Read Poumei Naga JOHAN 15 Bible Online

JOHAN 15 - Poumei Naga bible

JOHAN 15

¹“E darkha bejü acheche nasüe, ea Apuonou darkha kipei-khowo süe.

²Ahinou tao-a buyu rashi shimoyu bo veishi puhnou vilaiwu baiwe; alia rashi shiyu bo veishiye panou rashi shipure donou puhnou soushee peiwe.

³Neletaowo louzü Enou neletao hi paopeiyu chipao nanou sousheepei chere.

⁴Ahinou tobai soumoa bulo, alia Enou neletao hi tobai soumoa bulai. Bo talinou bejü hi tobaisoumoa taomo louzü rashi shilou hoyu kua, neletao-a Ahinou tobai soumoa bumo louzü rashi shilou hoe.

⁵“E darkha bejü nasüe, neletaosü bo taoe. Ahinou tobai soumoa buyu ea Enou puh hi buyu mai sünasü rashi alaosou shilai; daiolouzü E loumoa neletao nou hatalia soulou hoe.

⁶Maita linou Ahinou tobai soumoa bumolouzü, puhye sü boli kua shilaiwu-a panou kita baiwe; alia sübüyu botaoye sü podzüloua meihi polaithou deiwu baiwe.

⁷Neletao nou Ahi tobai soumoa bulouzü ea Achipao taosü neletao hi tobai soumoa bulouzü, neletao nou züpayu tali khokhaio, alia sünasü neletao donou soupeilai.

⁸Neletao nou rashi alaosou shiloua Arozümaitaoe touyu zhopaoh souyu sünanou Apuoye soudusho peiwe.

⁹Apuonou Eye leshi peiyu kua, Enou neletaoye leshi peire; Avei leshi hinou tobai soumoa bulo.

¹⁰Enou Apuo chikhatao züloua puh leshi hinou tobai soumoa buyu kua, neletao-a Achikhatao zülouzü neletao nou Aleshi hinou tobai soumoa buloulai.

¹¹“Avei sayu nahai neletao hi buloure donou, alia neletao vei sayuhai liche loure donou Enou haitaosü neletao hi paopeire.

¹²Haihai Achikha nasüe, süolouzü Enou neletaoye leshiyu kua neletao-a alinou liye leshilo.

¹³Maita linou puh samaitao donou thaipeiyu süjünou dukouyu leshi kukhe hae.

¹⁴Enou neletao hi chikha peiyu hai neletao nou soulouzü, neletao hai Asamaie.

¹⁵Enou neletaoye kilaitao tea kupu more, daiolouzü kilai nanou puhvei paopunou dai sousa touyu sümoe. Ana Enou neletaoye samaitao tea kuloure, daiolouzü Enou Apuo hinou choulouyu teiteisü neletao hi Enou paongao peire.

¹⁶Neletao nou Eye dolou moe, ana neletao nou taho rashi shiloure donou ea neletao vei rashi nasü teisanou buloure donou Enou neletaoye doloure ea buh thoupeire. Alia sükua neletao nou Azhih hinou Puohi khoyu tasü puhnou neletao hi peilai.

¹⁷Südonou Enou neletao hi chikha peia paoyu nasü hainae: alinou liye leshilo.

¹⁸“Deiphao mainou neletaoye ngaora louzü, sünanou neletaoye ngaoramo jühinou raia Eye ngaorare touyusü sülo.

¹⁹Neletao hai deiphao veie toulouzü, deiphao mainou lah puhveiye sü leshilai. Ana neletao hai deiphao maivei moyu donou, alia Enou neletaoye deiphao hinou dolouyu donou, deiphao mainou neletaoye ngaorawe.

²⁰Enou neletao hi paopeiyu chipao nasü lilo; ‘Kilai talia puh paopu jünou dumoe.’ Puletao nou Eye souvea-souho louzü, puletao nou neletaoye-a souvea souholai; puletao nou Achi zülouzü, puletao nou neletao chi-a zülai.

²¹Ana Azhih donou sütao veishi hai puletao nou neletao pei hi soulai, daiolouzü puletao nou Eye seive peiyu puhye sümoe.

²²Enou taveloua puletao hi paopeimo louzü, puletao hai mah bupaimoe. Ana chuo puletao vei mah donou puletaoye khaipeire hare.

²³Eye ngaorayu puhnou Apuoye-a ngaorawe.

²⁴Enou puletao hrohinou maita linoua soukhai moyu vah taosü soumoe toulouzü puletaosü mah bupaimoe; ana chuo puletao nou sheetaosü ngaoloure, alia Eye-a Apuoye-a ahaiyenou ngaora loure.

²⁵Haisü puletao razhaihi rüthoukhai touyu chipao nasü vetere donoue, ‘Puletao nou qo alia ha-a Eye ngaora loure.’

²⁶“Ana Enou Puo hinou neletao hi seivepei laiyu, süolouzü Puo hinou velaiyu acheche Rako, soukha-apeionou veyu kisü puhnou Avanou zhopaoh soulai;

²⁷alia neletao-a Avanou zhopaoh soulai, daiolouzü neletao-a shurai hinou Eye koa bue.