Read Poumei Naga JOHAN 2 Bible Online

JOHAN 2 - Poumei Naga bible

JOHAN 2

¹Süthai teithe asü zhousü Galilee hi buyu Kana nuh hinou sheenghiyu li buloure, alia Jisu pfüa sühi bue;

²Jisu ea puh rozümai taoye-a sheenghiyu sühisü ku save thoure.

³Darkha zhaoh halou khaie, Jisu pfünou puh hi paoe, “Puletao vei darkha zhaoh hare.”

⁴Jisu nou puh hi paoe, “Oh naotupai, nenou Eye koa dai soure bue? Aphasü vete mohie.”

⁵Puh pfünou kilai maitaohi paoe, “Puhnou neletao hi apao tali soukhaio.”

⁶Alia sühisü Jihudimai vei sousheeyu zhai thaifüa, leeki alili hinou dzüchovou kaih pha loulou sü chuh leeki arou pove khaikhaitoue.

⁷Jisu nou kilai taohi paoe, “Leeki haitaosü dzünou rüthou phoukhaio.” Alia puletao nou leeki sütaosü taihi khete rüthou phoure.

⁸Alia sükisü puhnou puletao hi paoe, “Chuo dzü daotou saopa loua nühbuh hi peipha-apeio hi pokou peikhaio.” Südonou puletao nou dzü süsü puh hi saosha koupeie.

⁹Chubü hinou darkha zhaoh dalouyu dzünasü nühbuh hi peipha-apeionou po chilouyu kisü, alia haihai daikinou velousa touyu sümoa (ana dzü saopoa veyu kilaitao louzü sükhaia), puhnou sheeyupuye kuloua

¹⁰puh hi paoe, “Mai hrülainou arai kihai darkha zhaoh sho-aveinanou khaipeiwe; alia maikhe mainou shonü sholouyu thainou shoshina khaipeiwe; ana newo darkha zhaoh shovei nasü chu koutea khaikou khaitoue!”

¹¹Jisu nou raikaiyu shee haina hai Galilee hi buyu Kana hinou soua puh vei khouko-ava nasü pongaoe; alia puh rozümai taonou puhye loucheloue.

¹²Süthaisü puhnou puh pfü, puh thaihou-jürai maitao ea puh rozümaitaoye koa Kapernahum hi takoure ea sühinou puletaosü teithe daotu nai-a bue.

¹³Jihudimai Tachonüh nasü ngheitei koure, südonou Jisu nou Jerusalem hi tapa loure.

¹⁴Rathoki hinou puhnou cho, zhaotu ea rahou zhoyu mai, alia shano leayu maitao nou hupo poa buyu ngaoloure.

¹⁵Alia rainou süda souloua puhnou zhaotua, choa veishinou koa Rathoki hinou hutare; alia puhnou shano leayu maitao vei shano sü lalaire ea puletao vei arübuh taosü popeishou khaire.

¹⁶Puhnou rahou zhoyu maitaohi paoe, “Buh hai hinou na haitaosü poloua tawo; neletao nou Apuo kihai hu pobuh souwu laimoe.”

¹⁷Alia “Ne kiye donou lenouyu nanou Alekhe hai meibüa deilai,” tea rükhai touyu nasü puh rozümaitao nou licho loure.

¹⁸Sükisü Jihudimai taonou puh hi paoe, “Nenou vah haina souyu hi nezü bue touyu pongaore Eh hi dai shee soungaolou süe?”

¹⁹Jisu nou puletao hi chila peie, “Rathoki haina hai souhawuwo, alia Enou sünasü teithe asü hinou soushu loulai.”

²⁰Süthaisü Jihudimai taonou paoe, “Rathoki hainasü po raidairou loua soue, anou newo sünahai teithe asü hinou soushulou laiwu?”

²¹Ana Jisu nou paoyu Rathoki nawo louzü puh pfüphao vanou paobaie.

²²Südonou puhnou athai hinou hrishu louyu kisü, puh rozümai taonou puletao hi haihai puhnou paokhai toue touyusü liloure, alia puletao nou sheeyu larübvü ea Jisu nou paokhai touyu chipao nasü louche loure.

²³Chuo Jerusalem hinou Tachonüh hi bubuki puhnou souyu sheetao sü ngaoloua mai taolinou puhye louche loure.

²⁴Ana Jisu nou puh lah puletaoye louchemoe, daiolouzü puhnou puletaoye sükhaie,

²⁵alia puletao vanou maita linoua zhopaoh souyu puhye donou koyu hae; daiolouzü puh lahnou emai lehi dai bue touyu hai süa bue.