Read Poumei Naga JOHAN 8 Bible Online

JOHAN 8 - Poumei Naga bible

JOHAN 8

¹[Süthaisü puletao hrülaisü lahlah kihi vetare, ana Jisuwo louzü Oliv deichi hi tare.

²Thainaisho shohna sü puh hai Rathoki hi tavepu khaire; sükisü maikhemai veishinou puh hi tave loure, alia puhnou kou buloua puletaoye doushu tare.

³Razhai dou-apei maitao ea Pharisee maitao nou khakha mah soua buyu hinou nilouyu naotumai aliye saveloua puhye panou puletao veishi nghojünou laloure.

⁴Puletao nou puh hi paoe, “Dou-apeio, naotu haipai hai khakha-a buyu hinou niloue.

⁵Eletao vei razhai hinou haibüyu naotumaiye chuhnou deitheawo tea Moses nou chikha peikhaitoue. Newo puh vanou dai paore bue?”

⁶Puletao nou chi haisü puh pei hi mah dukhaire do phoupa loure donou puh zhai zhua paobaie. Jisu nou kikouloua puh bahtounou kou deiphihi rüe.

⁷Alia puletao nou puh hi chi noua buyu hinou, puhnou lashuloua puletao hi paoe, “Neletao hrohinou mahlia hayu puh panou raikaia puhye sü chuhnou deikhaio.”

⁸Alia puhnou kikou puloukhaia puh bahtounou kou deiphihi rütakhaire.

⁹Ana puletao nou puhchi sünasü choulouyu kisü tsükhana hinou tashu poa ali linou takhaire, alia sühisü Jisu ea puh nghojünou la-a buyu naotupai süna likhei baire.

¹⁰Jisu nou pah pfülaloua puh hi paoe, “Naotupai, puletao daiki tare? Mailinoua ne pei hi mah dukhai mowu?”

¹¹Naotupainou chila peie, “Mapao, mailinoua mah dukhai moe.” Alia Jisu nou paoe, “Sükulouzü veire, E-a nepei hi mah dukhai moe; tawo, alia mah soupu khaiso.”]

¹²Jisu nou puletao hi paopukhaie, “E hai deiphao ava nasüe; Athai füyu puhnou teizhi hi talai moe, ana ahri vei ava nasü ngaoloulai.”

¹³Süthaisü Phariseemai taonou puh hi paoe, “Chuo nelahnou ne vanou zhopaoh peiwe; nevei zhopaoh hai chekhao moe.”

¹⁴Jisu nou chila peie, “Elah Avanou zhopaoh peia bu-a Azhopaoh hai chekhaoe, daiolouzü E hai daikinou vesa ea daiki tahosa touyu hai Enou süwe, ana neletao nou E hai daikinou vesa moa daiki tahosa touyu hai sümoe.

¹⁵Neletao nou vasou thaifüa chikuwe. Ewo maili-a chiku moe.

¹⁶Alia Enou chiku yuma Avei chikuyu hai chekhaoe, daiolouzü chikuyu hisü E lah baimoe, ana Eye seive peiyu Apuonou Eye kozhowe.

¹⁷Neletao vei razhai hinou mai ahai vei zhopaoh hai cheche-e tea rüthou khaitoue.

¹⁸Enou lah Avei vanou zhopaoh souwe, alia Eye seiveyu Apuonou Avanou zhopaoh souwe.”

¹⁹Südonou puletao nou puh hi paoe, “Nepuo daiki bue?” Jisu nou chila peie, “Neletao nou Eye-a Apuoye-a sümoe; neletao nou Eye sülouzü Apuoye-a süvuzülai.”

²⁰Puhnou chi haitaosü Rathoki hinou doupeia bubuki Sheelayu sübvü khaiyu kidena hinou paoe, ana maita linoua puhye nilou moe, daiolouzü puh vei phasü vetelou mohie.

²¹Jisu nou puletao hi paopukhaie, “E talai, alia neletao nou Eye phoulai, ana neletao hai neletao mah hinou thailai, Enou tayu buh hisü neletao velou hoe.”

²²Südonou Jihudimai taonou paoe, “Puhnou lah puhye southea laiwu, daiolouzü puhnou ‘Enou tayu buh hisü neletao nou velou hoe,’ tea paoe?”

²³Jisu nou puletao hi chila peie, “Neletao louzü khekounou ve, Ewo louzü reikounou ve; neletao louzü deiphao hinoue, Ewo louzü deiphao hinou moe.

²⁴Südonou neletao hai neletao mah hinou thailai tea Enou paoe; daiolouzü ‘E-e touyu puhsü E-e’ tea neletao nou louche molouzü neletao vei mah hinou neletaosü thailai.”

²⁵Süthaisü puletao nou puh hi noue, “Ne thaoh-e?” Jisu nou puletao hi paoe, “Shurainou Enou neletao hi paopeiyu nasüe.

²⁶Enou neletao vanou paore ea chikure alaosou bue; ana Eye seive peiyu puhsü chekhaoe, alia Enou puh hinou choulouyu nasü deiphao mai hi Enou paongao peiwe.”

²⁷Jisu nou puletao hi Puo vanou paoe tea puletao nou sülou moe.

²⁸Südonou puhnou puletao hi paoe, “Neletao nou Mai Nahpoutuye polashuyu kinou ‘E-e touyu puhsü E-e’ touyu hai neletao nou süloulai; süthaisü Enou halia Amadonou soumoe ana Apuonou Ahi doupeiyu thaifüa haitaohai paobaie touyusü neletao nou sülai.

²⁹Alia Eye seive peiyu puhsü Eye koa bue; puhnou E likhu thaopei moe, daiolouzü Enou teisanou puh züpasü souwe.”

³⁰Puhnou sübüa paoyu vanou, mai alaosou puhye louche loure.

³¹Süthaisü Jisu nou puhye louche louyu Jihudimai taohi paoe, “Neletao nou Achipao hinou tobai soumoa bulouzü, neletao hai chekhaoa Arozümai taoe,

³²alia neletao nou acheche nasü süloulai, alia acheche nanou neletaoye mado soupeilai.”

³³Puletao nou puh hi chila peie, “Eletao louzü Abraham tyaonahmai taoe, alia maitali vei kilai soukhai mohie. Südonou nenou ‘Neletaoye mado soupeilai’ tea paoyusü daiye paowe?”

³⁴Jisu nou puletao hi chila peie, “Enou neletao hi cheche vuzünou paowe, mah souyu mai talisü mah kilai nasüe.

³⁵Kilai nasü ki sünahi teisanou bumoe; ana nahpoutuwo louzü sühi teisanou buwe.

³⁶Südonou Nahpoutu nanou neletaoye mado soupei louzü, neletaosü chekhaoa mado souloulai.

³⁷Enou neletao hai Abraham tyaonahmai taoe touyu süe; ana neletao nou Eye southeare donou phouwe, daiolouzü Achipao hai neletao lekhehi buh hae.

³⁸Enou Apuoye koa ngaoyu nasü Enou paowe, alia neletao nou neletao puo hinou choulouyu nasü souwe.”

³⁹Puletao nou puh hi chila peie, “Abraham hai Eletao puoe.” Jisu nou puletao hi paoe, “Neletao hai Abraham nahmai louzü, Abraham nou souyu nasü neletao nou souwulai;

⁴⁰ana Ramai hinou achechena chouloua neletao hi doupeiyu mai Eye chuo neletao nou southealai tea phouwe. Abraham nou sübüa soukhai moe!

⁴¹Neletao puonou souyu vah nasü neletao nou souwe.” Puletao nou puh hi paoe, “Eletao louzü khanah moe; Eletao vei puo ali bue, süolouzü Ramaie.”

⁴²Jisu nou puletao hi paoe, “Ramai hai neletao Puo toulouzü, neletao nou Eye leshiwulai, daiolouzü Ehai Ramai hinou ve ea chuo Esü buh haihinou bure. Enou Amadonou velou moe, ana puhnou Eye seivepeie.

⁴³Neletao daidonou Enou paoyu sülou moe? Haisü neletao nou Achipao pfülou hoyu donou baie.

⁴⁴Neletao hai neletao puo rashina hinou ve, alia neletao lelihai neletao puo züpa souyu nasüe. Puh hai shurainou maiye southeayu nasüe, alia achecheye koa vah souzhore alia hae, daiolouzü puh hi acheche alia hae. Puhnou amada chi paoyu sü lah puh zhai thaifüa paobaie, daiolouzü puh hai amada nasüe ea amada teitei vei puo nasüe.

⁴⁵Ana Enou achechena paoyu donou, neletao nou Eye louche moe.

⁴⁶Neletao hrohinou thaohnou Eye mah paodukhai peilou süe? Enou acheche paowe toulouzü, daidonou neletao nou Eye louche peimoe?

⁴⁷Ramai hinou veyu puhnou Ramai chipaotao keiwe; neletao nou chipao sütao keibayu louzü neletao hai Ramai hinou vemoe.”

⁴⁸Jihudimai taonou puh hi chila peie, “Nehai Samariamai alie ea nehi rashi ali bue tea Eletao nou paoyu sü paozü mowu?”

⁴⁹Jisu nou chila peie, “Ahi rashi alia hae; ana Enou Apuoye tsükhouwe, alia neletao nou Eye tsükhou moe.

⁵⁰Enou Akathe phoumoe; ana süna phouyu ea chiku peiyu maili bue.

⁵¹Cheche vuzünou Enou neletao hi paoe, maita linou Achipao hai züa bulouzü puhnou athai sü ngaokhai laimoe.”

⁵²Jihudimai taonou puh hi paoe, “Chuo Eletao nou nehi rashi ali bue touyu sü süloure. Abraham-a rachi paolamaitao-a thaikhaire, ana ‘Maita linou Achipao hai züa bulouzü, puhnou athai nasü daokhai laimoe;’ tea nenou paoe.

⁵³Thaitayu Eletao puopao Abraham jünou nenou duhiwu? Rachi paolamaitao-a thaikhaire! Nelah neye nou thaohtu-a paowe?”

⁵⁴Jisu nou chila peie, “Elah Eye tsükhoubai louzü, Avei tsükhouyu nasü halia moe; neletao nou, ‘Puh hai Eletao vei Ramaie’ tea paoyu puh hai Eye tsükhou peiyu Apuoe.

⁵⁵Neletao nou puhye sükhaimoe; ana Ewo puhye süwe. Enou puhye sümoe tea paolouzü, E-a neletao büa amadamai souwulai. Ana Enou puhye süwe ea Enou puh chi züwe.

⁵⁶Neletao puo-pao Abraham nou Ateile nasü ngaolai tea lesae, puhnou sünasü ngaoloue ea le sashoe.”

⁵⁷Süthaisü Jihudimai taonou puh hi paoe, “Ne sü po raingou koutea pamo hie, alia newo Abraham ye ngaowu?”

⁵⁸Jisu nou puletao hi paoe, “Cheche vuzünou Enou neletao hi paowe, Abraham ye namo jünou Esü bue.”

⁵⁹Südonou puletao nou puhye deire donou chuh kou poloure; ana Jisuwo puh lah tutsü loua Rathoki hinou tapare.