Read Poumei Naga PAODAKHAIYU CHIKHA 7 Bible Online

PAODAKHAIYU CHIKHA 7 - Poumei Naga bible

PAODAKHAIYU CHIKHA 7

¹“Neletao Ramai MAPAO nou neletaoye panou hrülaiyu füdei hisü save peilai, alia tyahrü taoliye puhnou hulai peilai. Neletao nou talouyu phaki, neletao jünou dupuyu ae khoupuyu tyahrü anai taosü puhnou hulai peilai, sütaosü daidaie toulouzü: Hit mai, Girgash mai, Amor mai, Kanaan mai, Periz mai, Hiv mai alia Jebus mai-e.

²Neletao Ramai MAPAO nou puletaoye neletao bah hi thoupeiyu phaki alia neletao nou puletao jünou reih veilouyu phaki, puletaoye souhakhai touwuo. Puletaoye koa nou vo soulai moe, alia puletaoye zhuveaso.

³Puletaoye koa shanghi souso; puletao nahmaiye naso, moa neletao nahmai-a puletao ki hi khaiso,

⁴daiolouzü neletao nahmaiye panou MAPAO ye thomoa rah kukheye sa-a tho tashulai. Hakinou haibüa vepare toulouzü MAPAO vei lekha rarou sü neletao pei hi velai, alia neletaoye sü souha-a bailai.

⁵Südonou neletao nou puletao hi haibüa soulo: Puletao vei sheelabu khesü soupe soupho laiwuo, puletao vei sheeyu chuh khesü dapholaiwuo, puletao vei Ashera rah zhurai khesü daode laiwuo ae puletao vei bashara khesü mei deilaiwuo.

⁶Daiolouzü neletao hai Ramai MAPAO vei sheeyu maitao-e, Ramai MAPAO nou deiphao hrüyu maitao hrohinou dokupa puhvei mai panou soulai tea khaitouyu maitao-e.

⁷“Neletao hai mai kukhe jünou poupu hie tea MAPAO nou neletaoye leshi-a dopalou moe; neletao hai tyahrü kukhe maitao jünou taikayu nabaie.

⁸Ana MAPAO nou neletaoye leshiyu hai neletao paipao maitao hi puhnou chaachou soukhai touyu donou neletaoye khailupa peie, ae maivei qila soua buyu hinou neletaoye Ejipt hi veo Pharaoh bah hinou popa lahdo soupeie.

⁹Südonou neletao Ramai MAPAO hai Ramai-e, ae louche louveiyu Ramai-e. Puh hai puhye leshiyu mai ae puhvei chikha khesü züa buyu mai hisü puhnou vo soukhai touyu nasü khaipeiwe alia maiphao theli koute-a leshi peiwe.

¹⁰Ana puhye ngaorayu mai hisü thashoa nou paoh khapei-a baiwe.

¹¹Südonou zhou teithe Enou neletao hi paopeiyu chikhatao sü teitei nou soutaosoua zülo.

¹²“Neletao nou chikhatao sü soutaosoua zütou toulouzü, neletao Ramai MAPAO nou neletao puopao maitao hi vo soukhai touyu büa neletaoye sü tobai soumoa leshi peilai.

¹³Puhnou neletaoye leshi peilai, ha peilai, sübüa neletaoye panou toudzüa alao hrüloulai; puhnou neletao vei teidei-a shiha peilai, sübüa panou neletao vei chamou, shinamara ae theadzü khesü veishoa chachi loulai, alia kikhaorüa panou tyakapa loulai. Puhnou neletao paipao mai hi apaopei khaitouyu shiha teitei sü neletao hi peilai.

¹⁴Deiphao mai ali koute-a neletao hi peiyu büa shiha peilai moe. Neletao mai ali koute-a panou nahmai hayu sü soulai moe, alia neletao vei kikhaorüa panou ali koute-a peih laimoe.

¹⁵MAPAO nou neletao hisü panou rahta-rahvu velai moe, neletao nou Ejipt teidei hi buki sounou ashi souyu khesü povailai peilai, ana neletaoye ngaobayu maitao hisü panou velai.

¹⁶Neletao Ramai MAPAO nou neletao bah hi thoupeiyu tyahrü hrülaiye sü souhakhai tiwuo, puletaoye zhuveaso; moyuma puletao rah khesü thoso, daiolouzü sünasü neletaoye donou shorü thoukhai touyu büa bailai.

¹⁷“Tyahrü haitao hai Etao jünou mai pou hie alia puletaoye sü Etao nou hulai louhoe tea tsüa chokhai touso.

¹⁸Puletaoye sü ngaopiso; neletao Ramai MAPAO nou Pharaoh veo hi ae Ejipt maitao hi dai-e soupeie touyu khesü licholo.

¹⁹Neletao nghithou vuzünou ngaoyu rahta-rahvu, khupayu vahtao alia khouko bushoyu neletao Ramai MAPAO nou neletaoye sapa peiyu khesü licholo. Puhnou Ejipt maiye souhayu büa chu neletao nou ngaopi-a buyu tyahrütao-a souha peilai.

²⁰Süpei nou, neletao Ramai MAPAO nou sounou ashi nou seive tupa louyu maitao ae tutsüa buyu maitao-a souha bailai.

²¹Mai sütaoye ngaopiso; daiolouzü Ramai MAPAO hai neletao hrohinou bue, puh hai dushoyu Ramai-e alia ngaopi shoyu Ramai-e.

²²Neletao nou takouyu phaki, Ramai MAPAO nou tyahrü khesü shosho nou souha peilai; neletao nou thashoa tyahrütaoye souha louzü, rekhaona khenou teidei sühisü hrüphou loua bailai, sükulouzü neletaoye donou vea-a bailai.

²³Neletao Ramai MAPAO nou puletaoye sü neletao bah hi thoupeilai, ae puletaoye souhalou mosa sü puletao tsü souhakhai peilai.

²⁴Puhnou vemai khesü neletao bah hi thoupeilai, sübüa neletao nou puletao zhih sü raki khenou souhawulai. Neletao nou puletaoye souhakhai loumo koute, mai taralinoua neletaoye nulou laimoe.

²⁵Puletao vei bashara khesü mei deilaiwuo. Puletao hi buyu shahu moyuma sana khesü jüpaso, alia poa poso. Neletao nou süsü poloure toulouzü, neletao-a thai bailai, daiolouzü süsü neletao Ramai MAPAO nou ngaorayu ali-e.

²⁶MAPAO nou ngaorayu bashara khesü neletao ki hi pove khaiso, hakinou pove khailouzü, süna büa neletaoye chaa peiwulai. Neletao-a basha khesü ngaoralo, daiolouzü sütao hai MAPAO vei chaa pfüyu natao-e.