Read Poumei Naga JOHAN 20 Bible Online

JOHAN 20 - Poumei Naga bible

JOHAN 20

¹Rathozhou shohna teimaibu kinou Magdalini Meri nou khüh hi tahoe ea chuh nasü khühmü hinou phao laiyu sü ngaoloure.

²Südonou puhnou Simon Pitar ea Jisu nou leshiyu kukhe rozümai sünahi taveloua puhai hi paoe, “Puletao nou Mapaoye khüh hinou potare, alia puletao nou puhye kahi pokhairesa touyu sü Ehnou sümoe!”

³Südonou Pitar nou rozümai kukhenaye koa khüh hilo tahoe.

⁴Puhai sü koa tutae, ana rozümai kukhe nanou Pitar jünou turailoua khüh hi velou raire;

⁵alia puhnou kikouloua zhulouyu kisü, khüh sah nasü sühinou buyu ngaoloure, ana puhnou khevai taloumoe.

⁶Sühinou Simon Pitar nou puh thainou taveloua khüh hi taloue. Puhnou sühinou jüyu sahna buyu,

⁷alia Jisu pei hi zükhai touyu pei züsah nasü jüyusah naye koa khaimoa süna lah buh akuli hinou kheitou khaitoua khaikhai touyu sü puhnou ngaoloure.

⁸Südonou khüh hi veraiyu kukhe rozümai süna-a khevai talou ngaoloure ea louche loure;

⁹daiolouzü sheeyu larübvü hinou Jisu hai athai hinou hrishulou vuzülai tea paokhai touyusü chu koute puletao nou süloumoe.

¹⁰Südonou rozümai sühai sü puhai kihi khaitare.

¹¹Ana Meri louzü khühpe hinou la-a kra-a bue, alia puhnou kra-a buyu hinou kikouloua khüh hi zhuloue;

¹²alia sahnü kaa-a banouyu rakivamai ahai sü Jisu pfüphao pokhaiyu buh hinou, alinou pei hinou ea alinou phi hinou chobua buyu sü puhnou ngaoloue.

¹³Puhainou puh hi noue, “Naotupai, daidonou ne krawe?” Puhnou puhai hi chila peie, “Puletao nou A Mapaoye potare, alia puletao nou puhye kahi pokhairesa touyu sü Enou sümoe.”

¹⁴Puhnou sübüa paowu-a thailo reiveyu kisü Jisu ye la-a buyu ngaoloure; ana sünasü Jisue touyu sü puhnou süloumoe.

¹⁵Jisu nou puh hi paoe, “Naotupai, ne daidonou krawe? Ne thaohye phouwe?” Puhye nou kipei akhowo nasüe tea choloua, puhnou puh hi paoe, “Dou-apeio, nenou puhye potare toulouzü, puhye pokhaiyu buh sü Ahi paongao peikhaio, alia Enou taho puhye poloulai.”

¹⁶Jisu nou puh hi paoe, “Meri!” Puhnou reiveloua puh hi Ebriamai lanou paoe, “Rabboni!” (Süvei kowo louzü Dou-apeio touwe.)

¹⁷Jisu nou puh hi paoe, “Eye deiso, daiolouzü E Apuohi khelou mohie; ana Athaihou jürai taohi taho puletao hi haikua paokhaio, ‘Esü Apuo ea neletao Puo, A Ramai ea neletao Ramai hi kheta-e.’ ”

¹⁸Südonou Magdalini Meri nou taho rozümai taohi paoe, “Enou Mapaoye ngaoloure;” alia puh hi Jisu nou paopeiyu chitao sü puhnou puletao hi paongao peire.

¹⁹Rathozhou süna koukhe hisü rozümai taonou Jihudimai taoye piyu donou kikhu khua vedzü louyu kisü, Jisu nou tave puletao hrohinou laloua puletao hi paoe, “Neletao hi kaonayu buloutheo.”

²⁰Puhnou haibüa paoyu thaisü, puletao hi puhbah ea puhnasü pongaoe. Südonou rozümai taonou Mapaoye ngaolouyu kisü lesathou alao souloure.

²¹Jisu nou puletao hi paopue, “Neletao hi kaonayu buloutheo. Apuonou Eye seipeiyu kua Enou neletaoye-a seiwe.”

²²Alia puhnou sübüa paoyu thaisü, puhnou puletao pei hi ssü houkhaipei-a paoe, “Rako Mashi sü ngaoloukhaio.

²³Neletao nou mai talivei mah khaipei louzü, sütao sü khaipeiwure; neletao nou mai talivei mah khaipei molouzü, sütaosü khaipei moe.”

²⁴Rozümai kiahaitao hrohinou ali soua buyu, nahbei tea kuyu Thomas sü Jisu veyu kisü puletaoye koa bumoe.

²⁵Südonou rozümai kukhe taonou puh hi paongaoe, “Ehwo Mapaoye ngaoloure.” Ana Thomasnou puletao hi paoe, “Enou puhbah hinou hushu zheemü ngaomo sasü, alia Abah tounou hushu zheemü taohi thaithou mosasü, alia Abahnou puh nahi thaithou molouzü, Ewo louche laimoe.”

²⁶Teithe acha thaisü, puh rozümai taosü kikha hinou vedzüa bupukhaire, alia Thomas-a puletaoye koa bue. Kikhu taosü khukhaitoue, ana Jisu nou tave puletao hrohinou laloua paoe, “Neletao hi kaonayu buloutheo.”

²⁷Süthaisü puhnou Thomas hi paoe, “Ne bahtousü haihi thaithouwo, ea Abah sü zhukhaio; alia nebah topaloua Anahi thaithoukhaio, lü ha-a buwuso, anou louchelo.”

²⁸Thomasnou puh hi chila peie, “A Mapao ea A Ramai!”

²⁹Jisu nou puh hi paoe, “Nenou Eye ngaolouyu vanou louchelouwu? Eye ngaolou moyuma louche louyu puletao sü rakoveie.”

³⁰Larübvü hainahi rüthou moyu shee kukhe alao Jisu nou puh rozümaitao nghojü hinou soue.

³¹Ana Jisu hai Ramai Nahpoutu Khristae touyu sü neletao nou louche loure donou, alia loucheloua neletao nou puhzhih hinou ahri ngaoloure donou shee haitao sü rüthou khaitoue.