Read Poumei Naga SEI-ATAMAI VAHTAO 10 Bible Online

SEI-ATAMAI VAHTAO 10 - Poumei Naga bible

SEI-ATAMAI VAHTAO 10

¹Süpha kisü Kaisaria hisü Kornelia tea kuyu maili bue. Puhsü “Italia reihme” tea kuyu Rommai reihmaitao hinou reihmai kaihli pei hi chayu mailie.

²Puh hai puhvei kikhamai taoye koa rathoyu hinou leishoyu ea Ramaiye pi-a hrüyu, toure hamai hi halia pakhaimoa peinüyu, alia tobai soumoa Ramai hi veachi paoa buyu mailie.

³Teitheli koukhe teilecho asü phahinou puhnou zho ali ngaoe. Sühisü puhnou Ramai vei Rakivamai aliye sheesha-a ngaoe ea sünanou taveloua “Kornelia!” tea puhye kue.

⁴Alia puhnou ngaopiloua puh hisü pheteiloua paoe, “Mapao, daie?” Rakivamai sünanou puh hisü chila peie. “Nevei veachitao ea nenou toure hamai hi peiyu vah taosü Ramai nou khrasho loure, alia ne khosü peire donou soudare.

⁵Alia chuo Jopa hi maiye seiho Pitar tea kuyu Simonye ku savelo.

⁶Puhsü Simon souhee vah souwoye koa bue, puh kisü zaidupe hinou bue.”

⁷Alia puhye chi phayu rakivamai sünanou tayu thaisü puhnou puh kilai ahaiye ea puh kuvah soure donou dopakhai touyu, rathoyu hinou leishoyu puhvei reihmai aliye puhnou kuloua,

⁸puletao hisü pawuyu na vanou chi pfüphou paongao peiwu-a puhnou puletaoye sü Jopa hi seitare.

⁹Thainaisho kisü puletao nou ludu hinou ta-a nuhdu sünahi takou ngheiyu kisü, Pitar sü heako teilecho kiahai tayu phakisü kipei hinou veachi paore donou tapare.

¹⁰Sükisü puhsü pouzüloua hatali tounü loure; ana puletao nou touso souda buki, puhnou zho li ngaoloure.

¹¹Puhnou raki houpakhai touyu, alia dushoyu sahba raiyu ha bvüli sünavei kainghou dai hinou khizhukoua deiphi hi phakouyu sü ngaoe.

¹²Alia süna levai hisü phi-bao dai pfüyu khao-sou tyali pounou sü-roupoa tayu khaonatao ea teihi raohou tyali loue.

¹³Sükisü pai alinou puh hisü, “Shulouwo Pitar ea dathea touwo!” tea paoe.

¹⁴Ana Pitar nou paoe, “Movuzüe, Mapao! Daiolouzü E vuhlia chaa taoyu moa sheemoyu na lia toukhai mohie.”

¹⁵Alia pai sünanou puh hi lüh ahai paopue, “Ramai nou sousheeyu nasü nenou sheemoe tea chowu laimoe.”

¹⁶Alia süsü lüh asü koute pae, süthaisü bvü nasü thalasou raki hi podakhai khere.

¹⁷Chuo Pitar nou puhnou ngaolouyu zho sünavei kosü dai tousa tea choha-a buyu hinou, zhukhaio, Kornelia nou seivekhai touyu maitao nou Simon kisü kahi bue touyu sü noupove süloua ea tave fühao bomü hinou laloua,

¹⁸“Pitar tea kuyu Simon sü haihi bubumoe,” tea kupaloua noue.

¹⁹Alia Pitar nou zho sünavei ko vanou cho-a buyu hinou Rakonou puh hi paoe, “Zhukhaio, mai asünou neye phoua bue.

²⁰Südonou shuloua takou khaio ea halia letsü khaimoa puletaoye koa tawo; daiolouzü Enou puletaoye seivebaie.”

²¹Sühinou Pitar nou mai sütaohi takouloua paoe, “Zhukhaio, neletao nou phoua buyu mai nasü E-e; neletao daidonou vewe?”

²²Puletao nou chila peie, “Eletaoye reihmai kaihpei chawo Kornelia nou seive-e. Puh hai Jihudimai hrülainou tsükhouyu acheche ea Ramaiye piyu mai lie. Puhye panou nevei chipao sü keiloure donou neye puh kihi kuvere donou sheeyu rakivamai alinou puh hi paopeie.”

²³Sühinou puhnou puletaoye sü kihi kulouloua sheloure. Thainaisho sü puhnou shuloua puletaoye koa tare, alia Jopa hinou lüloumai kamaitao-a puhye koa tare.

²⁴Teithe süna thainaisho sü puletao nou Kaisaria hi velou loure. Alia Kornelia sü puhvei tarai ea samaitaoye kuve dzükhaitoua puletaoye khoa bue.

²⁵Pitar nou ki sühi talouyu phakisü Kornelia nou puhye tapa daoloua puh phihi kaokouloua puhye khurüe.

²⁶Ana Pitar nou puhye süthai shuloua puh hi paoe, “Lashulouwo; E-a maibaie.”

²⁷Sükua Pitar nou puhye chi phapoa kikhavai talouyu kisü sühinou maitaoli vedzüa buyu sü puhnou ngaoloure.

²⁸Sühinou puhnou puletao hi paoe, “Jihudimai alinou tahrüh kukhemai aliye koa laiyu moa puhye ve daoyu hai Eh vei razhai thaifüa aetoumoe touyu sü nele lah nelenou sütoua bue. Ana Enou maitaliye chaa taoe moa sheemoe tea chowu laimoe touyu sü Ramai nou Ahi ngaopeire.

²⁹Südonou nelenou Eye kuloure donou seiveyu kisü, Enou halia motouyu soumoa tavebaie, südonou neletao nou Eye kuveyu hai daidonoue touyu sü Enou neletao hi nouwe?”

³⁰Kornelia nou chila peie, “Teithe adai jühi, Enou Aki hinou koukhe chupha teilecho asü hinou veachi paoa bue. Alia sükhaimoa peiva vayu sah bahyu mai alinou Anghojünou kou laloua paoe,

³¹‘Kornelia! Ramai nou ne khosü noupeire ea nenou toure hamai hi sa-a peiyu sü li-cho peire.

³²Südonou ne maiye seiho Jopa hinou Pitar tea kuyu Simonye kuloukhaio; puhsü zaidu pe hinou buyu souhee vah souwo Simon ki hinou hou-a bue!’

³³Südonou Enou thalasou nehi maiye seive neye kue, alia nenou vepeiyu hai veishore. Südonou chuo Eh hi paopeire Mapao nou nehi chikha peikhai touyu teiteisü keire donou khoa Eletao hrülai sü Ramai nghojünou ve bukhaire.”

³⁴Sükisü Pitar nou chi paoshu tare: “Ramaiwo zhai soukumoe touyu sü chuo Enou chekhao-a süloure.

³⁵Ana tahrüh tyali hrohinou puhye piyu ea acheche vah soua buyu mai taliye sü puhnou popeiwe.

³⁶Mai hrülai vei Mapao soua buyu Jisu Khrista vanou kaonayu vei ko avei paodou peiyu hai Ramai nou Israel maitao hi seive peiyu chipao nasüe touyu sü neletao nou süwe.

³⁷Johan nou puhvei dzükhao dapeiyu vei chipao paodouyu thaisü Galilee hinou shua Judea teidei teitei hi dai pare touyu kosü neletao nou süwe.

³⁸Süolouzü kakua Ramai nou Nazareth hi Jisu ye sü Rako Mashi ea khoukonou laposhu puhpei hisü napeie ea kakua puhnou buh liki taho aveivah soua ea rashinou souvea-a buyu mai hrülaiye kakua souvei peie touyu kosü neletao nou süwe; daiolouzü Ramai nou puhye koa laiwe;

³⁹Alia puhnou Jihudimai teidei hi ea Jerusalem hinou soupfüyu vah teiteitao vei zhopaohmai taosü Eh-e. Puletao nou puhye sü süüpei hinou khizhua southeare.

⁴⁰Ana Ramai nou puhye sü teithe asü zhou panou hrishuloua maikhemai hi ngaopeire.

⁴¹Sütoukhaia maikhemai hrülaihi ngaopeimoe, ana Ramai nou raia dopacheyu zhopaoh maitao likhei hi ngaopeibaie, süolouzü puhnou athai hinou hrishu louyuthai puhye koa toushoyu Eletao nou ngaobaie.

⁴²Alia maikhemai hi ko avei paodou peire ea Ramai nou puhye sü panou hrimai ea thaimai pei hi chiku-apeio soure donou dopa peikhai touyu nasüe touyu zhopaoh soure donou Eletao hi chikha peikhaitoue.

⁴³Alia puhzhih khouko vanou puhye loucheyu mai talinou mah hinou khailu louyu sü ngaoloulai tea puh vanou rachi paolamai hrülainou zhopaoh peikhaitoue.”

⁴⁴Pitar nou haibüa chipao-a buyu hinou puh chipao keia buyu maikhemai hrülai pei hisü Rako Mashi kouloure.

⁴⁵Alia hee rodeyu maitao hrohinou Pitarye koa veyu lüloumai taosü khupa loure, daiolouzü tahrüh kukhe maitao pei hi koutea Ramai nou puh Rako Mashi vei sa-apeina nasü lakou thoupeire.

⁴⁶Daiolouzü la sütho tyali pao-a buyu ea Ramaiye paoshoa buyu sü puletao nou chouloure. Sühinou Pitar nou paoe:

⁴⁷“Eletao nou ngaolouyu kua Rako Mashi ngaolouyu maikhemai haitaoye dzükhao dapeire hinou matalinoua nulou süwu?”

⁴⁸Südonou puhnou puletaoye Jisu Khrista zhih hinou dzükhao daloure donou chikha peire. Süthaisü puletao nou puhye sü teithe daotu puletao hi naipeio tea khoe.