Read Poumei Naga PAODAKHAIYU CHIKHA 17 Bible Online

PAODAKHAIYU CHIKHA 17 - Poumei Naga bible

PAODAKHAIYU CHIKHA 17

¹“Chaa taoyu hrikhaona taralia poa neletao Ramai MAPAO hi posheelaso, daiolouzü hai puhnou ngaorae.

²“MAPAO nou neletao hi peikhai touyu nuhdutao hinou neletaoye koa hrüyu poutumai moa naotumai talinou MAPAO vei vo pfütho-a puh nghoujü hinou vah ashi sou-a ngaoloure toulouzü,

³alia Enou paoyu bümoa, rah kukhe tho-a pei pfüa nakou khurü louzü, moa teinghei hi moa khouh hi moa teivuhye thota louzü,

⁴alia haihai ne hi chouvere toulouzü, soutaosou-a noutou toulou-a phoupalo. Haihai chekhaore toulouzü alia haibüa ngaorayu vah hai Israel mai hrohinou souchekhaore touyu thai-o,

⁵sübüa vah ashi soubuyu poutu moa naotu puhsü nuh romü hi saloulo, alia mai süna hai chuh nou deitha-o.

⁶Mai ahai moa mai asü shaki bulai nou puhye sü southalai, ana shakimai hai alikhei bailouzü puhye sü southalai moe.

⁷Shaki soumai nanou bakha kharailai, süthaisü mai hrülai nou bakha khathoulai. Haibüa ashi vah souyu hai neletao hrohinou popa laivuzülai.

⁸“Maiye southayu vanou, mahzü zhupeio tea khoyu vanou moa taidayu vanou neletao nou chi kudelou hoyu shaba ashi talia vedao louzü, chilou sütao hai neletao vei Ramai MAPAO nou dopa khaiyu buh hi pove khaio.

⁹Levi vei napao maitao, alia süteile hi chikuyu maitaoye panou puletao vei chi sü kude peio.

¹⁰MAPAO nou dolou laiyu buh sühinou chikude peiyu thaifüa neletao nou poa vah soulo, puletao nou neletaoye haibüa soulo tea paopeiyu veishi sü soutaosou zütoulo.

¹¹Puletao nou neletao hi chikha doupeiyu thaifüa alia puletao nou neletao hi paoyu büa bakha zhoulao moa bakha nalao tarei taso.

¹²Chikuyu mai moa neletao vei Ramai MAPAO hi naanou sou-a la-a buyu napao maivei chi züba-a khaityayu maiye sü southalai. Isreal mai hrohinou ashi nasü neletao nou soushee vuzülai.

¹³Süthaisü mai hrülai nou chouloua ngaopilai, alia khaitya-a chi zübapu khailai moe.

¹⁴“Neletao vei Ramai MAPAO nou neletao hi peikhai touyu teidei hi neletao nou talouyuki alia süna polouyu phaki alia sühinou ve hrülouyu thai, neletao vei pehao hinou sühao buyu tyahrü kukhe mai büa veo sü jüpawe tea neletao nou dopa loulai.

¹⁵Neletao vei Ramai MAPAO nou dolouyu mainou pa neletao vei veo soure donou dolo. Puh hai neletao vei thaihou jürai maitao hrohinou bailai, vakou mai moa shetumaiye panou neletao vei veo sü soulai moe.

¹⁶Veo sü lah puhye donou rhei taoli khailai moe moa rhei poloure donou maikhe maiye Ejipt hi seidakhai koulai moe, daiolouzü MAPAO nou neletao hi haibüa paore, ‘Neletao nou ludu süna hi dakhai tapukhai toulai moe.’

¹⁷Veo sü panou chapfü taoli nalai moe, daiolouzü puhye MAPAO hinou sümah poa tashulai. Puh hai pousha sana pouyu pojükhailai moe.

¹⁸Puhnou vekou louyu phaki, Levi mai napao hinou polouyu Ramai vei chikha larübvü ali hai pore donou rüpa khailoulai.

¹⁹Hai nasü puh hi khailai alia puh hribuki sasü puhnou phoulai, sükure toulouzü puhnou Ramai MAPAO ye tsükhou loulai alia chikha ae kharochi haitao veishi hai puhnou soutaosou züa buloulai.

²⁰Haibüa soulouzü puhnou puh thaihou jürai maitao jünou puh-a veipu hie tea choloulai, alia MAPAO vei chikha hinou bakha zhoulao moa nalaova tarei talai moe. Süthaisü puh nou po teile taoli hai veo souloulai, alia puhvei tyaonah maitao nou khaphao taoli hai Israel maiye khasa-a hrüloulai.