Read Poumei Naga PAODAKHAIYU CHIKHA 14 Bible Online

PAODAKHAIYU CHIKHA 14 - Poumei Naga bible

PAODAKHAIYU CHIKHA 14

¹“Neletao hai Ramai MAPAO vei nahmaitaoe. Südonou athaimai donou ne peishu biso moa haoso.

²Daiolouzü ne Ramai MAPAO hinou sheeyu maitaoe. Deiphao mai hrülai hrohinou puh vei muh teishoyu mai pa soure donou MAPAO nou neletaoye sü dopaloure.

³“Ngaorayu tousho alikhei-a touso.

⁴Hrikhaona haitao hai neletao nou toulou veie: Chode, zhaotu, nghitu,

⁵khoh-shu, shuchü, renghitu, lü, alia rekou buyu zhaotu,

⁶phimou pfüyu alia tolayu hrikhaona taralia neletao nou toulou veie.

⁷Ana tola buyu alia phimou pfüyu racho, lazhao moa zhaorao haitao hai neletao nou toulai moe. Haitao hai tolama, phimou pemoe; südonou haitao hai sheemoyu khaonae.

⁸Vo-a sheemoe, puh hai phimou pe-ama tola moe. Vosou hai neletao nou toulai moe, moa vo thaiphao hai dei-a deilai moe.

⁹“Dzü hinou hrüyu shaoh pfüyu alia kao pfüyu khaona tali hai neletao nou tou-a bailai.

¹⁰Ana shaoh ae kao pfümoyu tao hai neletao nou toulai moe; daiolouzü haitao hai sheemoe.

¹¹“Sheeyu raohou taralia neletao nou tou-a bailai.

¹²Ana haitao hai touso; lükhana, rashopeiki,

¹³kheiti, vaoche alia raohou kukhe nütouyu raohou veishi,

¹⁴vo tya veishi,

¹⁵tuturu, khebo, kutu, dzü raohou, lüche tya veishi,

¹⁶khebo taitya, khebo dutya, dzü houpei,

¹⁷dzülü houpei, dzüraohou tesho.

¹⁸vou, dzü raohou touyu veishi, peiyao pfüyu raohou alia zhaoko haitao hai touso.

¹⁹“Shouh pfüyu khaona taitya teitei hai sheemoe, sütao hai touso.

²⁰Ana sheeyu khaona shouh pfü-a buyuma, neletao nou tou-a bailai.

²¹“Lah thaiyu soukhaona hai touso. Neletao nuhdu hinou buyu shetumai hi neletao nou peio alia puhnou tou-a bailai. Ana neletao louzü Ramai MAPAO hinou sheeyu maitaoe. “Zhaotu moa nghitu toutu hai pfü vei naodzü koa khotouso.

²²“Popachü neletao ludou hinou chilou valouyu veishi zha kirou hinou zhali pokupa khaivu zülai.

²³Neletao vei thou, darkha dzü, theadzü, alia chokho zhaokho hinou tou touraikayu haitao hai neletao Ramai MAPAO nou puh zhih pa tsükhou-a buloure donou dopakhai touyu buh hinou MAPAO nghoujü hinou toulai, sükure tulouzü neletao nou neletao Ramai MAPAO teisa nou pi-a tsükhouyu douloulai.

²⁴Ana buh hai doulere toulouzü alia neletao Ramai MAPAO nou neletaoye hapei khaitoua alia nevei peire natao hai pfüvelou hore toulouzü, haibüa soupfülo:

²⁵Nevei peire natao hai zholoua sana pousha sünou neletao Ramai MAPAO nou dopa khaiyu buh hisü zha kirou hinou ali peire zhatao hai pove thoupeio.

²⁶Pousha sünou poa ne jüpa sü hülo: kikhaorü, zhaotu, darkhadzü moa kukhe shiradzü, moa nenou jüpayu tyali hülo. Süsho ne alia ne kikhamai veishi nou ne Ramai MAPAO nghoujü hinou toulai alia savalai.

²⁷“Alia neletao nuhdu hinou hrübuyu Levi maitaoye ngaiso, daiolouzü puletao hai puletao vei teidei kaalo hae.

²⁸Po asü cheyu chüsü, po süna hi ngaolouyu thoudzü veishi hai neletao nuh hinou pove jükhaio.

²⁹Sükure toulouzü neletao nuh hinou hrübuyu Levi mai (teidei kaalo hayu maitao), alia shetumai, pfüpuo hamai alia mimeamai hrülai tave toulou shulai alia pouphou rekhalai, alia sükoulouzü neletao Ramai MAPAO nou neletao nou vah souyu veishi hi ha peilai.