Read Poumei Naga PAODAKHAIYU CHIKHA 21 Bible Online

PAODAKHAIYU CHIKHA 21 - Poumei Naga bible

PAODAKHAIYU CHIKHA 21

¹“Ne Ramai MAPAO nou neletao hi peikhaitouyu teidei hi ludou hinou maita liye datha khaitoua nou ngaolouzü alia thaonou southa-e touyu sümore toulouzü,

²tsükhemai alia süthaiyu maitao nou taho nuh kana hinou thaiphao sü nghikae touyu hai doulai.

³Süthaisü thaiphao nghika buyu nuh hi tsümaitao nou sa tata khaimoyu alia kou pfükhai moyu cholou ali poloulai,

⁴alia cholou sünasü laoküa soutoukhai moyu alia shira vupou daothou khaimoyu ae reitou dzü thekhai moa küa buyu deikho hi sakou loua cholou nasü ngu soudelai.

⁵Levi vei napao maitao-a sühisü talai, daiolouzü züveiyu vei chilou kuyu hisü puletao nou chide hai soupeilai. Neletao vei Ramai MAPAO nou puletaoye panou puhvei kuvah soure donou dopa khaitoue, ae neletaoye puhvei zhih hinou shiha peilai.

⁶Süthaisü thaiphao nghika-a buyu nuh hi tsümaitao nou deikho hinou southa khaitouyu cholou pei hisü puletao nou bahdzü teikhailai

⁷alia puletao nou haibüa paolai, ‘Etao bah nou zhe hai soupa moe ae thaonou haisü souwe touyu Etao nou sümoe.

⁸MAPAO, nenou Ejipt teidei hinou vupa peikhai touyu Etao Israel mai mah khaipeio. Mah hayu mai haina southayu vei mah hai Etao pei hi panou veso.’

⁹MAPAO nghoujü hinou dai nou kaowe touyu nasü neletao nou soulouyu vanou, mah hayu maiye southayu vei mah sü neletao hi velai more.

¹⁰“Neletao nou neletao ngaobamai hi taho reih soutayu phaki alia neletao Ramai MAPAO nou puletaoye neletao bah hi thoupeiyu phaki alia neletao nou puletaoye nüpoa tayuki,

¹¹nüpoa tayu maitao hrohinou hüveiyu naotumai louyu ngaolouzü alia puhye jüpa loure toulouzü, puhsü ne chapfü soure donou polou-a bailai.

¹²Puhye sü ne ki hi savelo alia pa puh pei sai-o, ae puhvei phichü bahchüa bei-o.

¹³Alia puhye nülouyu phaki puhnou nouyu sabanü taosü da-o. Puhnou ne ki hinou ve puh pfüpouye donou dongai pfü-a buyu khouhli payu shonou ne puhye nalai alia ne puh cha soulai ae puh hai ne chapfü soulai.

¹⁴Ana nenou puhye jüpa more toulouzü, puhye pa puhnou jüpayu buh hi ta-o. Ne puhye zholai moe alia qila mai ali büa poa vah soulai moe, daiolouzü nenou puhye sazü sabu peiwure.

¹⁵“Mai alinou chapfü ahai nalou-a chapfü ali leshilou ana ali paiye leshi more toulouzü, alia puh hai mai ahai hinou nahpoutu bukhei loure toulouzü, ana puhvei nahpoutu naraipu hai puhnou leshi moyu chapfü hinou nalouzü,

¹⁶puhnou puh vei kaalo hai puh nah maitao hi zhi peiyu phaki, nah tsünou ngaozüyu kaalo nasü puhnou leshiyu puh chapfü nou napeiyu puh nah napu hi peilai moe.

¹⁷Puhnou leshi moyu chapfüpai nah baiyuma, puhnou tsüyu thaifüa nah naraio vei kaalo nasü puh hi peilai. Mai taralia nahpoutu tsüna hisü puhnou ngaozü buyu thaifüa peilai.

¹⁸“Pfüpuo chi zübayu alia pfüpuo nou tukhayu phaki züba-a noukhou-a alia pfüpuoye duyu nahpoutu maitalia bue toulouzü,

¹⁹puh pfüpuo nou puhye süthailou-a nuh hi süthai-apei maitao bah hi save thoupeilai.

²⁰Puhai nou tsümaitao hi haibüa paolai, ‘Ahai nahpoutu haina hai noukhou-e alia pfüpuo-ye dua baire. Puh hai paochi züba-e. Puh hai kharochi züba-e, ae kinangi-a souha shore alia zhaoh shore.’

²¹Süthaisü nuh hi buyu maitao nou puhye chuh nou deithalai. Sübüa nenou ashi nasü neletao hinou souhalai. Hai hai Israel mai veishi nou choulai alia ngaopilai.

²²“Mai talia mah souyu vanou thaizü-a southare toulouzü alia puh pfüphao hai süübe hinou daokhaire toulouzü,

²³neletao puhvei thaiphao hai kheimathe süübe hinou daokhaiso. Puhye southayu teithe hinou daovu peiwulai, daiolouzü süübe hinou daotha khaitouyu mai tali hai Ramai chaa ngaoyu mai-e. Neletao Ramai MAPAO nou neletao hi veisho-a peikhai touyu teidei hai neletao nou souzhai soushiso.