Read Poumei Naga PAODAKHAIYU CHIKHA 26 Bible Online

PAODAKHAIYU CHIKHA 26 - Poumei Naga bible

PAODAKHAIYU CHIKHA 26

¹“Neletao vei Ramai MAPAO nou neletao hi peilaiyu teidei hi talou louyu phaki alia teidei süna lou polou-a sühinou pfüsho louyuki,

²neletao vei Ramai MAPAO nou neletao hi peikhai touyu teidei hinou neletao nou daothou khaitouyu taimou hinou parai kayu moa kourai kayu shira daoli polo alia sülai hi pothoulo. Süso neletao vei Ramai MAPAO nou puh zhih pa bure donou dopei laiyu buh hisü potakhaio,

³alia süteile hi buyu napao hisü takoulou-a haibüa paolo, ‘MAPAO nou Eletao puopao hi peilai tea paodai khai touyu teidei hi E velou loure touyu zhou Enou Ramai MAPAO hi paopa ngaowe.’

⁴“Napao nou ne bah hinou sülai sü polou-a Ramai MAPAO vei posheelabu nghoujü hi pokou khaipeilai.

⁵Süthaisü Ramai MAPAO nghoujü hinou haibüa nenou paolai, ‘A puopao hai tasühao laiyu Aram maiye, alia puhnou mai daoti sa-a Ejipt hi taloue ae sühinou hrüe alia dushoyu, khouko bushoyu, ae mai poushoyu tyahrü ali souloue.

⁶Ana Ejipt mainou Etao hi maishi shoe, soupai louhoyu vah khouli Etao-ye pa sou-a souvea shopeie.

⁷Etao nou Etao puopao Ramai MAPAO hi kra-e, alia MAPAO nou Etao paikho choupeie, alia Etao veashoyu, vah teishoyu soua alia souvea shoyu puhnou ngaoe.

⁸Südonou MAPAO vei khoushoyu bahnou süthaipoa, khupasoua puh baokao khapa-a, khupayu shee soungao-a alia khupasou-a Etaoye Ejipt teidei hinou sapa peie.

⁹Puhnou Etaoye teidei haina hi save thoupeie alia chonaodzü ae laivoudzü nou küyu teidei haina hai Etao hi peie,

¹⁰alia Oh MAPAO, nenou ahi peikha touyu teidei hinou parai kayu shira khesü chuo Enou ne hi povewe.’ “Süthaisü sülai sü Ramai MAPAO nghoujü hi pokou jükhaio alia puh hi pei pfünakou khurüo.

¹¹Alia Ramai MAPAO nou ne alia ne kikhamai hi havei peikhai touyu veishi hinou ne alia Levimai alia neye koa hrübuyu shetu maitao kolinou sava zolai.

¹²“Po asü koh ngaolouyu veishi hinou zha kirou hinou zha ali hai popa kuloure toulouzü, pokupa khaitouyu taith sütao hai Levi mai, shetumai, pfüpuo hamai alia mimeamaiye leshi peilai, sükure toulouzü puletao-a neletao vei nuhdu hinou touso sü vasho toua nou bulai.

¹³Süthaisü nenou ne Ramai MAPAO hi haibüa paolai, ‘Nevei kharochi thaifüa, Ramai vei zhatao sü Enou aki hinou popaloua Levi mai, shetumai, pfüpuo hamai alia mimeamai taohi peire. Nevei kharochi hai Enou pfütho moe ae halia ngai-a ngaimoe.

¹⁴Enou dongai pfübu teile hi Ramai vei zhasü ali-a toulou moe, moa naanou hinou shee moa buyu teile hi Enou sühai ali-a deikhai moe, moa thaimai hi Enou hali-a posheela moe. Enou Ramai MAPAO chi sü züe; nenou ahi kharochi peiyu veishi Enou soure.

¹⁵Nenou sheeshoa buyu raki hinou zhukou peikhaio, alia nevei Israel maitaoye hapeio ae nenou Etao puopao hi paopeikhai touyu thaifüa Eletao hi peikhai touyu teidei, chonaodzü alia laivoudzü nou küyu teidei nasü hapeio.’

¹⁶“Zhou neletao Ramai MAPAO nou kharochi alia chikha haitao neletaoye zülo tea peia bue; südonou neletao vei tsüle ae hrü veishi alia rako lou-a sütao hai soutaosou-a reilo.

¹⁷MAPAO hai neletao Ramai-e touyu alia puhvei ludu hinou neletao nou talai touyu alia puhvei kharochi ae chikha khesü neletao nou khailai touyu, alia puh chi zülai touyu hai zhou teithe neletao nou paopare.

¹⁸Neletao hai zhou teithe MAPAO nou paokhai touyu büa puhvei mai soure donou popeiwure; ae neletaoye puhvei chikha khesü zülo tea zhou teithe kharochi peiwe.

¹⁹Mainou paoshoyu hinou, zhih tayu hinou alia tsükhouyu hinou puhnou soukhai touyu tyahrü veishi jünou cholea khaipeilai touyu alia puhnou paokhai daiyu büa neletao hai Ramai MAPAO hi sheeyu maitao soulai touyu hai puhnou paopare.”