Read Poumei Naga JOHAN 11 Bible Online

JOHAN 11 - Poumei Naga bible

JOHAN 11

¹Sükisü Meri alia puh matoupai Marthanou hrüyu Bethani nuh hinou Lazaras touyu mai alihai souloure.

²Mapaoye kaivei theadzünou napeiyu ea puh phihi puh peishunou posou peiyu paisü Meri hainapaie; sou-a buyu maina sü puh pou Lazaras süe.

³Südonou tuhainou Jisu hi ko seiho-a paoe, “Mapao, nenou leshiyu puhsü sou-a bure.”

⁴Ana Jisu nou ko süna choulouyu kisü paoe, “Sou hainasü thaire donou moe; haisü Ramai khouko-ava pongaore donou baie, alia süna vanou Ramai Nahpoutuye paosholai.”

⁵Jisu nou Martha ea puh matoupai alia Lazaras ye leshie.

⁶Ana puhnou Lazaras soue touyu ko nasü choulouyu kisü, puhnou buyu buh sühinou teithe ahai naipulou khaire.

⁷Süthaisü puhnou rozümai taohi paoe, “Eletao Judea hi tapu laikhe.”

⁸Rozümai taonou puh hi paoe, “Dou-apeio, zhovubü hinou Jihudimai taonou neye chuhnou deire donou phoua bue; alia newo sühi tapukhai laihiwu?”

⁹Jisu nou chila peie, “Heako teilehai teilecho kiahai bumowu? Maita linou heako hinou ta-a bulouzü, puhnou phi süwumoe, daiolouzü puhnou deiphao hainavei ava nasü ngaowe.

¹⁰Ana maita linou khei hinou talouzü, puhnou phi süwe, daiolouzü puh hisü ava nasü hae.”

¹¹Jisu nou sübüa paoyu thaisü, puletao hi puhnou paopukhaie, “Eletao sa Lazaras sü zhitare, ana Enou puhye soukaire donou talai.”

¹²Rozümai taonou puh hi paoe, “Mapao, puh hai zhitare touyukowo, puh souhai veiloulai.”

¹³Jisuwo louzü puhvei thaiyu vanou paobaie, ana züh hinou zhia soyu vanou puhnou paoe tea puletao nou chowe.

¹⁴Südonou Jisu nou puletao hi sheesha-a paoe, “Lazaras thaire;

¹⁵alia neletao donou E lesae, daiolouzü neletao nou louche loure donou Ehai buh sühi bumoe. Ana Eletao puh hi taholaikhe.”

¹⁶Nahbei tea kuyu Thomasnou puh samai rozümai taohi paoe, “Eletao-a puhye koa thaire donou taholaikhe!”

¹⁷Chuo Jisu nou velouyu kisü Lazarasye khüh hi povuyuhai teithe adai pa-a ngaoloure.

¹⁸Bethani hai Jerusalem ngheikihi kaacho ahaipha doua bubaie.

¹⁹Alia Jihudimai alaonou Martha hai Meri hi puhai pou thaiyu vanou le souvare donou tave loure.

²⁰Südonou Martha nou Jisu laire touyu choulouyu kisü, puhnou tapaloua puhye daoloure, ana Meri louzü kikha hinou bue.

²¹Martha nou Jisu hi paoe, “Mapao, nehai buh haihi buyukowo Apou hai thaipai moe!

²²Ana chukoutea Enou süe süolouzü nenou Ramai hinou khoyu talisü Ramai nou nehi peilai.”

²³Jisu nou puh hi paoe, “Nepou hai hrida khailai.”

²⁴Martha nou puh hi paoe, “Akhai teithe hi hrishuyuki puh-a hrishulai touyu hai Enou süe.”

²⁵Jisu nou puh hi paoe, “Ehai hrishuyu ea ahri nasüe; Eye loucheyu mai talinou puh hai thaiyuma hrilai;

²⁶alia hria Eye loucheyu mai talinou hatakia thailaimoe. Sünahai ne louche homoe?”

²⁷Puhnou Jisu hi chila peie, “Ovai, Mapao; nehai deiphao hi vere Ramai Nahpoutu Khrista nasüe touyu hai Enou louche-e.”

²⁸Puhnou chi sünasü paowuyu thaisü, taloua taho puh matoupai Meriye kuloua puh hi kheikheisoua paoe, “Dou-apeio sü buh haihi bue ea neye phoua bue.”

²⁹Alia puhnou süsü choulouyu kisü, thala shuloua puhye daore donou tare.

³⁰Sükisü Jisu hai nuh hi veloulou mohie, ana Marthanou puhye daoyu buh hinou buhie.

³¹Südonou kikha hinou bua puh le souva-a buyu Jihudimai taonou Meri nou thashoa kijühi tapayu ngaolouyu kisü puh hai khüh hinou taho krare donou tare tea choloua puletao nou puhthaifüa tare.

³²Jisu nou buyu buh hi Meri nou veloulou-a puhye ngaolouyu kisü puhnou Jisu phihinou kou duloua puh hi paoe, “Mapao, nehai buh haihi buyukowo Apou hai thaipai moe!”

³³Jisu nou Meri ea puhye koa taveyu Jihudimai taonou krayu ngaolouyu kisü puh lehai daisho loure;

³⁴alia puhnou puletao hi noue, “Neletao nou puhye kahi povuwure?” Puletao nou puh hi chila peie, “Mapao, tave zhukhaio.”

³⁵Jisu sü krare.

³⁶Südonou Jihudimai taonou paoe, “Zhukhaio, puhnou daizhozhoa puhye leshisa!”

³⁷Ana kamainou paoe, “Nghichayu mainaye souvei peiyu mai hainanou puhye panou thaimolou howu?”

³⁸Südonou Jisu hai le daisho puloukhaia khühhi tave; khüh sünasü chuhlea hinou raokhaitoue, alia süna pei hisü chuhlinou shikhai toue.

³⁹Jisu nou paoe, “Chuh nasü povai khaio!” Thaiyuna tupai Marthanou puh hi paoe, “Mapao, chuo kai nushi laire, daiolouzü puhye povuyu teithe adai pare!”

⁴⁰Jisu nou puh hi paoe, “Nenou louchea bulouzü Ramai vei khouko avasü ngaolai tea Enou nehi paomowu?”

⁴¹Südonou puletao nou chuh nasü povaire. Alia Jisu nou pah pfülaloua paoe, “Apuo, nenou Akho keipeiyu donou, Enou ne kalo paowe.

⁴²Nenou teisa Akho hai noupeiwe touyu Enou süe, ana nenou Eye seivepeie touyu hai lasühao-a buyu maikhemai taonou louche loure donou Enou chi hainasü paowe.”

⁴³Puhnou sünasü paocheyu thaisü, paikusholoua paoe, “Lazaras tapalouwo!”

⁴⁴Thaiyu nanou puhphi, puhbah taosü khühsahnou phukhaitoua, alia puh pahsü sah alinou zükhaitoua tapa loure. Jisu nou puletao hi paoe, “Puhye sah laopa peiwu-a panou talouwo.”

⁴⁵Südonou Meriye koa taveyu Jihudimai taolinou Jisu nou souyu ngaoloua puhye louche loure.

⁴⁶Ana kamainou Phariseemai taohi taho Jisu nou souyusü paongao peire.

⁴⁷Südonou napao adumaitao ea Phariseemai taonou tsüme nasü kuve dzüloua paoe, “Eletao dai soulai? Daiolouzü mai hainanou shee taoli soua bure!

⁴⁸Eletao nou puhye panou haibüa talouzü, mai hrülainou puhye louchelou shulai, alia Rom mainou tave Eletao Rathoki ea Eletao tahrüh souha shulai!”

⁴⁹Ana puletao hrohinou süna pohi napao peichana soua buyu Kaiphanou puletao hi paoe, “Neletao nou halia sükhai moe!

⁵⁰Mai alinou maikhemai donou thaipei-a tahrüh teiteiye souhawu moyu nanou neletao donou veikouhie touyu sü neletao nou sümoe.”

⁵¹Chi hainasü puhnou puh madonou paomoe, ana po sünahi napao peichana soua buyu vanou puhnou raia Jisu nou Jihudimai tahrüh donou thaipeilai tea paobaie,

⁵²alia tahrüh süna likhei donou bailaimoe, ana vakounou raroua buyu Ramainah taoye alikhei soua pove dzüre donoue.

⁵³Südonou sü teithe hinou shua puletao nou puhye southeare donou chi kutare.

⁵⁴Südonou Jisu nou dua Jihudimaitao hrohi takhai more, ana sühinou taloua radeikeena ngheiki buyu Ephraim tea kuyu nuh hi tare, alia sühinou puhnou puh rozümaitaoye koa bure.

⁵⁵Chuo Jihudimai vei Tachonüh nasü ngheikoure, alia mai alaosou nuhbuh hilonou taveloua puletao lah nüh jühinou naa thaifüa soushee loure donou Jerusalem hi tapare.

⁵⁶Puletao nou Jisu ye zhia Rathoki hinou la-a buyu hinou alinou lihi haibüa noue, “Neletaowo dai tea chowe? Puhwo nühbuh hi velaimona?”

⁵⁷Sükisü napao adumaitao ea Phariseemai taonou raia kharochi peire, süolouzü puletaoye panou Jisu ye niloure donou maitalinoua Jisu nou buyu buh sülouzü sünanou tave puletao hi süngaopei vuzülai.