Read Poumei Naga PAODAKHAIYU CHIKHA 16 Bible Online

PAODAKHAIYU CHIKHA 16 - Poumei Naga bible

PAODAKHAIYU CHIKHA 16

¹“Neletao nou tachopa nüh hai neletao Ramai MAPAO ye tsükhou zhai hinou Abib khouh hinou nüh nülo; daiolouzü Abib khouh hinou puhnou neletaoye sü Ejipt teidei hinou kheinou sapa peie.

²MAPAO nou puh zhih pa bure donou doulouyu buh hinou hrikhaona ali hai ne chokho moa zhaokho me hinou polou-a ne Ramai MAPAO hi tachopa louyu asheela sou-a posheela peio.

³Sou hai khei thoua soukhai touyu raokhao koa touso. Teithe anai koute hai khei thoumoyu raokhao nou tou-o, veahoyu raokhao, daiolouzü neletao nou Ejipt hinou tapayuki thararanou Ejipt hai thao-a ta-e touyu pa teisa liloure donou.

⁴Neletao teidei veishi hi teithe anai hai khei touyu hai maitali ki hia pa buso. Teithe raikayu koukhe Ramai hi posheelayu sou hai titouli-a pa thainesho shona lipa buso.

⁵“Neletao Ramai MAPAO nou neletao hi peikhai touyu nuhdutao tali hinou pa Tachopa Nüh vei sheelana hai poa sheela laimoe.

⁶Puhnou puh zhih pa bure donou dopalouyu buh likhei hinou posheela bailai. Buh sühinou koukhedao teinghi loulai, Ejipt hinou neletao taratayu teile phaki tachonü vei posheela soulai.

⁷Neletao Ramai MAPAO nou dopei khaitouyu buh hinou sou nasü kholoua toulo; süthaisü thainaisho shona neletao ki hi dakhai velou bailai.

⁸Teithe arou sü neletao nou khei thoumoyu raokhao nou toulai alia teithe anai zhou sü neletao Ramai MAPAO hi tave jülai alia vah lia soulai moe.

⁹“Kaihnou lu rou vatayu teithe hinou po-a hapta anai cholo.

¹⁰Süthaisü neletao Ramai MAPAO nou neletao hi shiha peiyu thaifüa lahkuku nou jupa hinou posheela-a Chachi nüh sü nülai.

¹¹Neletao Ramai MAPAO nou puh zhih pa bure donou dopalaiyu buh hinou, ne, ne nah poututao, ne nahnaotutao, ne kilai naotu maitao, nikilai poutu maitao, nevei nuhdu hi buyu Levi maitao, alia shetu maitaio, alia neletao hrohinou buyu pfüpuo hamaitao alia mimea maitao koa MAPAO nghoujü hinou nüh nü zholai.

¹²Neletao hai Ejipt hinou mai qila soue touyu tsülo alia kharochi haitao hai soutaosou-a zütou toulo.

¹³“Lu chachi chelouyu thai alia darkha hailou thai, teithe anai hai Sahpao nüh nüo.

¹⁴Khonü hisü ne, ne nahmaitao, ne kilai maitao, Levi maitao, shetumaitao, pfüpuo hayu maitao ae mimea maitao koa sava zholo.

¹⁵MAPAO nou dolouyu buh hinou khonü sü teithe anai hai neletao Ramai MAPAO ye tsükhou hinou nüh nülo. Daiolouzü neletao Ramai MAPAO nou nevei chamou veishi hai shiha peie, alia neletao nou souyu vah teitei hisü hapeie.

¹⁶“Neletao Ramai MAPAO nou dopa louyu buh hinou poutumai touyu hrülai, po ali hinou bakha asü hai MAPAO nghoujü hi velai; khei thoumoyu raokhao nüh, Chachi louyu nüh, ae Sahpao nüh. Mai li-a MAPAO nghoujü hi bah sa-a velaimoe,

¹⁷Ne Ramai MAPAO nou hapeiyu thaifü-a neletao mai lily nou peilou süyu sapeina khesü pove peilai.

¹⁸“Neletao Ramai MAPAO nou neletao hi peilaiyu nuhdu teitei hinou khü khü vei peikhomai alia chilou kupeimai dopa khailo, alia puletaoye sü panou kaozü hinou maikhe maiye peipha peilai.

¹⁹Checheyu nasü podalaiso moa soukuso. Seihla poso, daiolouzü seihla nou tsüvei mai nghithou soucha peiwe alia cheche maivei chipao sü porei peiwe.

²⁰Acheche thaisü fülo alia checheyu vah likhei souloua baio, sükure toulouzü neletao hriloulai alia neletao Ramai MAPAO nou neletao hi peiyu teidei nasü poloulai.

²¹“Neletao nou neletao Ramai MAPAO vei rathobu soupayu phaki, süpehao hi Asherah rapfüpai vei sheeyu süü taralia shukhaiso.

²²Alia bashara taralia khaiso, daiolouzü süsü neletao Ramai MAPAO nou ngaorae.