Read Poumei Naga PAODAKHAIYU CHIKHA 11 Bible Online

PAODAKHAIYU CHIKHA 11 - Poumei Naga bible

PAODAKHAIYU CHIKHA 11

¹“Teisa nou nevei Ramai MAPAO ye leshilo alia puh jüpa soulo, puh vei chikha alia kharochitao zülo.

²Neletao nahmaiye neletao Ramai MAPAO nou tukha tudee peiyu hai sümoe alia ngaomoe touyu zhou lilo: Puhvei adusho, khouko buyu puh bah, topayu puh baokao,

³Ejipt teidei hinou Ejipt mai veo Pharaoh hi alia puh teidei veishi hi puh vei khupayu vah alia shee soungaoyu,

⁴Ejipt reihmai hi, puletao rhei alia rheiluki taohi puhnou dai soupei touyu, puletao nou neletaoye ngoukouyuki kabüa Zai Ho dzü nou puletaoye küholou-a maopei-e alia MAPAO nou puletaoye teisanou soushi peire touyu,

⁵buh haihi velou mosasü puhnou neletao donou dai-e soupei-e touyu,

⁶alia Reuben ae Eliab nahpoutu Dathan alia Abiram hi puhnou dai soupeie touyu licholo; Israel mai nou buyu hrohinou deinou mü ngapalou-a puhai kikhamai veishi, puhai sahpao ae puhai vei na veishi hai zhaokhai loure touyu haitao sü neletao nahmaitao nou ngaomoe.

⁷Ana MAPAO nou souyu khupa vah haitao teitei ngaoyu sü neletao noue.

⁸“Südonou zhou Enou neletao hi peiyu kharochi taosü zütoulo, sükure toulouzü neletao Jordan rei tachopa teidei nasü poloulai.

⁹Alia MAPAO nou neletao poupao alia puletao tounah hi peilai tea paokhai touyu chonaodzü alia laivoudzü nou kübuyu teidei süna hinou hrüsho-a hrüloulai.

¹⁰Neletao nou talou polaiyu teidei haina hiolouzü neletao nou thao-a tapayu Ejipt raimoe, Ejipt hio neletao nou shiratai daothoue alia peida hi dzüzüyu büa phinou taidei-a dzü pove-e.

¹¹Ana neletao nou Jordan talalou polaiyu teidei hiolouzü teirü dzü nou tou-a hrülou veiyu deichi alia deikho khaibaie.

¹²Teidei haina hiolouzü neletao Ramai MAPAO nou zhupeia bubaie; po tashurai nou po akhai koutesü neletao Ramai MAPAO nou khopeia bubaie.

¹³“Südonou neletao Ramai MAPAO ye leshilo alia neletao tsüle, rako ae pfüchi veishi nou pothou puh kuvah soulo tea zhou Enou neletao hi peibuyu kharochi hai soutaosou zütou loure touyusho-o,

¹⁴kahou sümoa teirü hai puhnou neletao teidei hisü seive peilai, sübüa panou neletao teidei hisü thou, darkhashi alia oliv theadzü veishoa chachi loulai,

¹⁵alia puhnou neletao kikhaorü panou toure donou poudai veih heiphao peilai, sübüa neletao nou tounü sü ngaoloulai.

¹⁶Leikeilo, sükumore toulouzü neletao tsüle data-a rah kukheye thota louveie.

¹⁷Sübüa rah kukheye thotayuso, MAPAO sü neletao pei hi lekha nou meikei-a bubailai alia tei pa rümore donou alia dei hi shira taimou pamore donou teisü khubailai, alia MAPAO nou neletao hi peibuyu veishoyu teidei hinou neletao hai thasho-a hata bailai.

¹⁸“Chipao haitao hai ne tsüle hinou khaitou toulo, licholou süyu shee büa ne baohi nou khipalo alia nepu hinou phukhailo.

¹⁹Ki hinou buyu phaki-a, ludu hinou ta-a buki-a, zütayu teile hia alia kaishuyu phaki-a neletao nahmai hi ko haitao hai doupeio.

²⁰Sükhemai hai ne kikhu alia ne kikhou vahi rükhailo,

²¹Sükure toulouzü teinou dei jünou kububusa sü ne alia neletao nahmaitao hai MAPAO nou neletao poupao maitao hi peilai tea paodai khaitouyu teidei hinou hrüsho-a buloulai.

²²“Zhou Enou neletao hi pei-a buyu kharochitao - neletao Ramai MAPAO ye leshilo, puh vei ludu hinou talo alia puh hinou thaokhai moa nghitei bulo touyu tao hai soutaosoua zütou louyu thaio,

²³MAPAO nou neletao nghoujü nou tyahrü haitao veishi hulaikhai bailai alia neletao jünou duyu ae khouko buyu tyahrütao teidei sü neletao nou poloulai.

²⁴Neletao nou phi heaveyu buh veishi hai neletao vei soulai; neletao vei deidesü khekou radeiki hinou Lebanon hi khete alia Euphratis rei hinou teinghei loulo zai hi koutelai.

²⁵Maili noua neletaoye lashu dulou laimoe. Neletao Ramai MAPAO nou paodaikhai touyu büa teidei hai hi neletao nou tayu buh veishi hi pa neletaoye ngaopia heilai.

²⁶“Zhukhaio, zhou Enou neletao nghoujü hi shiha alia chaa popa khaiwe —

²⁷Zhou Enou peibuyu neletao Ramai MAPAO vei kharochi zülouzü shiha ngaolai;

²⁸ana neletao Ramai MAPAO vei kharochi züloumoa sümo buyu rah kukhe thaifü ta-a Enou kharochi peiyu hinou pfütho talouzü chaa ngaolai.

²⁹Neletao nou talou polou laiyu teidei hi neletao Ramai MAPAO nou neletaoye sa-a talouki, neletao nou Gerizim deichi hinou shiha taosü shapaolai alia Ebal deichi hinou chaa taosü shapaolai.

³⁰(Deichi haina ahai hai Jordan tachopa Gilgal pehao hi buyu Arabah hinou hrü buyu Kanaan mai deide hi Moreh hi dushoyu süübe tao pe hi teinghi loulaova ludu hilao nou bue.)

³¹Neletao Ramai MAPAO nou peilaiyu teidei nasü talou poloure donou neletao sü Jordan tacho payu laire. Neletao nou teidei süna polouyuki alia sühinou hrübuki,

³²veikhai mosou-a zhou Enou neletao nghoujü hi popa peibuyu kharochi alia chikhakhe zülo.