Read Poumei Naga SEI-ATAMAI VAHTAO 12 Bible Online

SEI-ATAMAI VAHTAO 12 - Poumei Naga bible

SEI-ATAMAI VAHTAO 12

¹Sübüyu teile hinou Herod Veonou lüloumaime hi buyu maikamai pei hi sü bahkha kha-a souveashure.

²Puhnou Johan jürai Jemsye khochenou daotheare.

³Alia sübüyu nasünou Jihudimai le sousa peiwe touyu sü puhnou ngaoloua Pitarye-a niloure donou phoue. Haibüa payu hai Raokonüh teile hinoue.

⁴Alia puhnou puhye nilouyu kisü, puhye sü hukha hi thoure ea puhye sü reihmai adai dainou souyu me adaiye panou kholoure; alia puhye sü Tachonüh shonou maisou nghojü hi sapaloua chikure donou Herod nou souda loure.

⁵Südonou Pitar ye sü hukha hi khaire, ana puhye donou lüloumai menou lenoushoa Ramai hinou veachi pao-a bue.

⁶Herod nou puhye popa maisou nghojünou chiku laiyu jübü khei hinou Pitar sü hurai ahai nou phukhaitoua reihmai ahai kolenou zhia bue ea reih khaomainou kikhu bomü hinou hukha kisü khoa bue.

⁷Alia sükhaimoa Mapao vei rakivamai alinou sühisü kou laloua buh sühisü avanou varu loure. Sühinou rakivamai sünanou kou Pitar phao hinou tao-nguloua puhye soukaiwu-a paoe, “Thashoa shulo!” Alia sükisü hurai nasü Pitar bah hinou dekoure.

⁸Süthaisü rakivamai sünanou puh hi paoe, “Nevei khyakho phutsülo ea ne phikha-a thoulo.” Alia puhnou sübüa souloure. Sühinou rakivamai sünanou paoe, “Ne sahbasü bahloua Athai fülo.”

⁹Alia Pitar nou puhthai füloua hukhaki hinou vakouhi tapare, sütoukhai-a rakivamai sünanou sou-pfüa buyu sü chele hinoue touyu hai puhnou süloumoe, ana süsü zho ngaobaiwe tea puhnou choe.

¹⁰Sübüa puhai koa reihkhaomai araina ea ahai chena talapa louyu kisü puhai sü nuhdu hi taloure hu romü kikhu nahi palou loure. Alia puhaiye donou romü kikhu sünanou lah houpa loure ea puhai nou tapaloua duva alihi palou louyu kisü sükhaimoa rakivamai sünanou puhye thaowu-a tare.

¹¹Sükisü Pitar nou puh hi dai paresa touyu sü süloua, “Chuwo Mapao nou puhvei rakivamai seikoupeia Eye Herod bah hinou ea Jihudimai taonou zhia buyu teitei hinou khaipa peire touyu sü Enou sütou loure,” tea puh lahnou paoe.

¹²Puhnou sübüa payu sülouyu kisü, puhsü Mark tea kuyu Johan touyuna pfü Meri kihi tahore, sühisü mai alaosou tave dzüloua veachi paoa bue.

¹³Alia puhnou kijülo kikhu nasü khoua buyu kisü Rhoda tea kuyu kilai loumaina alinou pai süna khere donou tapae.

¹⁴Alia puhnou Pitar pai sülouyu kisü, puhsü sayulea kikhu sü houpei loumoa tukhai loure ea Pitar hai kikhunou ve la-a bure tea paopeie.

¹⁵Sühinou puletao nou puh hisü “Newo votare!” tea paoe. Ana puhnou süsü chekhao vuzüe tea bakhao-a paokhai paokhaire. Südonou puletao nou chila peie, “Haisü puhvei rakivamai baie.”

¹⁶Ana Pitar nou kikhu sü khoukhai khaire; alia puletao nou kikhu sü houpaloua puhye ngaolouyu kisü khupa shore.

¹⁷Ana panou paikhai more donou puhnou puletao hi bah zhawua, Mapao nou kabüa puhye hukha hinou popa peisa touyu hai soutaosoua puletao hi paongao peie. Alia puhnou paoe, “Ko haisü Jems hi ea kukhe thaihou jürai maitao hi-a paongao peio.” Süthaisü puhnou buh süna thaowu-a kukhe alihi vetare.

¹⁸Chuo tei thepayu kisü, Pitar hi dai paresa tea reihmaitao hrohi sü bvürosho loure.

¹⁹Alia Herodnou puhye soutaosou phouyuma ngaolou hokhaie, puhnou reihkhaomaitao hisü shasoua chi noudaloure ea puletaoye southeare donou kharochi peire. Süthaisü puhnou Judea hinou Kaisaria hi takouloua sühinou phajü chao-a bue.

²⁰Alia Herod nou Tur ea Sidon hi maitao pei hisü rarousho loure. Südonou puletao nou me ali souloua puhye daore donou tave, alia veo fühao hi peikhowo Blasta ye puletao nou chaveiloua puh soukha vanou Herod hinou kaonayu sü tave khoe; daiolouzü puletao teidei sü veo vei vedei hinou tou-so ngaotou baiwe.

²¹Alia paokhai touyu teithe zhousü Herod nou puhvei duzaona zhaoloua ea vebuh hi buloua puletao hi chi veishoa paongaoe.

²²Sühinou maikhemai taonou shusouloua, “Haisü ramai alivei pailae, mai paila moe!” tea paoe.

²³Sübü hinou Mapao vei rakivamai alinou Herodye sü dakhaore, daiolouzü puhnou kathe nasü Ramai hi peimoe. Alia puhye sü shikhaonou toutheare.

²⁴Ana Ramai vei chipaowo louzü sokhaimoa pukheloua dushuloue.

²⁵Alia Barnabas ea Saul nou ko paodoure vah nasü souchewu-a Mark tea kuyu Johanye saloua Jerusalem hinou khaitare.