Read Poumei Naga PAODAKHAIYU CHIKHA 33 Bible Online

PAODAKHAIYU CHIKHA 33 - Poumei Naga bible

PAODAKHAIYU CHIKHA 33

¹Moses, Ramai vei mai, puh thaita mojü Israel maitaoye puhnou shiha peiyu sü haitaoe.

²MAPAO hai Sinai Deichi vanou ve-e; Puh hai teinghi payu büa Edom hinou pa-e, ae Paran Deichi vanou puhvei maitao hi vangao peie. Puhnou rakivamai thekirouye sü sa-a ve-e, puh bah zhoulo hisü mei taotutu-a bue.

³MAPAO nou puhvei maitaoye sü leshie, ae puhvei amashee maitaoye vupeiwe. Südonou puletao sü ne phihi vewe, ae nenou paoyu thaifüa tawe.

⁴Israel maitao donou muh teikayu nasü, Moses nou paopeiyu chikhatao Etao nou züwe.

⁵Israel maitya hrülai pei hinou kho-apei maitao, ae süthai-apei maitao hrülai velou jüa buyu hisü nou, MAPAO nou puhvei maitao Israel mai pei veo souloure.

⁶Moses nou Reuben maitao donou haibüa hapeie: “Reuben maitao hai mai daotu baiyuma panou haka taso.”

⁷Judah maitao donou: “Oh MAPAOwo, Judah maitao vei akho sü noupeio, ae puletaoye sü thaihou-jürai maitao hi save thouzho peio. Nenou puletaoye donou reih soupeio, puletaoye ngaobamai bah hinou soukha peio.”

⁸Levi maitao donou paoyu: “MAPAOwo, Levi maitao hisü nevei jüpa nasü panou süloure donou nevei Thummim ae Urim hai peio. Nenou puletao le hai Massah ae Meribah dzüla hinou zhue, ae puletao hai chilee chechewe touyu sü nenou ngaoloue.

⁹Puletao hai puletao vei pfüpuo, thaihou-jürai maitao, ae puletao vei nahmaitao jünou neye leshipu hie touyu sü puletao vah hinou soungaoe. Puletao nou nevei chikhatao ae nenou vo soukhai touyu sü züwe.

¹⁰Puletao nou nevei chikha sü nevei maitao hi zülo tea doupeilai, Puletao nou nevei sheelabu hinou posheelayu khesü soupeilai.

¹¹Oh MAPAOwo, puhvei na khesü ha peio, ae puh bah nou souyu vah khesü popeio. Puhye ngaobayu maitaoye sü souha peio, puhye hraiyu maikhe maiye sü panou kushupu more donou soupeio.”

¹²Benjamin maitao donou haibüa hapeie: “MAPAO nou leshi peiyu neletao hai puh hinou kaona-a hrüloulai, Puhnou neletaoye teisa khosa-a laipeilai, ae neletaoye koa puhnou sa-a bupeilai.”

¹³Josef vanou puhnou paoe: “MAPAO nou neletao vei teidei sü hapeilai, sübüa raki vanou pa teirü kou peilai, ae deikhe hisünou pa dzü palai.

¹⁴Neletao teidei hisü panou shinamara aveili shiloutheo, ae ka-hou vei shira khesü liche-a panou buyu souloutheo.

¹⁵Daoh raichoki nou buyu deichitao hisü panou rashi veikayu tyanou phoutao-a shipeiyu sü soulou theo,

¹⁶dei hinou paopayu aveih teitei sü puhvei zha soulou theo, ae pounghou hrohinou mei tao-a cha-apeio navei aveih teitei sü puhye panou ngaolou theo. Ha haitao pfüphou sü Josef pei hi ve theo, daiolouzü puh sü puhvei thaihou-jürai maitao vei peikhowo nasüe.

¹⁷Josef vei pfüchi hai chode khouko büe, ae puhvei kai hai rekou buyu chode kai büe; sünasü nou puhnou tyahrü kukhe maitaoye sü deiphao kainghou hisü huve khaipeiwe. Süna hai Ephraim mai thekirou raibüe, ae Manasseh mai thethe rai-e.”

¹⁸Zebulun ae Issakar donou puhnou paoe: “Zebulun, nenou vakou tapayu phaki kaozhou aveih nasü ngaoloulai, ae Issakar, nenou ki hi buyu phaki viyu sü ngaolai.

¹⁹Puletao nou vakou maiye puletao deichiva sü kupoa veloue, ae sühi sünou acheche posheelayu khesü puletao nou posheela peiwe. Puletao nou zai hi sünou ae zai pe hi buyu venai hisünou kini khesü ngaoloulai.”

²⁰Gad maiye donou haibüa paoe: “Gad maitao vei teidei souduso apeio Ramai ye sü paosholo! Puletao hai kipeikhaodu büa kholoue, sübüa baokhao ae pei sü daokhao peiwe.

²¹Puletao hai teidei veikayu nasü lahvei soure donou poloure, sühisü kho-apei maitao vei zha-a soukupa khaipeiwe. Peikho maitao veloujüa buyu hisü, MAPAO vei jüpa hinou kaozü vah soupeiwe.”

²²Dan vanou puhnou paoe: “Dan hai Bashan hinou tupayu kipeikhaodu toutu ali-e.”

²³Naphtali maiye donou: “Oh Naphtali, ne hisü MAPAO vei zhuvea leshiyu vei shiha nou phoutao-a bue. Neletao nou Galilee zai hinou poa khelo koute teidei taosü thaoloulai.”

²⁴Asher donou puhnou shiha peiyu: “Asher ye panou nahpoutu kukhe maitao jünou pa rako veikayu nasü soulou theo. Puhye sü panou thaihou-jürai maitao nou jüpa kayu nasü southeo, ae puh phi sü panou theadzü hropoa talai.

²⁵Nevei nuhdu khesü huh nou kivo soulou theo, ae teisa panou kaozhou vei-a bulou theo.”

²⁶Oh Israel maitaore, neletao Ramai büa rah kukhe ali-a hae. Puhnou neletaoye soukha peilai tea raki hinou ae teihao vanou ve-e.

²⁷Ramai nou neletaoye sü teisa nou vupeiwe, ae puhvei akhai hayu bah sünou neletaoye soukha peilai. Puhnou neletao ngaoba maiye neletao nghoujü nou hulai peilai, ae puletaoye sü souhawo tea paopeilai.

²⁸Südonou Israel mainou ngaopiyu ha-a hrülai, puletao vei teidei hisü thoudzü ae darkhadzü nou phouka-a bulai, raki vanou vidzü sü kou dei cha peilai.

²⁹Oh Israel maitaore, neletao hai daizhou koute savayu maitaosa! MAPAO nou vupa peiyu maitao, neletao büa thao tyahrü nou bue? Puh hai neletaoye soukha apeio rü nasüe, ae neletaoye panou veilouyu khoche nasüe! Neletaoye ngaobayu maitao sünou neletao hi ve zhuvea peio tea kholai, ae neletao nou puletaoye sü phinou taidei poa talai.