Read Poumei Naga PAODAKHAIYU CHIKHA 29 Bible Online

PAODAKHAIYU CHIKHA 29 - Poumei Naga bible

PAODAKHAIYU CHIKHA 29

¹Sinai Deichi hinou vo soupeikhai touyu pei hinou MAPAO nou Israel maiye koa Moab maivei teidei hinou koa vo soulo tea Moses hi paopeiyu taosü haitaoe.

²Moses nou Israel mai hrülaiye kuve jüloua puletao hi paoe, “MAPAO nou Ejipt hinou Pharaoh hi, puhvei peikhomaitao hi alia puhvei teidei veishi hi daie soupeie touyu teitei hai neletao nghithou nou ngaore.

³Tateishoa nou veahoyu, khupa shoyu vahkhe neletao nghithou vuzünou ngaore.

⁴Ana zhou koute MAPAO nou neletao hi sülou süyu tsüle, ngaolou süyu nghithou ae choulou süyu nou hai peimo hie.

⁵Enou po raidai neletaoye rekounou süthaisa-a tayu hisü neletao vei sabanü ae phikha khesü shita-a banoure hamoe,

⁶alia neletaoye panou toujü sojüyu sü ngaomoe, ana neletao nou darkayu teitei sü MAPAO nou neletao hi peie, daisounou touyuo neletaoye panou puh hai neletao Ramai nasüe touyu süloure donoue.

⁷Etao nou buh haihi veyu phaki, Heshbon hi veo Sihon alia Bashan hi veo Og nou tapa Etaoye reih soue, ana Etao nou puhai jünou reih veiloue.

⁸Puletao vei teidei hai Etao nou poloue alia teidei sütao hai Reuben mai, Gad mai alia Manasseh mai dali taohi kaalo phasoua peire.

⁹Südonou vo haina hai soutaosoua zütou toulo, sükure toulouzü neletao nou souyu vah teitei hi kaozhou veilai.

¹⁰“Zhou neletao mai hrülai hai neletao Ramai MAPAO nghoujü hinou labue — neletao vei süthai apei maitao, peichamai, tsümai, peikhomai, poutumai hrülai,

¹¹neletao nahmai, chapfü maitao, neletao hinou ve hrüa buyu vakou mai hrülai, süü raoyu ae dzü popeiyu mai hrülai koa labue.

¹²Zhou neletao Ramai MAPAO koa nou vo soure donou neletao hai hinou la-a bue, MAPAO ye koa vo soukhai touyu nasü neletao-a ae-ao soulo,

¹³sükulouzü puhnou neletao puopao Abraham, Isaak, ae Jakob hi apaokhai touyu thaifüa zhou neletao hai puhvei mai soure alia puh hai neletao Ramai soulai touyu nasü zhou süloulai.

¹⁴Enou zhou chaachou soua vo souyu hainasü neletao hi likhei koa soubai moe,

¹⁵vo hainasü zhou neletao Ramai MAPAO nghoujü hinou la-a buyu maitao hi likhei baimoe, ana zhou haihi koa bumoyu mai hrülai hia souwe.

¹⁶“Neletao nou kabüa Ejipt hinou hrüe touyu alia tyahrü taoli tachopoa ae vaohro nghihro hinou kabüa ta-e touyu ludu khesü süwe.

¹⁷Puletao vei ngaorayu bashara, süüchuh nou ae shahu ae sana nou soukhai touyu zhuraitao hai neletao nou ngaoe.

¹⁸Zhou teithe buh haihinou la-a buyu poutu moa naotu, moa kikhamai taralia neletao Ramai MAPAO hinou tareita-a tyahrü kukhe maitao vei ramaiye thota more donou tsüpfütou toulo. Sükumore toulouzü neletao hrohinou maiye kaithayu poumaa ashi tyachüpayu büa soushi shulai.

¹⁹Maitaralia zhou chaachou soua vo soukhai touyu haina chouloua buyuma, Ewo louzü Enou jüpa soupfüa buyuma veie tea tsüpfü peiso. Sübüyu maitaralia bulouzü, neletao mai hrülai nou souhakhai bailai.

²⁰Sübüyu puhye sü MAPAO nou khaipeinü laimoe. Puhvei lekha rarou hai mai süna hi bulai. Larübvü haihi rükhai touyu chaa veishi sü puh pei hi velai alia MAPAO nou puh zhih hai Raki khehinou popa laihlai.

²¹Chikha larübvü haihinou rükhai touyu vo vei chaatao thaifüa Israel mai hrohinou MAPAO nou puhye likhei souveare donou popa khailai.

²²“Bonakha hinou hrüvelaiyu nevei nahmaitao alia doushoyu teidei hinou veyu vakoumai nou haibüa MAPAO nou teidei sühi soushi khaitouyu ae veahoyu soupei khaitouyu khesü ve ngaolai.

²³Teidei teitei nou mei nou deilaiyu tai ae chuh data bailai. Sühi halia shothou laimoe, halia paopa laimoe, vudai poudai ali koute-a chüpa laimoe. Sühai MAPAO vei lekha rarou hinou souha laiyu Sodom ae Gomorrah, alia Admah ae Zeboüm bübailai.

²⁴Deiphao mai hrülai nou ‘Daisounou MAPAO nou teidei haina hai haibüa soupeiwe? Daisounou haizhou koute puh lekha rarou pasa?’ tea noulai.

²⁵Alia chila peire sü, ‘Puletao puopao Ramai MAPAO nou puletaoye Ejipt hinou sapopa peiyu phaki, puletao koa soukhai touyu vo nasü mai haitao nou pfüthoyu vanou she.

²⁶Puletao nou sümoyu rah kukhe, MAPAO nou thoso tea paopei khaitouyu ramai kukheye puletao nou thotare.

²⁷Südonou teidei süna hisü MAPAO vei lekha rarou sü vere, alia larübvü hi rüthoukhai touyu chaatao sü pove peire.

²⁸MAPAO vei lekha rarou hinou puletaoye sü puletao teidei hinou beimaa hinou paiphaloua tyahrü kukhe maivei teidei hisü laikhaiwure, zhou koute-a puletao nou sübüa bue.’

²⁹“Sümore donou kheikhei soua khaitouyu taohai Etao Ramai MAPAO veie, ana puhnou Chikha hinou popa süngao peikhai touyu taohai züloure donou teisa Etao nou alia Etao nahmaitao nou telai.