Read Poumei Naga JOHAN 6 Bible Online

JOHAN 6 - Poumei Naga bible

JOHAN 6

¹Haithaisü Jisu nou Tibiria zai tea kuyu Galilee zai polo dovahi tare.

²Alia maisou alaosou puhthaisü fütare, daiolouzü puhnou sounou maitaoye souvei peiyu shee taosü puletao nou ngaoloue.

³Jisu nou deichi hi tapa loua sühinou puh rozümai taoye koa kou buloure.

⁴Chuo Jihudimai vei Tachonüh nasü ngheikoure.

⁵Sühinou Jisu nou puh nghithou pfüla payu kisü maisou alaosou puh hilo taveyu ngaoloua, puhnou Philip hi paoe, “Mai haitaoye panou toure Eletao nou daikinou raokhao hrüloulai?”

⁶Chi hainasü puhnou Philip zhai zhure donou paobaie, daiolouzü lah puhnou dai soulaisa touyu sü süa bue.

⁷Philip nou puh hi chila peie, “Denarü kaih ahai nou raokhao hrüloua sütaonou puletao ali liye dao daotu peiyu koutea chelou hoe.”

⁸Puh rozümaitao hrohinou Simon Pitar thaihou Andrewnou puh hi paoe,

⁹“Shithou raokhao pho angou ea khah ahai pfülaiyu khemainah ali haihi bue; ana maisou haizhozhou hisü sütaotunou dai souloulai?”

¹⁰Jisu nou paoe, “Maikhe maiye panou kou bukhaio.” Buh sühisü poudai alaosou bue. Südonou maikhemai hrülainou kou buloure; sühi kou buyu taosü mai thengou phae.

¹¹Süthaisü Jisu nou raokhao taosü poloure, alia puhnou Ramai hi kalo paowu-a sütaosü puhnou sühi koubuyu maitaohi zhihpeire. Puhnou khah-a sükua zhihpeire, alia puletao hrülainou lahlah züpasü touloure.

¹²Alia puletao nou puletao pouphou toulouyu thaisü, puhnou puh rozümai taohi paoe, “Halia panou souha-a more donou toushoyu kou-lihtao veishi podzülo.”

¹³Südonou puletao nou sütaosü podzü loure ea shithou raokhao pho angou hinou maikhe mainou toushoyu kou-lih taonou sülai kiahai phouloure.

¹⁴Südonou puhnou souyu shee nasü maikhe mainou ngaoloua paoe, “Chekhaoa deiphao hi vere rachi paolawo nasü hainare!”

¹⁵Süthaisü Jisu nou puhye maikhe mainou tave taitsüa panou Veo souloure donou nilou laire touyu süloua Jisu puhlah deichi hilo tarei tapu khaire.

¹⁶Koukhe louyu kisü Jisu rozümai taosü zaihi loutare,

¹⁷alia puletao nou sakhao hi talou loua zai hinou tapoa Kapernahum hilo tare. Sükisü tei mailoure, alia Jisu sü puletao hi velou mohie.

¹⁸Süpha kisü teikhai shishoa hüyu donou zai dzü sü houng loure.

¹⁹Puletao nou kaacho asü adai pha sakhao saopoa takouyu kisü, Jisu nou zai peinou sakhao nahi takou ngheiyu sü puletao nou ngaoloure, alia puletaosü ngaopisho loure.

²⁰Ana puhnou puletao hi paoe, “Ebaie; piso.”

²¹Sühinou puletao nou puhye sasa-a sakhaohi sathouloure, alia thala-a sakhao nasü puletao nou ta-a buyu teidei hisü velou loure.

²²Thainaisho sü zai polo dova hinou chaoa buyu maisou taonou buh sühisü sakhao alikhei bubaie touyu sü süloure. Puletao nou Jisu hai puh rozümai taoye koa sühi loumoe, ana rozümai taosü puhye samoa puletao lah tare touyu sü süe.

²³Ana Tibiria hinou sakhao kukhe taosü Mapao nou kalo paopeiwu-a raokhao touyu buh ngheiki hisü tave loure.

²⁴Südonou maikhe mainou buh sühisü Jisu-a puh rozümai tao-a hayusü ngaoloua, puletao lah sakhao taohi louloua Jisu ye phoupoa Kapernahum hi tare.

²⁵Puletao nou zai polo dova hinou puhye tave ngaolouyu kisü, puletao nou puh hi paoe, “Rabbi, ne dukinou buh haihi velou loue?”

²⁶Jisu nou puletao hi chila peie, “Cheche vuzünou Enou neletao hi paoe, neletao nou Eye phoutayu hai shee khemaitao ngaolouyu vanou moe, ana neletao nou raokhao pouphou toulouyu vanou baie.

²⁷Ha-kalaiyu touso donou vah souwuso; ana Mai Nahpoutu nou neletao hi peilaiyu teisa hrümainou bulaiyu touso süna donou vah soulo; daiolouzü puh pei hi Puo, Ramai nou puh vei paoshee soukhaire.”

²⁸Süthaisü puletao nou puh hi paoe, “Ramai vahtao soua bure donou Ehnou dai souyu kaoe?”

²⁹Jisu nou puletao hi chila peie, “Ramai vah louzü puhnou seivekhai touyu sünaye neletao nou loucheyu süna süe.”

³⁰Südonou puletao nou puh hi chila peie, “Sükulouzü Eletao nou ngaoloua neye louche loure donou nenou dai shee soungaolai? Nenou soua buyu vah nasü daie?

³¹Eletao puo-pao mainou rekounou manna toue; alia haibüa rüthoure, ‘Puhnou puletao hi toure raokhao raki hinou peie.’ ”

³²Südonou Jisu nou puletao hi paoe, “Cheche vuzünou Enou neletao hi paowe, raki hinou neletaoye raokhao peiyu nasü Moses moe; ana Apuonou neletaoye raki hinou acheche raokhao nasü peiabaie.

³³Daiolouzü Ramai vei raokhaona louzü rakinou kouloua deiphao mai hi ahri peiyu sünasüe.”

³⁴Puletao nou puh hi paoe, “Mapao, Eletao hi raokhao hainasü teisanou peikhaio.”

³⁵Jisu nou puletao hi paoe, “E hai ahri raokhaoe; Ahi taveyu puhsü houkhai laimoe, alia Eye louche louyu puhsü reikhai laimoe.

³⁶Ana Enou neletao hi paoe, süolouzü neletao nou Eye ngaoloure ana neletao nou louche moe.

³⁷Apuonou Ahi peikhai touyu hrülaisü Ahi velai; alia Ahi velou louyu puhye sü Enou hulai khailai moe.

³⁸Daiolouzü E sü Aleli soure donou raki hinou koumoe, ana Eye seive peiyu puh leli soure donou koubaie.

³⁹Alia Eye seive peiyu puh leli nasü hainae, süolouzü puhnou Ahi peikhai touyu teiteisü Enou halia souhawu laimoe, ana akhai teitheki sütaoye panou hrishu loulai.

⁴⁰Daiolouzü Apuo leli nasü hainare, süolouzü Nahpoutuye ngaolouyu ea puhye louche louyu mai talisü teisa ahri ngaoloulai; alia Enou puhye akhai teitheki sou hrishu loulai.”

⁴¹Sükisü Jihudimai taonou puh vanou noulealea loure, daiolouzü puhnou, “Ehai rakinou kouyu raokhao nasüe” tea paoe.

⁴²Puletao nou paoe, “Mai hainasü Eletao nou puh pfüpuoye süa buyu Josef nahpoutu Jisu mowu? Sükulouzü puhnou chuo kakua, ‘E hai rakinou koue,’ tea paowe?”

⁴³Jisu nou puletao hi chila peie, “Neletao lah neletao hrohinou noulealeaso.

⁴⁴Eye seive peiyu Apuonou puhye Ahi savepei molouzü, maita linoua Ahi velou hoe; alia Enou puhye akhai teitheki panou hrishu loulai.

⁴⁵Rachi paolamaitao larübvü hinou, ‘Alia puletao hrülaiye Ramai nou doupei loulai,’ tea rüwure. Puo hinou choulouyu ea doulouyu mai talinou Ahi vewe.

⁴⁶Süolouzü maita linoua Puoye ngaoloure toumoe; Ramai hinou veyu puh likheinou Puoye ngaobaie.

⁴⁷Cheche vuzünou Enou neletao hi paowe, louche louyu puhsü teisa ahri ngaoloure.

⁴⁸E hai ahri raokhao nasüe.

⁴⁹Neletao puo-paomai taosü rükounou manna toue, ana puletaosü thaire.

⁵⁰Maitalinou sünasü touloua thailai moyu rakinou kouyu raokhao nasü hainae.

⁵¹Ehai rakinou kouyu hriyu raokhao nasüe. Maitalinou raokhao haina toulouzü, puhsü teisanou hrilai; alia deiphao mainou hrire donou Enou peilaiyu raokhao nasü Avasoue.”

⁵²Südonou Jihudimai taosü puletao lah puletao hrohinou haibüa veiva-a paoe, “Kakua mai hainanou Eletao hi puh vasousü toure donou peilousüe?”

⁵³Südonou Jisu nou puletao hi paoe, “Cheche vuzünou Enou neletao hi paowe, neletao nou Mai Nahpoutu vasou toumo louzü ea puh zhe kümo louzü neletao hi ahri nasü hae.

⁵⁴Avasou touyu ea Azhe keyu puh hisü teisa ahri nasü bue, alia Enou puhye akhai teitheki sou hrishulai.

⁵⁵Daiolouzü Avasou hai touso chekhaoe, alia Azhe hai chekhaoa küloure nasüe.

⁵⁶Avasou touyu ea Azhe keyu puhsü Ahinou tobai soumoa bue, alia E-a puh hi tobai soumoa bue.

⁵⁷Hriyu Apuonou Eye seiyu büa ea Enou Apuo vanou hriyu kua, Eye touyu mai talia avanou hrilai.

⁵⁸Raki hinou kouyu raokhao nasü hainae, alia haisü neletao puo-pao maitao nou touloua thaitayu raokhao süna bümoe; raokhao haina toulouyu puhsü teisanou hrilai.”

⁵⁹Chipao haisü Jisu nou Kapernahum hi rathobuh hinou doupeia bubuki paoe.

⁶⁰Südonou puh thaifümai taolinou süsü choulouyu kisü haibüa paoe, “Haisü tatei shoyu chipaoe; thaohnou haisü keilai?”

⁶¹Ana puletao nou süna vanou noulealea-a bure touyu sü Jisu puh lahnou süloua, puletao hi paoe, “Haina hinou neletao le tsülouwu?

⁶²Sükulouzü neletao nou hakinou Mai Nahpoutu nou raiki puhnou buyu buh hi takheyu ngaolouzü kakulai?

⁶³Ahri peiyu hai rako noue, vasou louzü zhiyu alia hae. Enou neletao hi paopeiyu chipao taosü rakoe ea ahrie.

⁶⁴Ana neletao hrohi louche moyu mai kamai bue.” Daiolouzü Jisu nou louche moyutao sü thaohthaoh maisa, alia puhye shoh soupei laiyu mai nasü thaohsa touyu hai shurainou süa bue.

⁶⁵Alia puhnou paoe, “Süvanou Enou neletao hi paopeire süolouzü Puonou puh hi aetoupei molouzü maita linoua Ahi velou hoe.”

⁶⁶Südonou süzhouh thainou puh thaifümai taoli thaikhai tare ea puhye koa tapukhai more.

⁶⁷Jisu nou rozümai taohi paoe, “Neletaoa tabailaiwu?”

⁶⁸Simon Pitar nou puh hi chila peie, “Mapao, Ehnou thaoh hi talai? Nehisü teisa ahri chipaotao bue.

⁶⁹Alia nehai Ramai hinou veyu Masheeo nasüe touyu hai Ehnou louche loure ea süloure.”

⁷⁰Jisu nou puletao hi chila peie, “Enou neletao kiahaiye dolou mowu? Ana neletao hrohinou aliwo louzü rashi nasüe!”

⁷¹Sünahai puhnou Iskariot Simon nahpoutu Judas vanou paoe, daiolouzü puh hai rozümai kiahaitao hrohinou ali soua bukhaia puhye shoh souwulai.