Read Poumei Naga JOHAN 10 Bible Online

JOHAN 10 - Poumei Naga bible

JOHAN 10

¹“Cheche vuzünou neletao hi Enou paowe, kikhu hinou talou moa ludu kukhe hinou zhaovehi talouyu puhsü avaomaie ea maivei saotou maie.

²Ana kikhu hinou talouyu puhsü zhaotu taovei zhaokhowo süe.

³Puh hisü bomü khowonou kikhu houpeie; zhaotu taonou puh paisü chouwe, alia puhnou lah puhvei zhaotu taoye sü puletao zhih ali linou kua süthaisa papeie.

⁴Puhnou lah puhvei taoye sü vakouhi sapayu kisü, puhnou puletao nghojünou tae, alia zhaotu taonou puhthai fütae, daiolouzü puletao nou puh pai shiwe.

⁵Puletao nou shevai-shesü maitali thaisü fülaimoe, ana puletao nou puh hinou tuta bailai, daiolouzü puletao nou shevai-shesümai pai shimoe.”

⁶Jisu nou nada hainasü puletao hi paopeie, ana puhnou puletao hi dai paosa touyu sü puletao nou sülou moe.

⁷Südonou Jisu nou puletao hi paopukhaie, “Cheche vuzünou Enou neletao hi paowe, E hai zhaotu taovei kikhu nasüe.

⁸Anghojünou veyu puletao hrülai hai avaomai ea maivei saotoumai khaibaie; ana zhaotu taonou puletao paisü keipei moe.

⁹E hai kikhue; maita linou Ahinou talou louzü, puhsü khailu loulai, alia puhnou tapa talouloua poudai aveibuh ngaoloulai.

¹⁰Avaomai sünanou vaore, southeare ea souhare donou likhei vebaie. E louzü puletao ahri ngaoloure alia sünasü ngaochekhou loure donou ve-e.

¹¹“E hai zhaokho aveiwo süe. Zhaokho aveiwonou zhaotutao donou puh hrirai peie.

¹²Zho kuhyu mai sünanou, puh hai zhao-akhowo moa zhaotutao paopu moyu donou nüsei taveyu ngaoloua zhaotu taoye thaowu-a tutabaiwe; alia nüsei nanou sütaoye nia hupho rarou baiwe.

¹³Puh hai zho kuhyu maili baiyu donou zhaotutao donou halia leki khaimoa tuta baiwe.

¹⁴E hai zhaokho aveiwo süe. Apuonou Eye süyu ea Enou Apuoye süyu kua, Enou Azhaotu taoye süwe ea puletao-a Eye süwe. Alia Enou Ahrirai hai zhaotutao donou peie.

¹⁶Alia zhaokhome haihi loumoyu Azhaotu kukhe-a bue. Enou puletaoye-a savelai, alia puletao nou Apaisü keilai, sükua puletao sü zhaokhowo alikhei hinou khome ali soubailai.

¹⁷“Apuonou Eye leshiwe, daiolouzü Enou ahrirai hai podakhai loure donou Enou sünasü peiwure.

¹⁸Maita linoua ahrirai hai Ahinou pota moe; ana lah Amadonou sünasü Enou pei-a baie. Süna peiwure sü Akhouko bue, alia süna podakhai loure Akhouko bue. Souloure zü hainasü Enou Apuo hinou ngaoloue.”

¹⁹Chipao haitao vanou Jihudimaitao hrohisü me kukuta khaire.

²⁰Puletao hrohinou mai taolinou paoe, “Puh hi rashi ali bue, alia puh hai vore! Neletao daidonou puhchi keiwe?”

²¹Ana kukhe taonou paoe, “Chipao sütaohai rashinou louyu mailinou paoyu chipao moe. Rashi alinou nghichamai nghithousü souhepa peilou süwu?”

²²Sükisü Jerusalem hisü Rathoki Posheela Nüh nasü nütare.

²³Teile sükisü saikie, alia Jisu nou Rathokihi, Solomon kipamü tea kuyu süna hinou takou takhe-a bue.

²⁴Südonou Jihudimai taonou puh hinou tave sühao buloua puh hi paoe, “Pha kasho nenou Eletaoye panou zhi-a bulai? Nehai Khristae toulouzü Eletao hi sheesha-a paongao khaio.”

²⁵Jisu nou puletao hi paoe, “Enou neletao hi paongaowure, ana neletao nou Eye louche peimoe. Apuo zhih hinou Enou souyu vah sütaonou Avanou zhopaoh peiwe;

²⁶ana neletao nou louche moe, daiolouzü Enou paoyu kua neletao hai Azhaokhome hinou moe.

²⁷Azhao taonou Apai keiwe, alia Enou puletaoye süwe ea puletao nou Athai fütawe.

²⁸Enou puletao hi teisa halou hoyu ahri peiwe, alia puletaosü hakilia hakhai laimoe. Alia maita linoua puletaoye Abah hinou shaolou hoe.

²⁹Puletaoye Ahi peiwuyu Apuonou hrülai jünou duhie, alia maita linoua puletaoye Apuo bah hinou shaolou hoe.

³⁰E alia Puosü alibaie.”

³¹Sükisü Jihudimai taonou puhye deire donou kou chuh polou khaire.

³²Jisu nou puletao hi paoe, “Apuo hinou vah avei alao Enou neletao nghojühi soungaore; sütao hrohinou kana vanou neletao nou Eye chuhnou deilai touwe?”

³³Jihudimai taonou puh hi chila peie, “Eletao nou neye vah avei donou chuhnou deilai moe ana Ramaiye paoshiyu donou baie; alia newo mai baiyuma nelah Ramaiye paokhawe!”

³⁴Jisu nou puletao hi chila peie, “Neletao razhai hinou haibüa Ramai nou pao-a, ‘Neletaowo ramai taoe’ tea rükhaitou mowu?

³⁵Sükulouzü Ramai chipao peikhai touyu puletaoye puhnou ramaitaoe tea kulouzü sheeyu larübvü hinou paokhai touyu sü soukho louhoe.

³⁶Sütoulouzü Enou, ‘Ewo Ramai Nahpoutue,’ tea paoyu vanou, Puonou soushee pei-a deiphao hi seivekhai touyu puh hi neletao nou, ‘Newo Ramaiye paoshiwe’ tea paowu?

³⁷Enou Apuo vahtao soumo louzü, Eye loucheso.

³⁸Ana Enou sütaosü soua bulouzü, neletao nou Eye louche moyuma, Puosü Ahi bue ea Esü Puohi bue touyu süloure ea sheesha-a süa bure donou Avah taosü louche loukhaio.”

³⁹Südonou puletao nou puhye niloure donou tepue, ana puletao bah hinou puh hai tupa loure.

⁴⁰Süthaisü Johan nou raiki dzükhao dapeia buyu buh Jordan rei polo dova Jisu nou tapu khaire, alia sühinou puhnou nai-a bue.

⁴¹Alia mai alaosou puh hi tave loure ea puletao nou paoe, “Johan nou shee alia soumoe, ana Johan nou mai haina vanou paoyu teitei sü chekhaoe.”

⁴²Alia sühinou mai taolinou puhye louche loure.