Read Poumei Naga JOHAN 17 Bible Online

JOHAN 17 - Poumei Naga bible

JOHAN 17

¹Jisu nou chi haitao hai paoyu thaisü, raki hilo zhuloua paoe, “Apuo, pha nasü veloure; Ne Nahpoutu nou neye soudusho peiloure donou Ne Nahpoutuye soudusho peikhaio.

²Daiolouzü nenou puh hi peikhai touyu puletao hrülaihi puhye panou teisa ahri peiloure donou, nenou puh hisü deiphaomai hrülai pei hi khore khouko nasü peiwure.

³Alia puletao nou alikhei baiyu acheche Ramai neye süyu, alia nenou seiveyu Jisu Khrista puhye süyu sünanou teisa ahri nasüe.

⁴Nenou soukhaio tea Ahi peikhai touyu vah nasü souchewu-a Enou neye deiphao hinou soudusho peire.

⁵Alia Apuo, deiphao soumo jühinou Enou neye koa khouko-ava buzhoyu sünanou chuo nenou Eye ne nghojü hinou soudusho peikhaio.

⁶“Deiphao hinou nenou Ahi peikhai touyu puletao hi Enou nezhihsü süngao peire. Puletao sü neveie, alia nenou puletaoye Ahi peire, alia puletao nou ne chipaosü züloure.

⁷Alia nenou Ahi peikhai touyu teiteisü ne hinou vebaie touyu sü puletao nou chuo süloure;

⁸daiolouzü nenou Ahi peikhai touyu chipao taosü Enou puletao hi peire, alia sütaosü puletao nou poloure ea Esü nehinou ve touyu sü puletao nou chekhaoa süloure; alia nenou Eye seive peie touyu sü puletao nou louche loure.

⁹“Enou puletao donou veachi paowe. Enou deiphaomai donou veachi paomoe ana nenou Ahi peikhai touyutao donou paobaie, daiolouzü puletaosü nevei baie.

¹⁰Avei teitei hai nevei baie, alia nevei taosü Aveie; alia puletao vanou Eye soudusho peire.

¹¹Alia chuo Esü deiphao hi bupukhai laimoe, ana puletao louzü deiphao buhie, alia Ewo nehi tavewe. Mashi Apuo! Ahainou alikhei baiyu kua, puletaoye-a panou alikhei souloure donou, nenou Ahi peikhai touyu nezhih süna khouko hinou puletaoye khotou peikhaio.

¹²Enou puletaoye koa bubu kisü, nenou Ahi peikhai touyu nezhih süna khouko vanou Enou puletaoye khotou peire; sheeyu larübvü hinou paoyu nasü vetere donou ha-kare nahpoutu likhei baideinou puletao kukhe louzü mailia hamoe daiolouzü Enou puletaoye khotou peire.

¹³Ana chuo E nehi tavewe; alia Avei asah nasü lah puletao lehi liche-a buloure donou Enou deiphao bubu kinou chi haitaohai paowe.

¹⁴Enou puletao hi ne chipao nasü peire; alia deiphao mainou puletaoye ngaorae daiolouzü E hai deiphao hinou moyu kua puletao-a deiphao hinou moe.

¹⁵Enou puletaoye deiphao hinou potapeiwo tea nehi veachi paomoe, ana puletaoye ashina hinou khotou peiwo tea nehinou khowe.

¹⁶E hai deiphao hinou moyu kua puletao-a deiphao hinou moe.

¹⁷Puletaoye achechena hinou soushee peio. Nevei chipao sü acheche nasüe.

¹⁸Nenou Eye deiphao hi seiveyu kua Enou puletaoye deiphao hi seiwure.

¹⁹Alia puletao-a acheche hinou soushee loure donou Enou puletao donou Elah sousheewe.

²⁰“Enou haitao likhei donou veachi paobai moe, ana puletao chipao vanou Eye louche louyu puletao donoua paowe

²¹süolouzü puletao hrülaiye panou ali souloure donou Enou veachi paowe. Apuo, nenou Ahi buyu ea Enou nehi buyu kua, süolouzü nenou Eye seive peie touyusü deiphao mainou louche loure donou puletaoye-a panou Eh hi buloukhaio.

²²Ne ea Enou ali baiyu kua puletaoye-a panou ali souloure donou nenou Ahi peikhai touyu khouko ava nasü Enou puletao hi peire.

²³Puletaoye panou alikhei souloure donou Enou puletao hi bue ea nenou Ahi bue, sükuyu hinou nenou Eye seivepeie ea nenou Eye leshiyu kua puletaoye-a leshiwe touyu sü deiphao mainou süloulai.

²⁴“Apuo, deiphao soumo jühinou nenou Eye leshi-a Ahi peikhai touyu Avei adusho nasü puletao nou zhuloure. Ahi peikhai touyu maitaoye Enou buyu buh hinou Eye koa panou buresü Enou züpae.

²⁵O! Checheyu Apuo! deiphao mainou neye süloumoe, ana Ewo neye süe, alia nenou Eye seivepeie touyu sü mai haitaonou süwe.

²⁶Nenou Eye leshi peiyu lesha nasü puletao hi bure donou, alia E-a puletao hi bure donou, Enou ne zhihsü puletao hi süngao peire, alia sünasü Enou süngaopu peikhailai.”