Read Poumei Naga JOHAN 4 Bible Online

JOHAN 4 - Poumei Naga bible

JOHAN 4

¹Chuo Jisu nou Johan jünou koua maikhe maiye panou rozümai souloure ea dzükhao daloure touyu hai Phariseemai taonou chouloure touyusü Jisu nou sülouyu kisü,

²(Checheyu louzü, Jisu puh vuzünou mailia dzükhao dapeimoe, ana puh rozümaitao likheinou soubaie),

³puhnou Judea thaowu-a Galilee hi dakhai tare.

⁴Alia puhye donou Samaria tachopoa tare hi buloure.

⁵Südonou Jakob nou puh nahpoutu Josef hi peikhai touyu dou süna ngheiki buyu Sukhar tea kuyu Samaria vei nuhdu alihi puhnou tave louloure.

⁶Jakob vei dzükhao sü sühi bue, alia Jisu nou veihdu tayu vanou veasholoua dzükhao süna pehi kou chobu loure. Teile süsü heako teilecho kiahai tayu phahi noue.

⁷Samariamai pfüli dzü pfüre donou tave loure. Jisu nou puh hi paoe, “Eye panou dzü kükhaio.”

⁸Daiolouzü puh rozümai taosü touso hrüre donou nuhdu hi tare.

⁹Samariamai pfüpainou puh hi paoe, “Kakua newo Jihudimai ali khaia, Samariamai pfüpai Ahinou panou dzü küre donou khowe?” Daiolouzü Jihudimainou Samariamai kha mata moe.

¹⁰Jisu nou puh hi chila peie, “Nenou Ramai vei sa-apeina ea nehinou dzü khoyu puh hai thaohsa touyu süa buyu thaio nenou, puh hinou kholai, alia puhnou nehi hriyu dzü nasü peiloulai.”

¹¹Naotu süpainou puh hi paoe, “Dou-apeio, newo dzü saoloure halia hae, alia dzükhao nasü thoushowe; daikinou nenou hriyu dzü nasü ngaoloulai?

¹²Newo Eh puo-pao Jakob jünou duhiwu? Puhnou Eletao hi dzükhao haina hai peie, alia sühinou puh-a, puh nahmai tao-a alia puhvei kikhaorü tao-a po küloue.”

¹³Jisu nou puh hi paoe, “Dzü haina keyu mai talisü reipu khailai,

¹⁴ana Enou peilaiyu dzü süna külouyu mai taliwo reipukhai khailaimoe; Enou peilaiyu dzü sünasü puhvei lekhe hinou teisa hrire donou küpayu dzüla datalai.”

¹⁵Naotu sünapainou puh hi paoe, “Dou-apeio, Eye panou reipu more donou, alia buh haihi khaive panou dzü pfüpu more donou, Ahi dzü sünasü peikhaio.”

¹⁶Jisu nou puh hi paoe, “Takhaio, alia ne chaaye buh haihi ku save khaio.”

¹⁷Naotu süpainou puh hi chila peie, “Achaa hae.” Jisu nou puh hi paoe, “Nenou, ‘Achaa hae’ tea paoyu sü paozüe;

¹⁸daiolouzü nevei chaa angoure, alia nenou chu koa buyu süna-a nechaa moe; sünasü nenou cheche-a paongaore.”

¹⁹Naotu süpainou puh hi paoe, “Dou-apeio, nehai rachi paolamai alie touyu sü Enou süe.

²⁰Eh puo-pao mainou deichi haina hinou Ramaiye thowe; ana emainou Ramaiye thore buh louzü Jerusalem hi bai tea nelenou paoe.”

²¹Jisu nou puh hi paoe, “Naotupai, Eye louchepei khaio, Puoye deichi haina hinou moa Jerusalem hinou nelenou tho more pha nasü vere.

²²Nelenou sümoyu nasü nelenou thowe; Ehwo Ehnou süyu naye thowe, daiolouzü khailu peiyu hai Jihudimai hinou ve.

²³Ana chekhaoyu ratho mainou Puoye rako ea acheche hinou tholaiyu phasü vere, alia chue, daiolouzü Puonou puhye sükua thoyu sü phoue.

²⁴Ramai hai rakoe, alia puhye thoyu mainou rako ea acheche hinou thovu zülai.”

²⁵Naotupai nou puh hi paoe, “Razhepu (Khrista tea kuyuna) nasü velai touyu hai Enou süe, puhnou veyu kisü Eletao hi puhnou halihala paongaokhai peilai.”

²⁶Jisu nou puh hi chila peie, “Neye chipha-a buyu Esü puh-e.”

²⁷Süphabü hinou puh rozümai taosü tave. Puhnou naotumai aliye koa chipha-a buyu sü ngaoloua puletaosü khupa loure, ana mailinoua, “Ne dai züpawe?” moa “Ne daidonou puhye koa chiphawe?” tea paomoe.

²⁸Sühinou naotu süpainou puh dzükhou sü thaowu-a nuhdu hi dakhai veloua sühi buyu maikhemai hi paoe,

²⁹“Tavekhaio, Enou soukhai-soukhai touyu veishi Ahi paongao peiyu mai sünaye ve zhukhaio. Puh hai Khrista laiwu?”

³⁰Südonou puletao nou nuhduna hinou tapaloua puh hi tavere.

³¹Süphabü hinou rozümai taonou puh hinou khoa paoe, “Rabbi, potouwuwo!”

³²Ana puhnou puletao hi paoe, “Neletao nou sümoyu Avei toure touso bue.”

³³Südonou rozümai taonou puletao hrohinou alinou lihi haibüa paoe, “Maita linoua puh hi touso pove peire moma?”

³⁴Jisu nou puletao hi paoe, “Atouso louzü Eye seive peiyu puhvei leli souyu, alia puh vah soucheyu nasüe.

³⁵Neletao nou, ‘Khou adai shonou cha chilai hie,’ tea paomowu? Ana Enou neletao hi paoe, neletao nghithou pfüla loua dourou taosü daizhou cha chire donou meiche-a buresa touyu sü zhukhaio!

³⁶Thoutai vuyu na-a, cha chiyuna-a koa sazhore donou cha chiyu nanou zhosü ngaowe, alia teisa ahri vei donou routhou sü podzü loue.

³⁷Daiolouzü ‘Kamainou vuthoue ea kukhe alinou chiloue’ tea paoyu sü chekhaoe.

³⁸Neletao vei zho-hah loukhai moyu dou hisü panou cha chire donou Enou neletaoye seitawe; kukhenou te-a soukhaitoue, alia neletao nou puletao vei vah hisü lou zha ngaozho loure.”

³⁹Naotu sünapainou, “Enou soukhai-soukhai touyu veishi sü puhnou Ahi paongao peire,” tea zhopaoh souyu vanou nuhdu sünahi Samariamai alaosou puhye louche loure.

⁴⁰Südonou Samariamai taonou puh hi taveyu kisü puhye sü puletao hi naipeibaio tea puh hinou khowe, alia Jisu nou sühisü teithe ahai nai-a bue.

⁴¹Alia puh chipao vanou mai alaosou louche puloue,

⁴²alia puletao nou naotupai hi paoe, “Chuo nevei chipao vanou Eletao nou louche louyu moe, daiolouzü Eletao-a Eletao lah puhnou paoyusü chouloure, alia chekhaoa puh hai deiphao maiye Khailu-apeio nasüe touyu sü Ehnou süe.”

⁴³Teithe ahai thaisü puhnou buh sünasü thaowu-a Galilee hi tare.

⁴⁴Daiolouzü Jisu puh lahnou, “Rachi paolamai taliye lah puh teidei hi mainou tsükhouyu hae,” tea zhopaoh soua paoe.

⁴⁵Südonou puhnou Galilee hi velouyu kisü, Galilee hi maitao nou puhye sasa-a sheloue, daiolouzü puhnou Tachonühki Jerusalem hinou souyu teiteisü puletao nou ngaoloue, daiolouzü puletaoa nühbuh hisü veloue.

⁴⁶Süthaisü puhnou raiki dzünou darkha zhaoh sou dalouyu Galilee hi buyu Kana nuh hi tavepu khaire. Alia Kapernahum hisü nahpoutu soua buyu vahdumai ali bue.

⁴⁷Puhnou Jisu hai Judea hinou Galilee hi veloure touyu choulouyu kisü, puhnou puh hi taveloua puhye nou Kapernahum hi takouloua puh nahpoutuye souvei peiloure donou kholoure, daiolouzü puh hai thaiyu laire.

⁴⁸Jisu nou puh hi paoe, “Nelenou sheetao ea khupa vahtao ngaomo sasü louchekhai laimoe.”

⁴⁹Vahdumai nanou puh hi paoe, “Dou-apeio, Anah thaimo jühinou takou peikhaio.”

⁵⁰Jisu nou puh hi paoe, “Takhaio, ne nahpoutu sü hrilai!” Jisu nou puh hi paopeiyu chipao nasü mai sünanou louche loua tare.

⁵¹Puhnou takoua buyu hinou puh kilai taonou puhye tave daoloua puh hi paoe, “Ne nahpoutu sü hriloua bure!”

⁵²Puhnou puletao hi puh hai dai pha hinou veipaloue tea noue. Puletao nou puh hi paoe, “Do koukhe teilecho ali tayu kinou puh sü rakee khaire.”

⁵³Sühinou puonou teilecho süsü Jisu nou puh hi, “Ne nahpoutu sü hrilai” tea paoyu pha nasüe touyu süloure; südonou puh-a ea puh kikhamai teitei-a louche loure.

⁵⁴Shee hainasü Jisu nou Judea hinou Galilee hi velouyu thainou souyu shee ahai chena süe.