Read Poumei Naga PAODAKHAIYU CHIKHA 31 Bible Online

PAODAKHAIYU CHIKHA 31 - Poumei Naga bible

PAODAKHAIYU CHIKHA 31

¹Moses nou chipao haitao hai Israel maisou hi paopei cheyu thai,

²puhnou puletao hisü haibüa paopue, “E hai chuo po kaihlia kai (120) pare, alia neletao vei süthai-apeio sü soupulou hore. MAPAO nou ahi paoe, ‘Neye panou Jordan rei tachopa laimoe.’

³Neletao Ramai MAPAO nou neletaoye sü sa-a tapeilai, alia neletao nghoujü nou buyu tyahrü khesü puhnou hulai pei-a panou neletaoye poloulai. Alia MAPAO nou paoyu thaifüa Joshua nou neletao vei süthai-apeio sü soupeilai.

⁴MAPAO nou tyahrü kukhe maitaoye sü puhnou Amor mai veo Sihon ae Og alia puhai vei teidei souha peiyu büa souha peilai.

⁵MAPAO nou neletaoye panou puletao jünou reih veiloulai, alia puletao hisü Enou neletao hi kharochi peikhai touyu büa soulo.

⁶Le lachü toulo ae khuveilo, puletaoye ngaopiso; daiolouzü neletao Ramai MAPAO nou neletaoye salai peilai. Puhnou neletaoye pa kaodu talai moe moa neletaoye puhnou thaopeilai moe.”

⁷Süthaisü Moses nou Joshuaye kuloua Israel maisou nghoujü nou haibüa paoe, “Le lachü toulo alia khuveilo; nenou mai haitao sü süthaisa-a puletao hi peilai tea puletao paipaoh maitao hi MAPAO nou paopeikhai touyu teidei hisü sa-a loulai.

⁸MAPAO nou neye sü sa-a tapeilai; puhnou neye pa kaodu takhailai moe moa neye thaopei laimoe, südonou ngaopiso moa le khaitaso.”

⁹Moses nou chikhatao sü rüloua MAPAO vei Vo Sübvü poa tayu Livi maitao ae süthai-apei maitao bah hi peiwure.

¹⁰Moses nou puletao hisü haibüa kharochi peie, “Po anai patsü, paohzho khaipeiyu po nahi, Sahpao Nüh nüyu phaki,

¹¹neletao Ramai MAPAO nou paopeiyu buh, Israel mai hrülai nou tave rathoyu hisü nou neletao nou Israel mai hrülaiye panou chouloure donou hainasü phoungaolai.

¹²Neletao nuh teidei hinou hrüa buyu naotu poutu, nahmai ae shetumai hrülaiye kuve jüloua puletaoye panou chouloua neletao Ramai MAPAO vei chikha khesü pa ngaopilo alia soutaosoua panou zülo.

¹³Haibüa soulouzü, neletao vei tyaosholea, chikha haitao sükhaimo mai-a neletao Ramai MAPAO vei chikhatao sü choulou ae süloulai alia neletao nou Jordan rei tachopa poloua hrülaiyu teidei hi bukisa sü sütao douloua ngaopi-a züloulai.”

¹⁴Süthaisü MAPAO nou Moses hi paoe, “Ne thaire teile sü nghikoure. Joshuaye kuloua Sahpao hisü sakou khaio, Enou puhye paodou peilai.” Moses ae Joshua nou Sahpao hisü veloure.

¹⁵MAPAO nou Sahpao hisü teihao deka ali büa Sahpao vei kikhu hi kou laloure.

¹⁶MAPAO nou Moses hi paoe, “Zhukhaio, ne sü thaita laire, ne thaiyu thai, mai haitao sü khakhapfü ali büa süngao moyu puletao nou talou poloua hrülaiyu teidei hi rah kukheye thota-a bailai, ae puletao nou Eye thaowua bailai alia Eye koa vo soukhai touyu nasü pfüphe bailai.

¹⁷Sübüa vepayu teithe hisünou Enou puletao pei hi rarou talai, ae puletaoye sü thaokhaiwua azhu sü pfüa vaita-a bailai. Puletao hi veahoyu khaikho vedaoyu phaki, süzhou teithe puletao nou haibüa paolai, ‘Etao Ramai MAPAO nou Etao hrohinou bumoa tayu donou haibüa veahoyu sü ve daomovu?’

¹⁸Puletao nou vah ashi souyu donou süzhou teithe Enou azhu sü pfüa kubailai, daiolouzü puletao nou rah kukheye tho tare.

¹⁹“Südonou lou haina sü rükhailo, ae Israel mai hi doupeio; puletao-a panou lou hainasü soukhaio, sübüa lou haina panou Etao kohisü shaki soulai.

²⁰Enou puletao paipaoh mai hi peilai tea chaachou soukhai touyu teidei, laivoudzü ae chonaodzü nou küa buyu füdei hisü puletaoye save peiyu phaki, puletao hai touva lisoua ae sova lisoua hrülai. Ana puletao hai rah kukheye thotawulai ae puletao vah ashi sü souta bailai, alia Eye malaiwua Eye koa vo thoukhai touyu nasü pfüphe pfüpho-a bailai.

²¹Süthaisü puletao hi veahoyu tyatyali veyu phaki, lou haina nou puletao hi shakhi soulai, daiolouzü lou haina hai puletao tyaosholea hia panou ngailai moe. Daiolouzü Enou puletao hi peilai tea chaachou soukhai touyu füdei hi savemo jünou puletao hai daitsü chowe touyu khesü Enou süwe.”

²²Süzhou teithe hinou Moses nou lou nasü rüloua Israel mai hi doupeie.

²³Süthaisü MAPAO nou Nun nahpoutu Joshua hi haibüa paoe, “Khuveilo alia le latsü toulo, daiolouzü mai haitaoye sü Enou peilai tea chaachou soukhai touyu füdei hisü nenou sa-a loulai. Enou neye koa sata peilai.”

²⁴Moses nou Ramai vei chikha khesü larübvü ali hi rüthoupei cheyu thai,

²⁵puhnou MAPAO vei Vo Sübvü khoyu Levi maitao hisü paoe,

²⁶“Chikha larübvü haina poloua neletao Ramai MAPAO vei Vo Sübvü khaiyu pe hi khailo, larübvü hainasü neletao hi shaki soua panou süpe hinou bulo.

²⁷Daiolouzü neletao hai daizhou koute rochiwe ae khaitya süe touyu Enou süwe. E hria bukia neletao hai Ramai MAPAO nou paoyu chi khesü züba-e, E thaitayu thaio, neletao hai daizhou koute shipulai saro!

²⁸Nele puonah khü hinou tsümaitao alia süthai-apei maitao hrülaiye kuve jülo, Enou puletao hisü chi haitao paongao peilai, sübüa raki ae deiphao sü panou Etao kohi shaki soulai.

²⁹Daiolouzü Enou süwe, süolouzü E thaitayu thai, neletao nou vah ashi tyatyali souta-a bailai, alia Enou neletao hi paodou peiyu ludu hilo tamoa tareita-a bailai. Süthaisü neletao nou MAPAO vei nghingao hinou souso tea paopeiyu vah ashi khesü soupeia puhvei lekha sü daipa peiwulai, süthaisü neletao hi veahoyu tyatyali velai.”

³⁰Süthaisü Moses nou Israel maisou ve jüa buyu hinou Lou hainasü soungao peie.