Read Poumei Naga JOHAN 21 Bible Online

JOHAN 21 - Poumei Naga bible

JOHAN 21

¹Haithaisü Jisu nou Tibiria zaipe hinou puh rozümai taohi tave ngaopu peikhaie; alia puhnou haibüa ngaopeie.

²Simon Pitar, nahbei tea kuyu Thomas, Galilee hi buyu Kana hinou veyu Nathanel, Zebedee nahpoutuhai, alia kukhe puh rozümai ahai taosü vedzüa bue.

³Simon Pitar nou kukhe taohi paoe, “Ewo khah phouta laire.” Puletao nou puh hi paoe, “Eletao-a neye koa talai.” Südonou puletao nou taloua sakhao hi louloure; ana süzhou khei hisü puletaosü halia phouloumoe.

⁴Ana shohna tei thepayu kisü Jisu sü zaipe hinou la-a bue, ana rozümaitao nou süna hai Jisue touyu süloumoe.

⁵Jisu nou puletao hi noue, “Khemaina taore, neletao khah lia phoulou mowu?” Puletao nou puh hi chila peie, “Halia phoulou moe.”

⁶Puhnou puletao hi paoe, “Neletao vei khahbe nasü sakhao zhoulo vahi laithou khaio, alia neletao nou daotu ngaoloulai.” Südonou puletao nou laithouyu kisü, khah loupouleyu donou puletao nou khahbe nasü pai palou hore.

⁷Jisu nou leshiyu rozümai nanou Pitar hi paoe, “Haina hai Mapao-e!” Simon Pitar nou sünasü Mapao-e touyu choulouyu kisü, puhnou puh sahnü nouthouloure (daiolouzü vah souyu donou puhsü baitoua bue) alia zaihi choloure.

⁸Ana kukhe rozümaitao louzü khahnou lou phoupeiyu khahbe nasü süthaipoa sakhao hinou takoue, daiolouzü puletao sü deithe hinou dousho more, hacho Kaihlipha dou baire.

⁹Puletao nou deithe hi tapalouyu kisü, sühisü veimei ea süpei hi khah buyu, alia raokhao daotu-a buyu ngaoloure.

¹⁰Jisu nou puletao hi paoe, “Neletao nou chubü hinou nilouyu khahtao hronou daotu pokoukhaio.”

¹¹Südonou Simon Pitar nou sakhao nahi takou louloua khahdu kaihlia raingouasünou lou phoupeiyu khahbe nasü deithe hi süthaipare; alia khahtaosü poushokhaia khahbe nasü soupha khaimoe.

¹²Jisu nou puletao hi paoe, “Takou toulouwo.” Rozümaitao hrohinou maitalinoua, “Ne thaohwe?” tea khuveia puh hi noumoe, puletao nou sünasü Mapaobaie touyu süe.

¹³Südonou Jisu nou takouloua raokhao nasü poloua puletao hi peie, alia sükua khah nasüa peie.

¹⁴Chuo haina hai Jisu nou athai hinou hrishu louyuthai rozümai taohi ngaopeiyu lüh asü chenae.

¹⁵Puletao nou toulou cheyu thaisü Jisu nou Simon Pitar hi noue, “Johan nahpoutu Simon, haitao jünou nenou Eye leshi kouhimoe?” Puhnou chila peie, “Ovai Mapao, Enou neye leshie touyu sü nenou süwe.” Jisu nou puh hi paoe, “Azhaotaoye vaipei khaio.”

¹⁶Jisu nou puh hi lüh ahaichena noue, “Johan nahpoutu Simon, ne Eye leshiwu?” Puhnou chila peie, “Ovai, Mapao, Enou neye leshie touyu sü nenou süwe.” Jisu nou puh hi paoe, “Azhaotaoye khopei khaio.”

¹⁷Jisu nou puh hi lüh asü chena noue, “Johan nahpoutu Simon, ne Eye leshiwu?” Pitar sü levea loure daiolouzü Jisu nou puh hi lüh asü koute, “Ne Eye leshiwu?” tea puh hi noue, alia puhnou puh hi paoe, “Mapao, nenou hali-hala süwe; Enou neye leshie touyu sü nenou süwe!” Jisu nou puh hi paoe “Azhaotaoye vaipei khaio.

¹⁸Cheche vuzünou Enou nehi paowe, nenou nahlebuki louzü nelah sahvealoua nenou taho nüyu buh hisü nenou tabaiwe; ana nenou tsüloulouzü, nenou nebah sü topalai, alia kukhe alinou neye phuloua nenou tanümoyu buh hi satalai.”

¹⁹(Pitar nou kakuyu athai zhaido hinou Ramaiye soudusho peilaisa touyu süngao peire donou Jisu nou haisü paoe.) Süthaisü Jisu nou puh hi paoe, “Athai fülo!”

²⁰Pitar nou thailo reiveyu kisü Jisu nou leshiyu rozümai nanou puhaithai füpoa laiyu ngaoe. Rozümai sünasü koukhe vai touyuki Jisu khao hinou vüa, “Mapao, neye shoh soupeire nasü thaoh-e?” tea nouyu nasüe.

²¹Pitar nou puhye ngaolouyu kisü Jisu hi noue, “Mapao, mai hainawo louzü kaku khailai?”

²²Jisu nou puh hi chila peie, “E khaivemo koute Enou puhye panou hria bunülouzü, sünanou neye donou dai bue? Athai fülo!”

²³Südonou rozümai sünasü thailaimoe touyu ko sünasü thaihou jürai maitao hrohi kubou loure. Ana Jisu nou puh hi puh hai thailai moe tea paoyu moe, ana “E khaivemo koute Enou puhye panou hria bunülouzü, sünanou neye donou dai bue?” tea puhnou paobaie.

²⁴Chi haitao vanou zhopaoh peiyu ea chi haitao rükhaiyu rozümai nasü hainae; alia puhvei zhopaoh hai chechewe touyu hai Eletao nou süe.

²⁵Ana Jisu nou soukhai touyu vah kukhe alaosou buhie. Sütaohai ali linou rüthou khailai toulouzü, rüre larübvü taosü deiphao teitei noua pfüpai louhoe tea Enou chowe.