Read Poumei Naga JOHAN 13 Bible Online

JOHAN 13 - Poumei Naga bible

JOHAN 13

¹Chuo haihai Tachonüh vemo jübühi teithe nasüe. Jisu nou puhye donou deiphao haina thaowu-a puh Puohi tare phasü veloure touyu sü süloure. Puhnou deiphao hi puhmaitaoye teisanou leshi peia, akhai koute puletaoye puhnou leshipeie.

²Koukhe tovai nasü vai-a buyu hinou, rashi nanou Simon nahpoutu Iskariot Judas lekhehi Jisu ye ngaobamai bah hi shoh southou peire tsü nasü pothou peire.

³Puonou hali-hala puh bah hi thoupeire, alia puh hai Ramai hinou ve ea Ramai hi dakhai velai touyusü Jisu nou süe.

⁴Südonou puhnou tovai buh hinou shuloua puh sahba nasü laokhaire, alia sazha ali poloua puh lah puh khyahi pozhaloure.

⁵Süthaisü puhnou raikhaohi dzü lathouloua rozümaitao phisü khüpei tare ea puh khyahi zhakhai touyu sazha sünanou poloua puletao phisü southepei tare.

⁶Puhnou Simon Pitar hi takoue; alia Pitar nou puh hi paoe, “Mapao, newo Aphi khülaiwu?”

⁷Jisu nou puh hi chila peie, “Enou soua buyu hai neletao nou chu sümoe, ana nakinou neletao nou sülai.”

⁸Pitar nou puh hi paoe, “Hakilia nenou Aphi khükhai laimoe!” Jisu nou puh hi chila peie, “Enou neye khüpei molouzü, nenou Eye koa zha zhoyu hae.”

⁹Simon Pitar nou puh hi paoe, “Sükulouzü, Mapao, Aphi likhei baimoa Abah ea Apei-a khüpeio!”

¹⁰Jisu nou puh hi paoe, “Dzü khülouyu mai sünanou puh phi likhei baimoa kukhe khüpuyu komoe; daiolouzü puhwo pfüphao teiteinou sheewe. Alia neletao sü sheewe, ana neletao hrülainou sheekhaiyu moe.”

¹¹Daiolouzü puhnou puhye shoh soupeire naye sü süwe; südonou puhnou, “Neletao hrülainou sheekhaiyu moe” tea paoe.

¹²Jisu nou puletao phi khüpeiwuyu thaisü puh sahba poloua puh buh hi kou buta khaire. Alia puhnou puletao hi noue, “Enou neletao hi soupeiyu nasü neletao süsümoe?

¹³Neletao nou Eye ‘Dou-apeio’ ea ‘Mapao’ tea kuwe; alia neletao nou kuyu hai kuzüe daiolouzü Esü sünasüe.

¹⁴Chuo neletao vei Mapao ea Dou-apeio Enou neletao phi khüpeiyu thaisü, neletao-a alinou aliphi khüpeiyu kaoe.

¹⁵Daiolouzü Enou neletao hi soure zhaido nasü soungao peire, süolouzü Enou neletao hi soupeiyu büa neletao-a souvu zülai.

¹⁶Cheche vuzünou Enou neletao hi paoe, kilai talia puh paopu jünou dumoe; moa seita-a buyu puhnou seipeiyu puh jünou dumoe.

¹⁷Neletao nou haitaohai sülouzü, sütao soua buyu neletao donou rakoveie.

¹⁸“Enou neletao veishi vanou paomoe; Enou dolouyu maitaoye sü Enou süe; ana haisü sheeyu larübvü hinou haibüa paoyusü vete loure donoue, ‘Eye koa raokhao zhitouyu puhnou Eye hrailoure!’

¹⁹Süna pamojü chunou neletao hi Enou paoa bue, süolouzü süna payu kisü E hai puh-e touyusü neletao nou louche loulai.

²⁰Cheche vuzünou Enou neletao hi paoe, Enou seitayu mai sünaye popeiyu puhnou Eye popeiwe; alia Eye popeiyu puhnou Eye seive peiyu puhye popeiwe.”

²¹Jisu nou sübüa paoyu thaisü, puh lehai veasho loure, alia dua paopae, “Cheche vuzünou Enou neletao hi paoe, neletao hrohinou alinou Eye peithoulai.”

²²Thaoh vanou puhnou paosa touyu teipei lia sükhaimoa rozümai taonou alinou liye zhue.

²³Rozümaitao hrohinou Jisu nou leshiyu nasü Jisu ye dasa-a bue.

²⁴Südonou Simon Pitar nou puh hi nghisailoua paoe, “Puhnou paoyusü thaohyesa, puh hinou noukhaio.”

²⁵Südonou rozümai sünanou Jisu khaohilo pei pfüna kouloua puh hinou noue, “Mapao, sünasü thaoh-e?”

²⁶Jisu nou chila peie, “Enou raokhaopho nasü pothou süloua peilaiyu mai sünasüe.” Südonou puhnou raokhaopho nasü pothou süloua sünasü Simon Iskariot nahpoutu Judas hi peire.

²⁷Judasnou raokhaopho süna polouyu thaisü, Saitan nou puh hi louloure. Jisu nou puh hi paoe, “Nenou soure nasü thala-a soukhaio!”

²⁸Ana vaibuh hi buyu mailinoua daidonou Jisu nou sünahai puh hi paosa touyusü sümoe.

²⁹Daiolouzü Judas hi shavü nasü buyu donou Jisu nou puh hi, “Eletao nou nühki toure natao hrülouwo; moa toure hamai hi hatali peikhaio” tea paoe tea puletao kamainou choe.

³⁰Südonou Judasnou raokhaopho sünasü polouyu thaisü thalasou vakouhi tapare; alia süsü kheikie.

³¹Judas nou vakouhi tapayu thaisü, Jisu nou paoe, “Chuo Mai Nahpoutuye soudusho peire, alia puh vanou Ramaiye soudusho peire.

³²Alia puh vanou Ramaiye soudusho peilouzü, Ramai nou-a puh vanou Nahpoutuye soudusho peilai, alia puhye thalasou soudusho peilai.

³³Anahkhemai, phajü donou Enou neletaoye koa bubailaire. Neletao nou Eye phoulai; ana Enou Jihudimai taohi paoyu kua chuo Enou neletao hi paowe, ‘Enou tayu buh hisü neletao nou velouhoe.’

³⁴Enou neletao hi chikha ashuli peiwe; neletao alinou liye leshilo. Enou neletaoye leshi peiyu büa, neletao-a alinou liye leshi vuzülai.

³⁵Neletao hi alinou ali donou leshiyu nasü bulouzü, süvanou neletao hai Arozümai-e touyusü mai hrülainou süloulai.”

³⁶Simon Pitar nou puh hi noue, “Mapao, ne daiki taholai?” Jisu nou chila peie, “Enou tahore buh hisü nenou chu Athai fülou hoe; ana nakinou nenou Athai fülai.”

³⁷Pitar nou puh hi paoe, “Mapao, daidonou chu Enou nethai fülou holai? Enou neye donou Ahrirai peilai!”

³⁸Jisu nou chila peie, “Nenou Eye donou ne hriraisü peilaiwu? Cheche vuzünou Enou nehi paowe, nenou Eye vu asü laiwu mosasü houjünou khaolai moe!”