Read Poumei Naga PAODAKHAIYU CHIKHA 6 Bible Online

PAODAKHAIYU CHIKHA 6 - Poumei Naga bible

PAODAKHAIYU CHIKHA 6

¹“Chikha haitao hai neletao Ramai MAPAO nou neletaoye doupeio tea ahi kharochi peikhaitoue. Chikha sütao hai neletao nou talou poloua hrülaiyu teidei hisü züa bulo.

²Ne hria bukisa, ne alia nevei tyaonahtao nou MAPAO Ramai ye tsükhoulai alia Enou neletao hi peikhai touyu chikha teitei sü zülo, sükulouzü neletao nou teidei sühi phashoa hrüloulai.

³Oh Israel maitaore, sütao hai soutaosoua keilo ae zülo. Sütoulouzü neletaoye donou ha teitei hinou kaozhou vei-a bailai, alia neletao hai khoushoyu tyahrü ali souloulai ae veishoyu teidei, Eletao paipao hi MAPAO nou apaokhai touyu hisü ve hrüloulai.

⁴“Oh Israel maitaore, haihai sülo! Eletao Ramai MAPAO likhei MAPAO sübaie.

⁵Nevei Ramai MAPAO ye sü nevei tsüle, nevei rako alia nevei khouko teitei nou pei-a leshilo.

⁶Enou zhou teithe neletao hi peikhai touyu kharochi hainasü ngaikhai tisho.

⁷Sütao hai neletao nahmaitao hi doupeio. Sütao hai nenou ki hi bukia, moa vakou tayu phakia, moa ngasoua buyu phakia moa vah souyu phakia nenou sütao sü doupeikhai khailai.

⁸Sütao hai panou licho loure donou ne bah hi khikhailo, ne pu hi meakhailo,

⁹alia neletao vei kikhu pei hi ae robomü hi rükhailo.

¹⁰“Neletao puopao Abraham, Isaak ae Jakob hi Ramai MAPAO nou paopei khaitouyu thaifüa, puhnou neletaoye sü veishoa buyu dei alia neletao nou soushu moyu nuhdu khesü neletao hi peilai.

¹¹Neletao nou phoupo vemoyuma neletao ki hisü panou veishoyu na khesü phoutao-a bulai, alia neletao nou hemoyu dzükhao khesü neletao hi peilai, ae neletao nou shomoyu kyairaishi ae oliv be khesü neletao hi peilai. MAPAO nou neletaoye teidei sühi savethou peiyu phaki, neletao nou tounüyu veishi sü neletao nou ngaoloulai.

¹²Ana neletao nou leikei-a süre li sü, neletao hai Ejipt hinou mai qila soua buyu hisü nou MAPAO nou sapa peie touyu nasü neletao ngailai moe.

¹³Neletao Ramai MAPAO ye sü tsükhoulo, puhye likhei tho bailai, alia puh zhih likhei nou ku-a chaachou soua bailai.

¹⁴Neletao rah kukheye thoso, neletao pehao hi hrüa buyu maitao vei rah kukheye tholai moe.

¹⁵Neletao nou rah kukhe liye thota louzü, MAPAO vei lekha rarou sünou mei büa neletaoye sü dei hakhai bailai, daiolouzü neletaoye koa buyu Ramai MAPAO hai Ramai kukhe liye koa shamea buzhai moe.

¹⁶“Neletao nou Massah hi souyu büa neletao Ramai MAPAO ye sü doulai moe.

¹⁷Puhnou neletao hi chikha peikha touyu teitei sü soutaosoua zükhai toulo.

¹⁸MAPAO nou neletao hi kao-e alia vei-e teanou paopeiyu teitei sü soulo; sükulouzü neletao hai kaozhou vei-a hrüloulai, alia neletao puopao maitao hi paopeikhai touyu teidei, veishoa buyu füdei hisü neletao nou talou poloulai,

¹⁹alia MAPAO nou apaopei khaitouyu büa neletao nou ngaobamaiye sü hulai loulai.

²⁰“Haithai daohkou neletao nahmaitao nou haibüa neletao hi noulai, ‘Daisounou chikha haitao hai Eletao Ramai MAPAO nou Etaoye zülo tea kharochi peiwe?’

²¹Sükua nouyu phaki haibüa chila peilo, ‘Daoh teile li hi Etao hai Ejipt veo vei qila soue, ana MAPAO nou puhvei dushoyu khouko nou Etaoye vupa peie.

²²Puhnou khupayu vah souyu hai Etao nghithou vuzünou ngaoe alia Ejipt mai hi, ae puletao vei veo hi ae peikhomai hrülai hi ngaopi shoyu vah alao puhnou soupeie.

²³Puhnou Etaoye Ejipt hinou füdei haina hi save peie, puhnou Etao paipao maitao hi peilai tea apaopei khaitouyu thaifüa.

²⁴Süthaisü Etao Ramai MAPAO nou chikha haitao teitei zülo alia tsükhoulo tea Etao hi kharochi peie. Etao nou chikha sütao hai züloure toulouzü, puhnou Etaoye thaokhai toumoa zhupeilai, alia Etaoye panou sava-a hrülai touwe.

²⁵Etao nou soutaosoua Ramai MAPAO nou peikhai touyu chikhatao zü louzü, puhnou Etaoye kiko peilai.’