Read Poumei Naga PAODAKHAIYU CHIKHA 27 Bible Online

PAODAKHAIYU CHIKHA 27 - Poumei Naga bible

PAODAKHAIYU CHIKHA 27

¹Moses alia Israel mai hi tsükhe maitao nou maikhe mai hi haibüa kharochi peie, “Zhou Enou neletao hi kharochi peiyutao veishi hai zütoulo.

²Jordan tachopa neletao Ramai MAPAO nou neletao hi peilaiyu teidei hi talou louyu phaki, chuhdu taoli khopalo alia souleisha khailo,

³alia chuh sütao hisü chikha ae paodou peiyu khesü rüthou khailo. Ramai MAPAO nou neletao puopao hi paokhai daiyu teidei, chonaodzü alia laivoudzü nou küa buyu teidei hi talou loure toulouzü,

⁴alia neletao nou Jordan tacho payuki, zhou Enou neletao hi kharochi peiyu büa, Ebal Deichipei hinou chuh sütao hai khokhailo alia naileisha khailo.

⁵Buh sühinou Ramai MAPAO ye posheelabu soukhailo, chuh sütao hai hu basei tali sühi po vah soulai moe.

⁶Neletao Ramai MAPAO vei posheelabu souyu chuh hai daphe loua soulai moe. Sühinou neletao nou Ramai MAPAO hisü meidei-a posheela nasü posheela peilai,

⁷ae sühinou ralea vei posheela nasü-a posheela peilai, alia neletao nou Ramai MAPAO nghoujü hinou nühnü-a sava khailai.

⁸Neletao nou khopakhai touyu chuh vahisü chikha haitao hai larücha shisha-a rükhailo.”

⁹Süthaisü Moses alia Levi vei napao maitao nou Israel mai hi paoe. “Nasha loukhaio, Oh Israel maitaore, alia keilo! Chuo neletao hai Ramai MAPAO vei mai soutare;

¹⁰südonou Ramai MAPAO chi zülo alia zhou Enou neletao hi peia buyu puhvei kharochi alia chikha khesü reitoulo.”

¹¹Süzhou teithe hinou Moses nou maikhe mai hi kharochi peie:

¹²Neletao nou Jordan tachopa louyu thai, maikhemai hapeire donou Gerizim deichi pei hinou khü haitao hai tapa lalai: Simeon, Levi, Judah, Issakar, Josef alia Benjamin.

¹³Alia maiye chaa peire donou Ebal Deichi pei hinou khü haitao nou tapa lalai: Reuben, Uad, Asher, Zebulun Dan alia Naphtali.

¹⁴Levi mainou pai kushoa Israel mai hi haibüa shalai:

¹⁵“MAPAO nou ngaorayu na - zhurai daomai alia bashara soumai, rah zhu daoyu bah alia sühai kheikhei souyu buh hi pothou khaiyu mai hai chaa ngaolai.” “Süthai mai hrülai nou ‘Amen’ tea paolai.

¹⁶“Pfüpuoye tsükho moyu maisü chaa ngaotheo.” “Süthaisü mai hrülai nou ‘Amen!’ tea paolai.

¹⁷“ ‘Kinapa deirai chuh phaodayu maisü chaa ngaotheo.’ “Süthai mai hrülai nou paolai, ‘Amen!’

¹⁸“ ‘Nghicha mai ludu samo peiyu mai chaa ngaotheo.’ “Süthai mai hrülai nou paolai, ‘Amen!’

¹⁹“ ‘Shetumai, pfüpuo hamai moa mimeamai vei chechemoa vah soumah peiyu mai sü chaa ngaotheo.’ “Süthai mai hrülai nou ‘Amen!’ tea paolai.

²⁰“ ‘Puomai chapfüye sazümai chaa ngaotheo, daiolouzü puhnou puh puo züh ngaophou moe.’ “Süthai mai hrülai nou paolai, ‘Amen!’

²¹“ ‘Khaohrinaye sazü sabuyu mai sü chaa ngaotheo.’ “Süthai mai hrülai nou paolai, ‘Amen!’

²²“Tupfü maiye, moa puh puo nahnaotu, moa puh pfü nahnaotu-ye sazü mai sü chaa ngaotheo.” “Süthai mai hrülai nou paolai, ‘Amen!’

²³“Nai sazüyu mai sü chaa ngaotheo.” “Süthai mai hrülai nou paolai. ‘Amen!’

²⁴“Puh kinapaye kheisou-a southa mai chaa ngaotheo” “Süthaisü mai hrülai nou ‘Amen!’ tea paolai.

²⁵“Mah hayu mai aliye southare donou seihla polouyu mai sü chaa ngaotheo.” “Süthaisü mai hrülai nou paolai, ‘Amen!’

²⁶“Ramai vei chikha ae paodou peiyu khesü zübayu mai hrülai sü chaa ngaotheo.” “Süthaisü mai hrülai nou paolai, ‘Amen!’