

⁵⁸Alia Jisu nou puh hi paoe, “Lakhaotao-a puletao vei kulu bue, ea teihi raohou tao-a pheh bue, ana Mainah Poutuwo puhpei khüyu buh koute-a hae.”

⁵⁹Kukhe alihi puhnou paoe, “Athai fülo.” Ana mai sünanou paoe, “Mapao, raia Eye panou khaive Apuoye vuloukhaio.”

⁶⁰Ana Jisu nou puh hi chila peie, “Thaimaitaoye panou lah puletao vei thaimaiye sü vukhaio; ana neye donou louzü taloua Ramai vedei kosü paodou takhaio.”

⁶¹Kukhe alinou paoe, “Mapao, E nethai fülai; ana Eye panou raia tave Akihi buyu maitao hi tarare chi paokhaio.”

⁶²Jisu nou puh hi paoe, “Haphou polukhu thailo reive zhuyu mai talisü Ramai Vedei donou züdou moe.”