Read Poumei Naga PAODAKHAIYU CHIKHA 34 Bible Online

PAODAKHAIYU CHIKHA 34 - Poumei Naga bible

PAODAKHAIYU CHIKHA 34

¹Süthaisü Moses nou Moab deikho hinou Jeriko nuhdu alilo vatha buyu Nebo deichi, Pisgah deichi mataoh hisü taopaloue. MAPAO nou puh hi teidei teitei sü buh sühinou ngaoe: Gilead hinou Dan maivei teidei koute,

²Naphtali teidei teitei, Ephraim ae Manasseh, Judah maitao vei teidei teitei nou poa teinghi loulo zai hi koute,

³Negeb ae deikhotao, süolouzü Jeriko vei deikhotao, habe nuhdu hinou poa Zoar hi koute hai ngaopeie.

⁴Süthaisü MAPAO nou puh hi paoe, “Enou teidei haitao sü puletao vei tyaonah maitao hi peilai tea Abraham, Isaak ae Jakob hi chaachou soukhaitoue. Enou teidei haitao sü ne nghithou vuzünou pa zhingaowure, ana newo louzü teidei sühi panou loukhailai more.”

⁵Südonou MAPAO nou paoyu thaifüa MAPAO vei kilai Moses hai Moab maivei teidei hinou thaitare.

⁶Puhye sü Bethpeor alilovada buyu Moab maivei deikho hinou daovu peie, ana puhye daovuyu khüh sü zhou koute mai ali koute-a sümoe.

⁷Moses hai po kaihlia kai hinou thai-e. Puh thaiyu phaki puh hai pfüphao-a veisho hie ae nghithou-a ramo hie.

⁸Israel mainou teithe shirou hai puh thaiyu donou Moab deikho hinou levea-a dopfüe.

⁹Nun nahpoutu Joshua hisü ratsü süyu rako nou phoutao-a buloure, daiolouzü Moses nou puhye sü puh thao dothoupeie alia puh pei hi bah lakhai peie, südonou Israel mainou puh chi sü züe, ae MAPAO nou Moses hi chikha peikhai touyu khesü souwe.

¹⁰Israel mai hrohi Moses büa rachipaola apeimai ali-a pamo hie; MAPAO nou puhye sü zhu haohao nou vedao-a chakupeie.

¹¹Mai ali koute-a MAPAO nou Moses ye panou khupayu vahtao, puhnou Ejipt mai veo hi, puhvei peikho maitao hi alia tyadei teitei hi souyu büa soumo hie.

¹²Alia mai aliro Moses nou Israel maitao hi khupayu vah ae ngaopi shoyu tyatyali soupeiyu büa soulou moe.