Read Poumei Naga PAODAKHAIYU CHIKHA 23 Bible Online

PAODAKHAIYU CHIKHA 23 - Poumei Naga bible

PAODAKHAIYU CHIKHA 23

¹“Jütouyu mai moa che rodeyu mai hai MAPAO vei maime hi pa loulai moe.

²“Khana maili moa puh nahmai tyaomai, tyaosholea kirou koute hai pa MAPAO vei maime hi loulai moe.

³“Ammon mai moa Moab mai, moa puletao vei tyaosholea kirou koute-a pa MAPAO vei maime hi loulai moe.

⁴Daiolouzü neletao nou Ejipt hinou tapayu phaki, puletao nou raokhao alia dzü poa neletaoye takou sümoe. Sükure thaosü, neletaoye pa chaa peire donou Mesopotamia teidei hi buyu Pithor nuhdu hinou Beor nahpoutu Balaam-ye puletao nou ngaloure.

⁵Sükuyuma, Balaam chi sü neletao vei Ramai MAPAO nou keinou peimoe; anou chaa sü shiha hi souda thoupeie, daisounou touyuo neletao Ramai MAPAO nou neletaoye leshie.

⁶Neletao hribusa puletaoye koa vo souso.

⁷“Edom maiye ngaoraso, daiolouzü puletao hai neletao vei thaihou jürai baie. Ejipt maiye ngaoraso, daiolouzü neletao nou teile ali hi puletao vei teidei hinou hrüe.

⁸Puletao hinou naveyu maiphao asü thaio louzü, puletaoye MAPAO vei maime hi pa loua bailai.

⁹“Neletao nou neletao ngaoba maiye reih soulai tea tave jüyu phaki, sheemoyu veishi hai reikei toulo.

¹⁰Neletao mai talinou kheiko naanou reilouho-a sheemore toulouzü, neletao nou vejüa buyu fühao hinou puhnou tapalou-a vakou nou pabulai.

¹¹Ana koukhe loure toulouzü lah puhye dzü khüshee loulai, alia teinghei lousho puletao nou vejüa buyu fühao hi khaivelou a bailai.

¹²“Neletao nou vejü buyu fühao vei vakou hinou teizüyu buh soukhailo.

¹³Neletao nou chaoyu phaki dei helou veiyu basei polou-a neletao nou chaoloure toulouzü deibvü raolou-a neletao vei bahzü sü daovu-o.

¹⁴Daiolouzü neletaoye vupeire donou alia neletao ngaobamai sü neletao bah hi thoupeire donou neletao vei Ramai MAPAO hai neletao vei fühao hinou koa bue, südonou neletao vei fühao sü sousheesha tea bulo. Neletao hrohinou zhaidou loumoyu vah haso soupeia panou MAPAO sü dakhai taso.

¹⁵“Qila maili ne hinou ve tutsüa bulouzü, puhye puhvei paopu hi peidakhaiso.

¹⁶Puhnou jüpayu nuh tarali hinou puhye pa neletaoye koa hrülo. Puhye souveaso.

¹⁷“Israel mai poutu moa naotumai taralinoua rathoki hi khakhamai panou soulai moe.

¹⁸Neletao vei Ramai MAPAO ki hisü haibüa kulouyu pousha nou paokhai touyu vei posheela sü pove peilai moe, daiolouzü neletao vei Ramai MAPAO nou rathoki hinou khakhayu sü ngaorae.

¹⁹“Neletao nou thaihou jürai mai hi pousha vea moa thou vea moa natali poupao sou-a vea soulou veiyu vea hai poso.

²⁰Sheshemai moa vakou mai hi louzü vea polou-a bailai, ana ne thaihou jürai Israel mai hi louzü polai moe, sükure toulouzü neletao nou talou polou laiyu teidei hinou neletao nou bah thaithou vah souyu veishi hai neletao vei Ramai MAPAO nou ha peilai.

²¹“Neletao vei Ramai MAPAO hi peilai tea neletao nou paokhai touyu nasü peinaso, daiolouzü neletao nou mülayu nasü neletao vei Ramai MAPAO nou veikhai mosou neletao hi kholai alia peimo louzü mah-e.

²²Ana neletao nou mü lümosho, neletao hai mah laimoe.

²³Ne mü hinou paokhai touyu veishi ne nou souvu zülai, daiolouzü ne münou neletao vei Ramai MAPAO hi nedo sou-a mü lüre.

²⁴“Neletao nou kinapa maivei darkha kipei hi talouyu phaki, neletao nou jüpa louzü darkha shithou veishi toukhailou-a bailai, ana ne sülai hi shithou lia haithouso.

²⁵Neletao nou kinapa vei southou lu hi talou louzü, ne bah nou southou peizü daolou-a bailai, ana labuyu puhvei southou be hai kai nou poa thouva laimoe.