Read Poumei Naga PAODAKHAIYU CHIKHA 25 Bible Online

PAODAKHAIYU CHIKHA 25 - Poumei Naga bible

PAODAKHAIYU CHIKHA 25

¹“Mai ahai hai hali saovaloua chikuyu phaki, chikuyu mainou mahzü zhulai, süthaisü thaonou kaoe alia thaonou mah-e touyu paopeilai.

²Mahyu naye taida peizü louzü, chikuyu mainou kouzülo tea paopeilai alia puh nghoujü hinou puhvei mah thaifüa süda dazü taosü cho-a dalai.

³Ana puh hisü süda raidai jünou la-a dalai moe, süjünou la-a dare toulouzü puh hai maisou nghoujü hinou haongu soupeiwure.

⁴“Chode ali hai thai hinou sa-a thoutaiyu phaki mü phukhaiso.

⁵“Chinamai ahai koa hrüzho buyu hinou, mai ali hai nahpoutu ha-a thaire toulouzü, puh chapfü hai kikhamai hi moa vakou mai ki pa nghita laimoe. Puh cha thaihou maili nou nealoulai alia cha thaihou moa jürai nou souzü vahtao sü soupeilai.

⁶Narai kayu nahpoutu nasü thaibuyu puh zhih pa polai, sükure toulouzü puh zhih hai Israel mai hrohinou tyaka laimoe.

⁷Ana thaita-a buyu thaihou nanou puh chiye nanü more toulouzü, naotupai nou taho nuhdu romü hinou tsükhemai hi paolai, ‘Acha thaihou nou puh jürai zhih sü Israel mai hrohinou pa bulaiyu soupei bare. Cha thaihou mainou chimai hi soupei laiyu vah nasü puh nou ahi soupei moe.’

⁸Süthaisü, nuh hi tsükhe mainou puhye kuloua paoyuma puhnou ‘E puhye nanü moe’ tea balouzü,

⁹puh jürai chapfü naye panou tsükhemai nghoujü hinou puh phikha ali paizhu loulai, puh pah hi taidzü süsho peilai alia haibüa paolai, ‘Jürai maivei kihikhamai soushu peilai moyu mai hi soulaiyu sü haire.’

¹⁰Mai süna hi hrüveyu taosholea hrülai hai ‘Mainou phikha paipa laipeiyu kikhamaitao’ tea Israel mai hrohinou sülai.

¹¹“Mai ahai davayuki, mai ali chapfü nou puh chasü mai bah hinou vupa peilai tea mou-a alia puhnou bah thaipa mai hona jü houre toulouzü,

¹²puh bah sü daodelaiwo, puhye zhuveaso.

¹³“Ne lekhabvü hisü süh douyu tyakuyu chuh ahai, ali süh ali thea khaiso.

¹⁴Ne ki hinou süh douyu bvü tyakuyu ahai - ali du, ali tai nou khaiso.

¹⁵Nevei süh douyu chuh alia douyu bvü hai le sheesha nou khailo, sükure toulouzü neletao Ramai MAPAO nou neletaoye peikhai touyu teidei hinou hrüsho-a hrülai.

¹⁶Daiolouzü doli dokai sou-a maivei haibüa latou lashoyu hai neletao Ramai MAPAO nou ngaorae.

¹⁷“Neletao nou Ejipt teidei hinou tapayuki ludu hinou Amalek mainou neletao hi dai-e soupei touyu liloukhaio.

¹⁸Neletao nou veachea alia hocheyuki, puletao nou neletaoye ludu hinou takou dao-a neletaoye reihsou-e alia lülou hoshoa thailo nou na-a tayu maitaoli daotha khaipeie, puletao hai Ramai ye ngaopi moe.

¹⁹Neletao Ramai MAPAO nou neletao hi peikhai touyu teidei hisü neletao nou talou poloua shochaoyu ngaoloure toulouzü, alia neletaoye ngaobamai veishi hinou kaozhou aveih ngaoloure toulouzü, Amalek maiye raki khenou pa lichopu more donou souhakhai touwo.