Read Poumei Naga JOHAN 5 Bible Online

JOHAN 5 - Poumei Naga bible

JOHAN 5

¹Haithaisü Jihudimai nühli buyu vanou Jisu nou Jerusalem hi takhere.

²Jerusalem hi zhaotu romü ngheiki hi Ebriamai lah hinou Bethzatha tea kuyu kipao angou buyu zaibvü ali bue.

³Kipao angou sütao hisü sho-vaimai, nghichamai, phichamai, ea pothaimai alaosou züa bue; (Puletao sü dzü lüyu khoa bue;

⁴daiolouzü chacha kisü zaibvü sühisü Mapao vei rakivamai alinou takou loua dzü sü soulü lüwe. Dzü soulü peiyu thaibü zaibvühi taloulou raikaiyu mai talisü puhvei sounou tali hinou veilou baiwe.)

⁵Sühisü po shiacha soukouyu mai ali bue.

⁶Jisu nou puhye ngaolouyu kisü puh hai buh sühinou teile phashona züa bukoure touyu süloua puhnou puh hi paoe, “Ne veilouyu züpawu?”

⁷Soua buyu mai sünanou puh hi chila peie, “Dou-apeio, dzü süna lüyu phaki Eye zaibvü hi pothou peire mai alia hae, alia Enou talouyu kisü kukhemai alinou Ajünou railoulou baiwe.”

⁸Jisu nou puh hi paoe, “Lashulo, ne züh poloua takhaio.”

⁹Alia sübühinou mai sünasü veiloure, alia puhnou puh züh sü poloua taloure. Teithe sünasü Soteithe-e.

¹⁰Südonou Jihudimainou sou veilouyu mai sünahi paoe, “Haisü Soteithe-e, alia nenou ne züh poloua tayusü razhainou aetoumoe.”

¹¹Ana puhnou puletao hi chila peie, “Eye souvei peiyu mai sünanou Ahi, ‘Ne züh poloua takhaio’ tea paoe.”

¹²Puletao nou puh hi noue, “Nehi, ‘Ne züh poloua takhaio’ tea paoyu mai nasü thaoh-e?”

¹³Ana sou veilouyu mai sünanou Jisu hai thaohsa touyu sümoe, daiolouzü buh sühisü mai alaosou buyu vanou Jisu nou tavai loure.

¹⁴Süthaisü Jisu nou puhye rathoki hinou ngaoloua puh hi paoe, “Zhukhaio, ne chuo veiloure! Haijünou shipuyu kukhe nepei hi vemore donou mah soupu khaiso.”

¹⁵Mai sünanou taloua puhye souvei peiyu mai nasü Jisue tea Jihudimai taohi paopeire.

¹⁶Alia Jihudimainou Jisu ye souveayu sü süna vanoue, daiolouzü puhnou vah hainasü Soteithe zhounou soue.

¹⁷Ana Jisu nou puletao hi chila peie, “Apuonou chu koutea vah souwe, alia E-a vah soua bue.”

¹⁸Sükua paoyu vanou Jihudimainou puhye southeare donou phoupue, daiolouzü puhnou Soteithe soukhoyu thebaimoa puh lahnou Ramaiye paokha-a Ramaiye puh Puo tea kuwe.

¹⁹Jisu nou puletao hi paoe, “Cheche vuzünou Enou neletao hi paowe, Puonou soua buyu sü ngaoloua puhnou soubaimoa Nahpoutu lahnou puh madonou hatalia soulou hoe; daiolouzü Puonou souyu tasü Nahpoutu nou-a sükheihaoa souwe.

²⁰Daiolouzü Puonou Nahpoutuye leshie alia lah puhnou soua buyu teitei sü puh hi pongaopeiwe. Alia neleye panou khupa loure donou sütao jünou dukouyu vahtao-a puhnou puh hi ngaopeilai.

²¹Daiolouzü Puonou athai maiye sou hrishu loua puletaoye ahri peiyu kua, Nahpoutua puhnou züpayu maitao hisü ahri peie.

²²Puonou mai taliye chiku moe, ana chikure zü teitei sü Nahpoutu hi thoupeire,

²³sükua puletao nou Puoye tsükhouyu kua Nahpoutuye-a mai hrülainou tsükhoulai. Nahpoutuye tsükhou moyu mai talinou puhye seiveyu Puo sünaye tsükhoumoe.

²⁴“Cheche vuzünou Enou neletao hi paowe, Achipaotao choulouyu ea Eye seiveyu puhye louche louyu mai talisü teisa ahri ngaoloure; alia puh sü chikuyu hi loukhai laimoe, ana athai hinou ahri hi kacho paloure.

²⁵“Cheche vuzünou Enou neletao hi paowe, thaimainou Ramai Nahpoutu pai choulaiyu phasü vere, alia chue, alia pai süna choulouyu khemaisü hriloulai.

²⁶Daiolouzü Puo puhlah hi ahri buyu kua, Puhnou Nahpoutuye-a lah puh hi ahri buloure aetou peiwure;

²⁷alia puh hi chikukou peire zü nasü peiwure, daiolouzü puh sü Mai Nahpoutue.

²⁸Süna vanou khupayu souso; daiolouzü khüh taohi buyu veishinou puh pai choulaiyu phasü vewe

²⁹alia puletao vei khüh hinou tashu loua, avei soukhai touyu maitao nou ahri hi hrida shulai, alia ashi soukhai touyu maitao nou chikuyu hi hrida shulai.

³⁰“E lah Akhoukonou hatalia soulou hoe; Enou choulouyu süna thaifüa Enou chikue; alia Avei chikuyu sü chekhaoe, daiolouzü E lah Aleli phoumoe ana Eye seive-apeio puh leli phoubaie.

³¹“Enou lah Avanou zhopaoh peibai louzü, Azhopaoh sü chekhao moe.

³²Ana Avanou zhopaoh peiyu mai kukhe ali bue, alia puhnou Avanou zhopaoh peiyu sü chekhaoe touyu sü Enou süe.

³³Neletao nou Johan hi mai seive-e alia puhnou acheche vanou zhopaoh peie.

³⁴Enou mai hinou zhopaoh ngaolou vuzülai touyu vanou moe; ana neletaoye panou khailu loure donou hainasü Enou paobaie.

³⁵Johan hai meitao-a ea va-a buyu meibvüe, alia neletao nou puh vei ava hinou pha jütou sa-a buyu züpae.

³⁶Ana Ahi buyu zhopaoh sünanou Johan vei jünou dukou hie, daiolouzü souchere donou Apuonou Ahi peikhai touyu vah taonou, süolouzü Enou soua buyu vah haitao vuzünou Puonou Eye seivepeie touyu Avanou zhopaoh souwe.

³⁷Alia Eye seive peiyu Apuonou puhlah Avanou zhopaoh soue. Puh paisü neletao nou choukhai mohie, puh zhusü neletao nou ngaokhai mohie;

³⁸alia neletao lekhehi puh vei chipao hai tobai soumoa bumoe, daiolouzü puhnou seive peikhai touyu sünaye neletao nou louche moe.

³⁹Nelenou Sheeyu Larübvütao hinou phoua bue, daiolouzü neletao nou sütao hinou teisa ahri bue tea chowe; alia sütaonou Avanou zhopaoh souwe;

⁴⁰Sütoukhaia neletao nou ahri ngaoloure donou Ahi venü moe.

⁴¹“Enou mai hinou paoshoyu phoumoe.

⁴²Ana Enou neletaoye süwe, süolouzü neletao lekhehi Ramaiye leshiyu hae.

⁴³Enou Apuo zhih hinou ve, alia neletao nou Eye popei moe. Mai kukhe alinou lah puh zhih hinou velouzü, puhye sü neletao nou popeilai.

⁴⁴Alikhei baiyu Ramai Puh hinou veyu paoshoyu nasü phoumoa, alinou ali hinou paoshoyu ngaonüyu neletao nou kabüa Eye louche loulai?

⁴⁵Enou neletaoye Apuo nghojü hinou mah paodu khaipei shulai tea chowuso. Neletaoye mah paodu khaipeirena louzü neletao nou rei-a buyu Moses baie.

⁴⁶Neletao nou Mosesye louche louzü, neletao nou Eye louche loulai, daiolouzü puhnou Avanou rüe.

⁴⁷Ana neletao nou puhnou rükhai touyu taosü louche molouzü, kabüa neletao nou Achipao taosü louche loulai?”