Read Poumei Naga JOHAN 3 Bible Online

JOHAN 3 - Poumei Naga bible

JOHAN 3

¹Chuo Phariseemai hrohinou Nikodemas tea kuyu Jihudimai peikhomaili bue.

²Mai hainanou khei Jisu hi veloua puh hi paoe, “Rabbi, nehai Ramai hinou veyu dou-apeimai alie touyu sü Ehnou süe; daiolouzü Ramai nou puhye kozhopei molouzü maita linoua nenou souyu shee haitaosü soulou hoe.”

³Jisu nou puh hi chila peie, “Chichenou Enou nehi paowe, maita linoua nashulou molouzü, puhnou Ramai Vedei sü ngaolouhoe.”

⁴Nikodemas nou puh hi paoe, “Kakua mainou tsülouyu thainou nakulou khailai? Puhnou puh pfü pouhi lou ahaikholoua nakhailou süwu?”

⁵Jisu nou chila peie, “Chichenou Enou nehi paowe, maita linou dzü hinou ea Rako hinou nalou molouzü, puhnou Ramai Vedei hi loulou hoe.

⁶Vasou hinou nalouyu sünanou vasoue, alia Rako hinou nalouyu sünanou rakoe.

⁷‘Nele hrülainou nashulou vuzülai’ tea Enou nehi paoyu donou khupaso.

⁸Teikhainou hününü buh hi hüvewe, alia nenou sünavei khosü chouwe, ana sünahai daikinou vesa moa kahi taresa touyu nenou sümoe, südonou Rako hinou nalouyu mai talia sükheihaoe.”

⁹Nikodemasnou puh hi noue, “Haisü kabüa souloulai?”

¹⁰Jisu nou puh hi chila peie, “Newo Israelmai dou-apeimaili soua haisü sümowu?

¹¹Chichenou Enou nehi paowe, Ehnou süyu nasü Ehnou paowe, alia Ehnou ngaolouyu na vanou Ehnou zhopaoh souwe; ana nelenou Eh vei zhopaoh popeibae.

¹²Enou neletao hi deiphao vei na khemai vanou paoyu ki neletao nou Eye louche peimoe, kabüa Enou rakivei natao vanou paoyuki neletao nou Eye louche khailai.

¹³Alia Raki hinou kouyu Mai Nahpoutu puh baimoanou mailia raki hi khekhai mohie.

¹⁴“Alia Moses nou rekounou nghou naye polayu kua, Mai Nahpoutuye-a polashu vuzülai,

¹⁵süolouzü puhye loucheyu mai talinou halou hoyu ahri ngaoloulai.”

¹⁶Daiolouzü Ramai nou deiphao maiye leshishoyu donou puhnou puhvei likhuyu Nahpoutuye peire, südonou puhye louche louyu maitalisü hakhailai moe, ana teisa ahrisü ngaoloue.

¹⁷Daiolouzü Ramai nou puh Nahpoutuye panou deiphao maiye mah dukhaire donou deiphao hi seivepei moe, ana puh vanou deiphao maiye khaipei loure donou seive-e.

¹⁸“Puhye loucheyu mai taliye sü chiku moe; ana louche moyu mai taliye sü chiku chere, daiolouzü puhnou Ramai vei likhuyu Nahpoutu zhih hisü louche loumoe.

¹⁹Alia chikuyu nasü hainae, süolouzü ava sünasü deiphao hi veloue, ana maikhe mainou avana jünou azhi naye leshi loure, daiolouzü puletao vei vah taosü ashi baie.

²⁰Daiolouzü ashi vah souyu mai veishinou avaye ngaorawe, alia avahi vemoe, süku molouzü puhvei vah taosü popa ngaowushulai.

²¹Ana acheche vah souyu puhnou puh vah taosü Ramai hinou souloure touyu nasü panou sheesha-a ngaoloure donou avahi vewe.”

²²Süna thaisü, Jisu ea puh rozümai taosü Judea teidei hi tare; sühinou puhnou puletaoye koa chao-a dzükhao dapeie.

²³Johan-a Salim ngheiki hi buyu Aenon hinou dzükhao dapeia bue, daiolouzü sühisü dzü alaosou bue; alia maikhe mainoua sühi taveloua dzükhao daloue.

²⁴Daiolouzü sükisü Johanye hukhahi thoumohie.

²⁵Sükisü Johan rozümai kamainou khüsheeyu naanou vanou Jihudimai aliye veiva loure.

²⁶Alia puletao nou Johan hi taveloua puh hi paoe, “Rabbi, Jordan rei teinghi palova hinou neye koa buyu alia puh vanou nenou zhopaoh souyu mai sünasü buh haihinou dzükhao dapeia bue, alia mai hrülaisü puh hi tavekhai baire!”

²⁷Johan nou chila peie, “Raki hinou sünasü puh hi peimo louzü maita linou hatalia ngaolou hoe.

²⁸‘Ewo Khrista moe, ana Eye puhjü raia seivepei khaitoubaie’ tea Enou paoyu sü lah neletao nou Azhopaohmai souwe.

²⁹Nghirepaiye ngaolouyu puh sü sheerepue; ana la-a ea puh chi kei-a buyu sheerepu vei samai sünanou sheerepu vei pai chouloua le sashowe; südonou Avei asah nasü chuo chekhoure.

³⁰Puhwo dupu vuzülai ana Ewo khaikou vuzülai.”

³¹Reikounou kouyu puhnou mai hrülai jünou dukoukhai toue; deiphao nou veyu puhwo deiphao vei baie, alia deiphao vei vanou chi paobaie; Rakinou kouyu puhnou mai hrülai jünou dukhai toue.

³²Puhnou ngaolouyu ea choulouyu süna vanou puhnou zhopaoh souwe, ana maita linoua puh zhopaoh sü polou moe.

³³Ana puh zhopaoh polouyu puhnou Ramai hai chekhaoe tea le laloure.

³⁴Daiolouzü Ramai nou seiveyu puhnou Ramai chipao paoe, daiolouzü Ramai nou Rakohai khadaloua peimoe.

³⁵Puonou Nahpoutuye leshie, alia puh bah hi ha teitei thaothoukhai peire.

³⁶Nahpoutuye louche louyu puh hisü teisa ahri bue; Nahpoutu süna chi zümoyu puhnou ahrisü ngaolai moe, ana Ramai vei rarou sü puh pei hi chaoa bue.