Read Poumei Naga PAODAKHAIYU CHIKHA 13 Bible Online

PAODAKHAIYU CHIKHA 13 - Poumei Naga bible

PAODAKHAIYU CHIKHA 13

¹“Neletao hrohinou rachipaola mai moa vepare hai mekou nou süngao pei-a alia neletao hi khupayu shee soungao-a moa paongao-a

²alia shee moa puhnou paoyu khupayu hai vetelou-a alia puhnou, ‘Eletao rah kukhe thaisü füta laikhe,’ alia rah sütao tholai khe tea paoyusho,

³neletao rachi paoyu moa me muyu süna chi keiso. Neletao Ramai MAPAO nou neletao tsüle hrü veishi nou neletao puhye leshi ho leshimoe touyu neletao le zhuwe.

⁴Neletao nou thaifüyu puh sü neletao Ramai MAPAO-e alia puhye pi-a tsükhoulo. Puh vei kharochi khesü khailo alia puh chi zülo; puh vah soulo alia puh hinou nghitei-a bulo.

⁵Süthai mah peilaiyu rachipaola mai moa me mu apeio sü southalai, daisounou touyuo neletaoye Ejipt teidei hinou sapa peiyu alia mai qila sou-a hrüyu teidei hinou vupa peiyu neletao Ramai MAPAO chi züba nou du-a ko paoe, neletao Ramai MAPAO nou kharochi peikhai touyu ludu hinou neletaoye süthaita mah peilai tea teyu vanou. Neletao hrohinou shiyu puhsü popa lailai.

⁶“Ne thaihou jürai nou moa ne nahpoutu moa ne nahnaotu, moa nenou leshiyu chapfü moa nenou nghikayu samai khamai nou kheikhei sou neye sei-a haibüa paolouzü, ‘Ahai koa nenou sümoyu ae nevei puopaoh maitao nou sümoyu rah kukhe thota bailaikhe,

⁷buh dou hinou ho nghiyu hinousa, ne pe hinou sühao buyu maikhe maitao rah sü thota laishe.

⁸Ana nevei tsüle hai puh hi peithouso moa puh chi keiso. Puhye zhuvea peiso, moa puhye vupa peiso.’

⁹Puletaoye sü southawo! Puletaoye chuh nou deithayu hisü nenou bah khathou raikailo, alia süthai sünou maikhe maiye panou deithawo.

¹⁰Puletaoye chuh nou deitha-o! daiolouzü puletao nou neye Ejipt teidei, mai qila souyu teidei hinou sapa peiyu nevei Ramai MAPAO hinou neye panou tarei tare donou puletao nou tewe.

¹¹Süthaisü Israel mai hrülai nou hai khesü choulai; puletao nou ngaopilai, alia haibüyu vah hai neletao hrohinou soupu laimoe.

¹²“Neletao vei Ramai MAPAO nou neletaoye panou hrüre donou peikhai touyu nuhdutao hinou maishimai kamai-a nou maikhe maiye panou raichoki neletao nou sükhai toumoyu rah kukhe thotare donou süthai mah tare touyu pai choulouzü,

¹⁴neletao nou soutaosou sünasü keinou touloua phoupalo; alia hai hai chekhaore ae ngaorayu vah haso hai neletao hrohinou bure touyu sho,

¹⁵nuhdu sühi hrüa buyu maikhe mai hrülai alia kikhaorü veishi nou khoche poloua souhakhai toulaio.

¹⁶Nuhdu sühinou hrüyu maitao vei na veishi sü poloua nuhdu vei kijü, maisou ludu hi pove jükhailo, alia sükhesü neletao nou neletao vei Ramai MAPAO hi meidei-a posheela peio. Teisa panou nuh sünasü soushi souha khai-a bailai, panou soushupu khaitoulai moe.

¹⁷Ramai nou aetimoyu nuh sünavei na ali koute-a pa neletao bah hi bulai moe, sükure toulouzü MAPAO nou puhvei lekha rarou nasü povai peiwua neletaoye zhuvea leshi peilai, alia neletao puopao hi paodaikhai touyu büa neletao maipei poupa loulai,

¹⁸daiolouzü neletao nou neletao vei Ramai MAPAO chi züyu vanou, zhou Enou neletao hi peiyu kharochi khesü soupfü louyu vanou alia puh nghoujü hinou kaozüna soulouyu vanou.