Read Poumei Naga PAODAKHAIYU CHIKHA 19 Bible Online

PAODAKHAIYU CHIKHA 19 - Poumei Naga bible

PAODAKHAIYU CHIKHA 19

¹“Neletaoye peilaiyu teidei hinou hrübuyu tyahrütaoye neletao vei Ramai MAPAO nou souhalaiyu phaki, ae neletao nou puletaoye hulaiyuki alia puletao vei nuhdutao ae kitao hi neletao nou ve bulouyu phaki,

²neletao vei Ramai MAPAO nou neletao vei soure donou peikhai touyu teidei hinou nuhdu asü hai pokupa khailo.

³Nuhdu sütao hi ludu vave thoulo, alia neletao Ramai MAPAO nou neletao vei soure donou peikhai touyu teidei sü zha asü sou-a dadelo, sübüa maiye southayu maiye panou nuhdu sütao hi tuve bailoulai.

⁴Ngaoba zhuba hinou moa puhnou soumah souzha louyu hinou maiye southa louzü, puhnou nuhdu sütao hi tuve bailoua bailai.

⁵Phazü, mai alinou puh kinapaye koa süü raore donou vaohro hi tayu phaki, puhnou süü vikaolai tea viyu hinou puhvei reipha zhoupa lounou puh kinapaye pheapei-a thaire toulouzü, mai sünanou nuhdu haitao ali hi tuve bailou veie.

⁶Sükumo louzü, khüngu phouyu mainou rarou-a puhye ngoushulai, ludu doule shoko-o puh jünou ngouve railou shulai alia puhnou puh kinapaye rai-a ngaoba zhuba hayu vanou puhye southa zümoa buyuma, puhye southa shulai.

⁷Süvanou neletao donou nuhdu asü pokupa khailo tea Enou paoe.

⁸“Ne puopao hi Ramai MAPAO nou paodaiyu thaifüa neletao vei teidei hai puhnou soukapa peire toulouzü alia puhnou neletao hi paokhai touyu veishi hai neletao hi peire touyu sho-o,

⁹nuhdu asü hai neletao nou dopa khaipulo. (Zhou Enou neletao hi neletao vei Ramai MAPAO ye leshilo ae puhvei chikha khesü zülo tea kharochi peiyu veishi hai neletao nou züloure toulouzü puhnou neletao hisü teidei sütao hai peilai.)

¹⁰Haihai soulo, sükure toulouzü neletao vei Ramai MAPAO nou neletao hi peikhaiyu teidei hinou mah hayu maiye zhe soukou khailai moe, alia sübüa neletao nou maiye dathayu mah sü pfülai moe.

¹¹“Ana mai ali nou puhvei kinapa maiye ngaora-a alia southalai tea daloua southa louzü, ae süthaisü puhnou nuhdu haitao ali hi tuve buloure toulouzü,

¹²puhnou hrüyu nuh hi tsümaitao nou puhye phouve sa-a dakhaive loulai, alia puhnou southa khaitouyu mai navei kityarai mai bah hisü puhye thoupeiwua panou puhye sü southalai.

¹³Puhye zhuvea peiso. Mah hayu maiye southayu mah hai Israel mai hrohinou neletao nou popalailai, sükure toulouzü neletao hai kaozhou vei-a buloulai.

¹⁴“Neletao vei Ramai MAPAO nou neletao hi peikhai touyu teidei hisü, neletao nou neletao vei kinapa maivei teidei rai hai tailai moe.

¹⁵“Mai ali nou mahmo kaozü moyu soure tea duyu hi mai alikhei vei shaki hinou kaore tea polai moe. Kabüa vepare touyu hai shaki mai ahai moa asü hinou keilai.

¹⁶Mai linou ngaoba-a dashaki pei-a mai ali hi mah paodu louzü,

¹⁷züveiyu puhai mai ahai nou MAPAO nghoujü hinou, napao alia süteile hi chiku peiyu mai nghoujü hinou ve lalai.

¹⁸Chiku maitao nou soutaosou noulai; alia puhnou puhvei thaihou-jürai hi dashaki peiwe touyu süloure toulouzü,

¹⁹mai süna hai dashaki peiyu vanou tudeeyu sü ngaolai. Haibüa neletao hrohinou hashi khesü popa laiwulai.

²⁰Süthaisü mai hrülai nou choulai, alia puletao nou ngaopilai, alia haibüa shiyu vah hai puletao nou soupu khailai moe.

²¹Sübüyu hisü zhuvea leshi peiso; tudeeyu zhai sü kabülai toulouzü: hrirai nou hrirai, ngheithou nou ngheithou, hu nou hu, bah nou bah, alia phi louzü phi noulai.