Read Poumei Naga JOHAN 18 Bible Online

JOHAN 18 - Poumei Naga bible

JOHAN 18

¹Jisu nou sükua veachi paoyu thaisü puhnou puh rozümai taoye koa Kidron reitou tacho pare. Buh süna hisü kipei ali bue, alia Jisu nou puh rozümai taoye koa sühi talou loure.

²Chuo Jisu ye shoh soupeiyu Judas-a buh sünasü süwe; daiolouzü Jisu nou puh rozümai taoye koa sühinou ve daozhazhawe.

³Südonou Judasnou napao adumaitao ea Pharisee maitao hinou seiveyu Rom reihmai ea Rathokihi reihkhaomai taoliye sapoa, meibvü, loumei ea reih bahseitao poloua kipei sünahi tare.

⁴Sükisü Jisu nou puh pei hi vere pfüphou süloua, nghojülo takou loua puletao hi paoe, “Neletao thaohye phouwe?”

⁵Puletao nou puh hi chila peie, “Nazareth Jisu ye phouwe.” Jisu nou puletao hi paoe, “Esü puh-e.” Alia puhye shoh souyu Judas-a puletaoye koa la-a bue.

⁶Puhnou puletao hi, “Esü puh-e,” tea paoyu kisü puletaosü thaitsüloua deiphi kaokoure.

⁷Süthai-a puhnou puletao hi noupue, “Neletao thaohye phouwe?” Alia puletao nou paoe, “Nazareth Jisu ye phoue.”

⁸Jisu nou chila peie, “Esü puh-e touyu sü Enou neletao hi paopeire; südonou neletao nou Eye phoue toulouzü mai haitaoye panou talouwo.”

⁹Sünahai puhnou, “Nenou Ahi peikhai touyu taoye sü Enou mailia panou hawumoe,” tea paoyu chipao nasü panou vetere donoue.

¹⁰Süthaisü Simon Pitar nou puh hi buyu khoche nasü paizhouloua napao peichana qila sünaye podaoe ea puh nou zhoulo sü daodere. Qila süna zhihsü Malkhas toue.

¹¹Sükisü Jisu nou Pitar hi paoe, “Ne khoche nahai khokhahi pokhailou thouwu-o! Apuonou Ahi peikhai touyu pai nasü Enou külai mowu?”

¹²Süthaisü Rom reihmai taonou puletao pei chayuna ea Jihudimai reihmai taoye koa Jisu ye niloua puhye sü rainou phuwure,

¹³alia raikai-a puhye Anna hi save, daiolouzü puh hai süna pohi napao peichana soua buyu Kaipha paoh-e.

¹⁴Kaipha hai, “Mai alinou maisou süh soua thaipeiyu nanou veikouhie,” tea Jihudimai hi paopeiyu mai sünasüe.

¹⁵Simon Pitar ea rozümai kukhe nanou Jisu thaifü loure. Rozümai kukhe nanou napao peicha naye shikhoyu donou, puhnou Jisu ye koa napao peichana chikukihi loure,

¹⁶sükisü Pitar sü vakou kikhu bomü hinou la-a bue. Südonou napao peichanaye shikhoyu rozümai kukhe nanou vakouhi khaipa kikhu bomü khoa buyu loumainapai hi paopei-a Pitarye kijüpamü hi saloure.

¹⁷Kikhu bomü khoa buyu loupainou Pitar hi paoe, “Ne-a mai hainavei rozümaitao hrohinou ali mowu?” Pitar nou chila peie, “E moe.”

¹⁸Alia chuo teiseiyu donou kilaimaitao ea vahbuhmai taonou meiveinou mei souloua puletao lah la-a meivou-a bue. Alia Pitar-a puletaoye koa la-a meivou-a bue.

¹⁹Sükisü napao peicha nanou Jisu hi puh rozümaitao ea puhvei doupeiyu chipao vanou noutare.

²⁰Jisu nou puh hi chila peie, “Enou deiphaomai hi dua paongaore; Enou Jihudimai hrülainou vedzüa buyu rathobuhtao ea Rathoki hinou teisanou doupeie. Enou hatalia kheia paokhai moe.

²¹Südonou ne daidonou Ahinou nouwe? Achipao chouyu maitao hi Enou puletao hi dai paopeisa touyu sü noukhaio; Enou dai paosa touyu puletao nou süwe.”

²²Jisu nou haibüa paoyu kisü, sühinou la-a buyu vahbuhmai alinou kou puh bahnou Jisu ye pha-a paoe, “Nenou napao peichanaye sübüa chila peilaiwu?”

²³Jisu nou puh hi chila peie, “Enou paomahre toulouzü, mah sünasü haihi buyu mai hrülaihi paopa ngaokhaio; ana Enou züa paore toulouzü, daidonou ne Eye dawe?”

²⁴Süthaisü Annanou chukoutea Jisu ye baorai pheipapeimoa napao peichana Kaipha hi seitare.

²⁵Alia Simon Pitarwo louzü sühinou la-a meivou-a bue. Südonou kukhemai taonou puh hi paoe, “Ne-a puh rozümaitao hrohinou ali mowu?” Ana Pitar nou süsü ba-a paoe, “E moe.”

²⁶Napao peichana kilaitao hrohinou ali, süolouzü Pitar nou nou daodeyu süna thaihou jüraimai alinou noue, “Enou neye kipei hinou puhye koa buyu ngaomokhaiwu?”

²⁷Pitar nou sükia bapu khaire; alia sübü hinou houjü alinou khaopare.

²⁸Süthaisü puletao nou shohna hinou Jisu ye Kaipha kihinou sapoa teideikhowona fühao hi saloure. Jihudimaitao louzü Tachonüh vei vai toure donou naa thaifüa puletao lah souzhailou more donou fühao khele taloumoe.

²⁹Südonou Pilatnou vakou tapa puletao hi noue, “Neletao nou mai haina pei hi sü dai mah dukhaiwe?”

³⁰Puletao nou puh hi chila peie, “Mai haina hai ashi souyumai moe toulouzü Ehnou puhye save ne bah hi thoupeiwu laimoe.”

³¹Pilat nou puletao hi paoe, “Sükulouzü neletao lah puhye saloua lah neletao vei razhai thaifüa puh pei hi chikukhaio.” Ana Jihudimai taonou ba-a puh hi chila peie, “Eletao donou maita mailiye southeayu zhai hae.”

³²Haisü Jisu nou puh hai athai kana tyanou thailai tea paongao peiyu chipao süna vetere donoue.

³³Pilat nou puh fühao hi khailou puloua ea Jisu ye kuloua puh hi paoe, “Ne Jihudimai Veowu?”

³⁴Jisu nou chila peie, “Süsü nelah netsünou paobaiho, kukhe mainou nehi Avanou sünasü paowe?”

³⁵Pilat nou chila peie, “Ehai Jihudimai aliwu? Haisü lah nemainou ea napao adumaitao nou neye Abah hi thoupeibaie. Nenou dai souwure?”

³⁶Jisu nou chila peie, “Avei vedei louzü deiphao haina hinou moe; Avedei hai deiphao haina hinoue toulouzü, Akilaimai taonou Eye Jihudimaitao bah hi thoupeiwu more donou reihzü vuzülai. Ana Avedei louzü deiphao hinou vemoe!”

³⁷Südonou Pilatnou puh hi noue, “Sütoulouzü newo vemai aliwu?” Jisu nou chila peie, “Ehai vemai alie tea nenou paoe. Achechena vanou zhopaoh soure donou Eye nawure ea süna donou Esü deiphao hi veloubaie. Acheche hinou veyu mai talinou Apaisü chouwe.”

³⁸Pilatnou puh hi paoe, “Acheche touyu sü daie?” Puhnou süna paoyu thaisü, vakou Jihudimai taohi tapa puloukhaia puletao hi paoe, “Enou puh hinou soumahyu alia ngaoloumoe.

³⁹Ana Enou neletaoye donou Tachonühki hukhahi buyu maita mailiye phapeiyu neletao vei zhai ali bue. Südonou Jihudimai veoye Eye panou neletaoye donou phapeiyu züpawu?”

⁴⁰Puletao nou paikua raopulou khaire, “Mai haina moe, Barabbasye nou bailai!” Ana Barabbas louzü maivei saotoumai alie.