Read Poumei Naga PAODAKHAIYU CHIKHA 15 Bible Online

PAODAKHAIYU CHIKHA 15 - Poumei Naga bible

PAODAKHAIYU CHIKHA 15

¹“Po anai cheyu kousü neletao vei paohzho pfüyu khesü khaipeilai.

²Süsü haizhai büa soulo: Sana pouhpao souyu puhnou puh khamai Israel mai hi poupeikhai touyu paoh hai khaipeilai. Puh khamai Israel mai moa thaihou-jürai mai hinou paoh khapeiyu darka laimoe, daisounou touyuo paoh hapeiyu MAPAO vei teile hai shapao pare.

³Vakou shetumai nou paoh khapeiyu ko-a malae, ana ne thaihou jürai mainou ne paoh tali pfüyu hai hakhai peilai.

⁴“Neletao hrohi toure hayu mai pa bulai moe, daiolouzü neletao Ramai MAPAO nou neletao hi kaalo peiyu teidei hinou neletaoye shiha peilai,

⁵neletao nou neletao Ramai MAPAO chi zütou toulo alia zhou Enou neletao hi peiyu kharochitao soutaosou zütou toulo.

⁶Daiolouzü neletao Ramai MAPAO nou paokhai touyu büa puhnou neletaoye shiha peilai alia neletao nou tyahrü kukhe hi pou-pao soupeilai, ana puletao hinou neletao hai poupao soulai moe. Neletao nou tyahrü kukhe pei hi khasa hrülai, ana puletaoye panou neletao pei hi khasa hrülai moe.

⁷“Neletao Ramai MAPAO nou neletao hi peikhai touyu teidei hi buyu nuhdu tali hinou ne thaihou jürai mai hrohinou toure hayu mai bulouzü, touha buyu ne thaihou jürai hisü ngaophou moyu souso moa bah khetei touso.

⁸Sükure thaosü bah ka-a bah sho-a puletao nou koyu veishi poupao soupeio.

⁹Paoh hapei laiyu po anai nasü nghi teire, südonou touha-a buyu ne thaihou jürai hisü poupao soupei khailai more alia halia peikhailai more tea tei-a tsüshi cho-a neletao hi pa hashi lou bulouso. Puletao nou MAPAO hi kra-a neye paoshi louzü nenou mah hai pfülai.

¹⁰Puh hisü lelavei-a peikhaio alia lengai-a chüroso, sükulouzü ne Ramai MAPAO nou nevei vah veishi hi alia ne bah thaithou vah souyu veishi hi shiha peilai.

¹¹Deiphao hisü teisa nou touhamai bulai, südonou ne thaihou jürai mai hi alia neletao vei teidei hi buyu touhamai hisü bah süh-a lela veilo tea Enou neletao hi kharochi peiwe.

¹²“Israel maipouli moa Israel maipfüli nou ne hi zhothou peiwua puhnou po arou hai ne vah soupeire toulouzü, po anai chena hisü puhye phapeia pa lahdosou talai.

¹³Alia nenou puh phapeiyu phaki, puhye panou bah sakhai-a seitaso.

¹⁴Nevei zhaokho hinou, nevei thoudayu thai hinou, alia nevei darkhadzü süyu buh hinou ne bah sü du-a puhye peio. Ne Ramai MAPAO nou neye shiha peiyu büa puhye peio.

¹⁵Ejipt teidei hinou neletao hai mai qila souwe touyu licholo alia ne Ramai MAPAO nou neletaoye vupa peie; südonou zhou Enou neletao hi kharochi haitao peiwe.

¹⁶“Ana nevei qila nou ne alia nevei kikhamai leshi-a alia neye thaosho-a Ewo neye thaota laimoe tea puhnou paolouzü,

¹⁷pi polou-a nou voukhai touyu qulu hinou raopopa kikhu hi raokhai-o, süthaisü puh hai thaimosa ne qila soua bailai.

¹⁸Qila maiye panou lahdo soua tayu hai tatei shoyu ali-e tea tsüchoso, daiolouzü puhnou po arou hai ne vah souyu hai kilai maiye ngayu muh dali phae. Südonou Ramai MAPAO nou nenou souyu vah veishi hi hapeilai.

¹⁹“Ne chokhome alia zhaokhome hinou toutu touraikayu de/pou nahai ne Ramai MAPAO donou dokupa khailo. Tourai kayu chode nahai pa tatasou, alia tourai kayu zhaotsü nahai mai saiso.

²⁰Sütao hai popachü neletao Ramai MAPAO nou dopa louyu buh hinou puh nghoujü hinou ne alia ne kikhamai nou toulai.

²¹Khaoheina hi chaatao louzü, shovai ho moa nghicha louzü, moa veimoyu sou tali taolouzü, nenou süna hai ne Ramai MAPAO hi paosheela peilai moe.

²²Süna hai nenou ne ki hinou toua bailai. Neletao nou khohshu sou touyu büa naanou hinou sheeyu sheemoyu mai taralia toua bailai.

²³Ana zhe hai neletao nou toulai moe, dzü büa deiphi hi lapa laio.