Read Poumei Naga PAODAKHAIYU CHIKHA 3 Bible Online

PAODAKHAIYU CHIKHA 3 - Poumei Naga bible

PAODAKHAIYU CHIKHA 3

¹“Süthaisü Etao nou Bashan hilo takheyu phaki, Bashan hi Veo Og nou puhvei reihmaitao saloua Etaoye Edrei nuhdupe hinou reih soue.

²Ana MAPAO nou ahi paoe, ‘Puhye ngaopiso, daiolouzü Enou puh, puhvei maitao alia puhvei teidei teitei sü ne hi peilai. Neletao nou Heshbon hi buyu Amor mai veo Sihon hi soupeiyu zhai büa puh hi-a soupeio.’

³“Südonou Etao Ramai MAPAO nou Bashan hi veo Og alia puhvei maitao teitei nou Etao bah hi thoupeie. Etao nou mai ali koute-a shopei moa puletaoye sü southakhai toure.

⁴Süteile hi Etao nou puhvei nuhdu teitei sü pokhai touloue. Bashan hi veo Og vei vedei, Argob tea kuyu deide hinou buyu nuhdu rairou taosü Etao nou poloue.

⁵Nuhdu haitao pehao teitei hisü kushoa nou bouvo hai veisho-a khokhaitoue, robomü hai-a veishoa nou southou khaitoue alia robomü hi khareih thouyu-a soukhaitoue. ae süpei hinou nuh taoli hai bouvo khomoa bue.

⁶Etao nou Heshbon veo Sihon hi soupeiyu bütoua nuhdu teitei sü souhapeie, alia sühi hrüa buyu naotu-poutu alia nahmai hrülai sü southa khaire.

⁷Ana Etao nou kikhaorü veishi ae nangi khesü poloue.

⁸“Süteile ki Etao nou Amor mai veo ahai hinou Jordan rei hinou teinghi palova buyu Arnon deikho hinou poa Hermon deichi koute hai poloue.

⁹(Sidon mainou Hermon Deichi hai Sirion tea kue; Amor mainou süsü Senir tea kuwe.)

¹⁰Etao nou Bashan hi veo Og vei vedei teitei sü poloue: deitao pei hi deikho buyu nuhdutao veishi alia Gilead ae Bashan teidei hinou poa teinghi palo buyu Selekah ae Edrei nuhdutao hi koute hai poloue.”

¹¹(Rephaim mai hrohinou shodai peiyu hai Bashan hi veo Og likhei baie. Puhvei züphao hai hu nou soukhai toue, chukoute-a Ammon mai nuh Rabbah hinou ngaolou süe. Maisou nou tayu zhai hinou douyu hai züphao süna vei sah shoyu hai mitar adai-e alia zha duyu nou mitar ahai-e.)

¹²“Süteile hi Etao nou polouyu teidei taohai Aroer reiko nou buyu Arnon rei nghi-a buyutao alia Gilead deichi hi buyu nuhdutao dali hai Reuben ae Gad maitao hi peie.

¹³Alia shokhaitoua buyu Gilead teideitao ae Og veo vei vedei Bashan veishi hai Manasseh khü dali hi peie.” (Argob deize teitei: süsü Bashan teidei hai Rephaim mai vei dei-e teanou süwe.

¹⁴Manasseh puona Jair nou Argob deize teitei, süsü Bashan maivei teidei teitei, alia Geshur ae Maakath maivei deirai hi koute poloure, alia dei sünasü puh zhih hinou kuloure. Südonou Bashan hai zhou koute Jair vei nuhtao tea süwe.)

¹⁵“Alia Enou Gilead hai Mikir mai hi peire.

¹⁶Alia Reuben mai ae Gad mai hi Enou Gilead hinou Arnon rei hi koute peiwure. Puletao vei deirai hai khelovatha kou Arnon rei toutsü hinoue alia reilo khe Jabbok rei, Ammon maivei deirai hi khete-e.

¹⁷Teinghi loulova deirai hai Jordan Rei hi koute-e, alia Galilee Zai nou poa khelo kou Athai Zai ae teinghi palova kou Pisgah deichiphi koute-e.

¹⁸“Süpha teile hi Enou puletao hisü paoe, ‘Neletao Ramai MAPAO nou neletao hi teidei haina hai peikhai touyuma, neletao hi soureih soulou süyu mai hrülai nou reih basei pfüloua neletao thaihou-jürai Israel maisou jünou rai-a takoulai.

¹⁹Ana neletao chapfü maitao, nahmaitao alia kikhaorütao (neletao hai kikhaorü taoli bue touyu Enou süwe) hai Enou neletao hi peikhai touyu nuhdutao hinou bua bailai.

²⁰Neletao hi Ramai MAPAO nou teidei peikhai touyu büa MAPAO nou neletao thaihou-jürai maitao hi peiyu Jordan rei thailova tachopa poloua füsho louyu thainou neletao hai lahvei füdei hisü dakhaive-a bailai.’

²¹“Süthaisü Enou Joshua hi haibüa paodou peie, ‘Ramai MAPAO nou veo Sihon ae Og puhai hi daie soupeie touyu sü ne ngheithou vuzünou ngaore; sübüa nenou takoure vedeitao teitei hia MAPAO nou soupeilai.

²²Südonou puletaoye ngaopiso, daiolouzü neletao Ramai MAPAO nou neletaoye donou reih soupeilai.’

²³“Süphaki Enou MAPAO hi veachi pao-a haibüa khowe,

²⁴‘Oh Ramai MAPAOwo, ne kilai ahisü chunou nevei khouko ae khupayu vah haso khesü ngaota-a bai hie. Nenou souyu büa raki-a ae deiphao hi-a khouko bushoyu vah hasho ae khupayu vah khesü soulou süyu rah kukhe ali-a hae.

²⁵Eye panou Jordan rei tachopa veisho-a buyu teidei, hüveisho-a deichi hinou buyu nuhtao alia Lebanon deichi khesü ngaolo.’

²⁶“Ana neletao donou MAPAO nou Eye rarou loure alia avei akho sü keipei bare; ae MAPAO nou ahi haibüa paoe, ‘Süna donou ahi chi paopu khaiso! Taisüre!

²⁷Pisgah deichi hi taopa loua nou teinghi palo, teinghei loulo, reilo ae khelo zhukhaio. Soutaosou-a zhutou toulo, daiolouzü ne hai Jordan rei tachopa khailai more.

²⁸Ana Joshuaye sü paodoutou toupeio, puhle soudupu peio, daiolouzü puhnou maikhe maiye sü süthai poa talou nenou zhingaoa buyu teidei taosü poloulai.’

²⁹“Südonou Etao sü Bethpeor nuhdu pe hi buyu deikho hinou chao-a bure.”