Read Poumei Naga SEI-ATAMAI VAHTAO 1 Bible Online

SEI-ATAMAI VAHTAO 1 - Poumei Naga bible

SEI-ATAMAI VAHTAO 1

¹Leshiyu Theophilas: Avei larübvü araina hinou Jisu nou vah soushurai hinou, puhnou souyu ea doupeiyu,

²süolouzü puhye raki hi pokheyu teithe koute vei ko teitei sü Enou rüwure. Puhye raki hi pokhemojü puhnou Rako Mashi khouko vanou dopa louyu puhvei sei-atamai taoye chikha pei-a doupeie.

³Puhvei vea-hoyu thai teithe raidai levai hinou puhsü hriwe touyu sü motoulou hoyu zhopaohnoupu lüh taoli lah puhnou puletao hi ve ngaopeie. Alia puletao nou puhye ngao-a buyu hinou puhnou puletao hi Ramai Vedei vanou chi paongao peie.

⁴Alia puhnou puletaoye koa vedzüa buyu hinou, puletao hi chikha hainasü peie: “Neletao Jerusalem thaowu-a taso, ana Apuonou peilai tea apaopeikhai touyu süolouzü Enou neletao hi paongaoyu sapeina sünasü khoa bulo.

⁵Daiolouzü Johan nou dzünou dzükhao dapeie, ana phasho khaimoa neletaoye Rako Mashinou dzükhao dapeilai.”

⁶Südonou puletao nou vedzü louyu kisü, puh hi noue, “Mapao, nenou zhouvu teile haina hinou Vedei nasü Israel mai hi lukhaithou peilaiwu?”

⁷Jisu nou puletao hi paoe, “Apuonou lah puh mado hinou dadekhai touyu pha moa khou-teile sü neletaoye donou süre phamoe.

⁸Ana Rako Mashinou neletao pei hi kouyu kisü, neletao nou khouko sü ngaoloulai; alia neletao nou Jerusalem hi, Judea teitei hi, Samaria hi ea deiphao buh akhai koute Azhopaoh maitao soulai.”

⁹Alia puhnou sükua paocheyu thaisü, puletao nou zhua buyu hinou puhye sü teihi poku pare, alia teihao nou kou puhyesü puletao nghojünou züloua satare.

¹⁰Alia puhnou ta-a buyuki puletao nou tei hilo zhiteipoa buyu hinou, zhukhaio, sükhaimoa, sabanüh kaanou bahnouyu mai ahai puletao ngheiki kou la-a buloure,

¹¹alia puhai nou paoe, “He Galilee hi maitaore, neletao daidonou haihinou la-a teihi zhia buwe? Neletao hinou raki hi pokheyu Jisu haina hai, neletao nou puhye raki hi khetayu ngaoyu taibüa, puhsü khaive khailai.”

¹²Süthaisü puletao nou Jerusalem ngheiki buyu kaacho alipha douyu Oliv tea kuyu deichi hinou Jerusalem hi khaivere.

¹³Alia puletao nou nuhdu nahi velou louyu kisü puletao nou buyu kipei hi kide nahi tapare. Sühinou tave buyu taosü, Pitar, Johan, Jems ea Andrew; Philip ea Thomas, Bartholomew ea Mathiu, Alphia nahpoutu Jems, ea Simon Lenouduo alia Jems nahpoutu Judas haitaoe.

¹⁴Mai haitao nou naotumaitao, Jisu pfü Meri ea Jisu thaihoumai taoye koa vedzüloua tsüle ali soua tobai soumoa veachi pao-a bue.

¹⁵Alia teithe sütao kisü lüloumaitao hrohinou Pitar nou tashu laloua paoe (vedzüa buyu mai kaihlia kai phae),

¹⁶“Athaihou jürai maitao, Jisu ye nilouyu maitaoye süthai peiyu Judas vanou David mü hinou Rako Mashinou rai-a paopakhai touyu sheeyu larübvü vei chipao taosü chechenou vetelai.

¹⁷Daiolouzü puhye sü Eletao hrohi phouthoure, alia kuvah haina hi puhvei zha-a ngaozhowure.”

¹⁸(Mai hainanou puhvei ashi vah buu sünanou fü ali hüloure; alia sühinou puhsü pei-a kakou puhvu tsühle hinou deiphowu-a rai teitei sü vakou zhoupa khaire.

¹⁹Alia sükosü Jerusalem hinou hrüa buyu maikhemai hrülainou süloure, südonou puletao nou fü sünasü pule la hinou Akeldama, süolouzü “Zhefü,” tea saloure.)

²⁰“Daiolouzü Lou Larübvü hinou haikua rüwure, ‘Puh kisü panou hatheo, alia sühisü maitalia panou bumotheo.’ Alia haikua rüwure, ‘Puh vahbuh sü mai kukhe aliye panou thaolouwo.’

²¹“Südonou Johan nou dzükhao dayu hinou shua Jisu ye Eletao hinou potayu teithe koute,

²²Mapao Jisu nou Eletao hrohinou takou takhe-a buyu teile teitei hi Eletaoye koa laivuzüyu maitao hrohinou aliye panou Eletaoye koa puh hrishuyu zhopaoh soure donou dothou vuzülai.”

²³Südonou puletao nou mai ahaiye süolouzü Barsabbas tea kuyu Josef (puhye sü Jastas toulouzü sübaiwe) ea Mathias puhaiye kupaloure.

²⁴Süthaisü puletao nou haibüa veachi paoe, “Mapaowo nenou maikhemai hrülai vei lesü sükhaiwe, südonou Judas nou lah puhvei buh hi vetare donou thaowuyu sei-atamai taovei kuvah buh haina hi puhthao lou soupei loure

²⁵puhai hrohi thaohye nou dolouresa touyu sü Eletao hi ngaopeio.”

²⁶Alia puletao nou puhai zhihsü pothou rako zhuyu kisü Mathias zhihnou pare; südonou puhye sü sei-atamai kiali hrohi chothouwure.